Read lubukusu Sak. 12 Bible Online

Sak. 12 - lubukusu bible

Sak. 12

¹Buno nibwo burume bwa Wele Omunyali Owa Bioosi khu kholo eya Isiraeli. Ali Wele Omunyali Owa Bioosi niye owabuumba likulu, ne sibala mala aelesia omundu bulamu bumulimo. Wele Omunyali Owa Bioosi aloma ali,

²“Ndikhukhola lukoba lwa Yerusalemu lube nga sikoombe sie ndali, babaandu Be Chikholo babalubotookhelela balinywamo mala bataalitaale nga bameesi. Ne nga balibwaakala Yerusalemu akhaba chingoba chichiindi cha Yuda chosi chilibwaakalwa.

³Siise esio ndikhola Yerusalemu lusitoe nga libaale. Ekholo yosi yosi elikhaka khulisuta eliiumisibwa. Ne chikholo choosi che sibala chiliambaana khulwibwaakala.

⁴Ne mu siise esio ndiriikhirisia chifarasi chabwe choosi mala bachitimia balilalukha. Ndiloleelela babaandu ba Yuda, ne kakhali ndikhola chifarasi che basiku babwe chibofule.

⁵Nio be kholo eya Yuda balibolana babene bali, ‘Omwami Owe Banamae aelesianga kamaani babaandu bewe bamenyile Yerusalemu.’

⁶“Siise esio ndikhola chikholo cha Yuda chibe nga kumulilo mu musiru, namwe nga bumemu bwe kumulilo mu masakari mala baliosia buli baandu Be Chikholo chiili siimbi. Ne kakhali babaandu ba Yerusalemu bakhachiililile khumenya mu muleembe mu lukoba.

⁷“Ne ese Wele Omunyali Owa Bioosi ndinyoa mbelesie Yuda bukhili nio efuma eye babaandu be lisaaye lia Daudi ne bamenywa ba Yerusalemu balinyoola, ekhabi ekhila eye kholo eya Yuda yoosi tawe.

⁸Siise esio Wele Omunyali Owa Bioosi aliliinda bamenywa ba Yerusalemu, nio akhaba batekhele lukali mu nibo balinyoola kamaani nga Daudi ne aba. Ne be lisaaye lia Daudi bakhemeelele babaandu ba Yuda nga malaika owa Wele Omunyali Owa Bioosi namwe nga Wele omwene.

⁹Ne mu siise esio ndibunia chikholo choosi chikhaka khukhwibwaakala Yerusalemu.

¹⁰ “Ne ndielesia be lisaaye lia Daudi ne bamenywa ba Yerusalemu kumwoyo kwe siisa ne lisaba. Ne balilola khuyo niye baunaake, balimulila oli omundu ne alila omwana wewe omuteelwa. Balilila lukali oli omundu ne alila omwana wewe omubele.

¹¹Mu siise esio bililo mu Yerusalemu biliba bikali nga bibiaba khu Hatarimoni mu mweyeywe kwa Mekido.

¹²Buli nju mu sibala elilila. Lisaaye lia Daudi, lisaaye lia Nasani, lisaaye lia Lawi ne Simei ne babaandi boosi. Buli nju elilila babaandu bayo, ne baseecha ne bakhasi se bakhalilile alala babaandu babwe tawe.”