Read lubukusu Sak. 2 Bible Online

Sak. 2 - lubukusu bible

Sak. 2

¹Mu malola kakaandi nabona Omundu nali ne fuuti mukhono mwewe.

²Namureeba ndi, “Olikho ocha waena?” Angobosia ali, “Khupiima Yerusalemu, nenya manye luli buleeyi ne bubalaayi balwo.”

³Nio nabona malaika owaba ne alomaloome nase echa mala malaika okundi echa khukhwakaanana naye.

⁴Malaika omutaayi aboolela okundi ali, “Tima oche oboolele omusoleeli ooli ne fuuti oyo kano: Yerusalemu lulaba lukoba luukhali ne kamasiisi tawe. Bibaywa ne babaandu bakali balichulamo mala baake.

⁵Wele Omunyali Owa Bioosi asuubisie ali omwene alaba lisiisi lie kumulilo khufuusia lukoba ne khu lukhiinga, mala amenyemo mu luyali lwewe lwoosi.”

⁶Wele Omunyali Owa Bioosi aboolela babaandu bewe ali, “Yilukhila ebunaswa sikila namusalaniisie mu mbeka choosi nga ekhuungu eyichilanga chimbeka chine.

⁷Enywe mu mwacha Babiloni yilukhila Yerusalemu.”

⁸Omwami Owe Banamae anduma ese ne burume buno khu kholo chichayaaya babaandu bewe, “Oyo otiila khwinywe aba atiilile khu ndolelo yase.

⁹Wele Omunyali Owa Bioosi omwene alapana nanywe ne babaandu ba baaba bakholi benywe bakhamunuule bibiindu bienywe.” Nga bino ne bilikholekha, buli mulala alamanya ali Omwami Owe Banamae niye owanduma.

¹⁰Wele Omunyali Owa Bioosi aloma ali, “Baandu ba Yerusalemu, yimba ne khukhwekhoya sikila ndikho nicha khu menya mwinywe.”

¹¹Mu siise siene esio chikholo chingali chiliicha khu Wele Omunyali Owa Bioosi mala babe babaandu bewe. Wele Omunyali Owa Bioosi ali menya akari wenywe, mala enywe mulimanya muli Wele Omunyali Owa Bioosi anduma ese khwinywe.

¹²Babaandu ba Yuda baliba barobore ba Wele Omunyali Owa Bioosi mu maloba kamatakatifu. Ne Yerusalemu luliba lukoba nilwo asiima lukali po.

¹³Enywe mweesi sila busa ebweeni wa Wele Omunyali Owa Bioosi, sikila alikho echa khukhwama abumenyo bwewe atakatifu.