Read lubukusu Sak. 5 Bible Online

Sak. 5 - lubukusu bible

Sak. 5

¹Nalola lundi, mala luno nabona sitabu sipurukhila mu ngaaki.

²Malaika andeeba ali, “Waboone siina?” Nakobosia ndi, “Naboone sitabu silikho sipurukha. Sili buleeyi chimita tisa ne bukhiikha chimita chine ne nusu.”

³Nio Malaika amboolela ali, “Mu sitabu sino siaandikwamo silaamo sisicha khu sibala sioosi. Lubeka lulala lwekesia luli oyo owiiba alarusibwa khu sibala, ne lubeka luluundi luli oyo oboola bubeeyi mu khwichuba yesi alarusibwao.

⁴Omwami Owe Banamae aboola ali acha khuruma silaamo sino mala sikhache munju mwa buli mwifwi ne munju mwa buli oboola bubeeyi mu khwechuba. Silaamo sino silarama mu chinju chabwe ne khubabunia.”

⁵Nio Malaika niye nalomalomanga naye echa mala amboolela ali, “Lola! Sisiindu sisiindi silikho siicha!”

⁶Nareeba ndi, “Siina nisio?” Malaika angobosia ali, “Sino sili sikono nisio mala siekesia bubwoni bwe sibala sioosi.”

⁷Sikono siaba ne sifunikho sisiakholwa khukhwama khu sibia. Nga naloleelela sifunikho siafuunulwa, ne omukhasi aba ekhaale mu sikono.

⁸Malaika aloma ali, “Omukhasi yuno emeelela bumayaanu.” Nio Malaika amuminila mu sikono ne khu mufunikhilamo.

⁹Nio nakalama mu ngaaki mala nabona bakhasi babili ne bapurukha ne becha niio ndi ne chindaa che kamaani nga cha namukhooli. Babukula sikono mala bapurukha nasio.

¹⁰Nio nareeba malaika ndi, “Balikho basiyila waena?”

¹¹Malaika akobosia ali, “Basiyila Babiloni, niyo balasiombakhila lukaangu. Nga lukaangu ne lukhawe, bakhasireemo khusisaaya.”