Read lubukusu Sak. 6 Bible Online

Sak. 6 - lubukusu bible

Sak. 6

¹Naba ne kamalola kakaandi. Mu siise sino nabona kamakaari ke liie kane ne kecha khukhwama akari we bikulu bibili bie kimikasa.

² Likaari lie khunyoa liakhwesibwa ne chifarasi chimbesemu, lia khabili liakhwesibwa ne chimali,

³ ne lia khataru ne chifarasi chiwaanga ne lia khane ne chifarasi che kamapala.

⁴Nio nareeba malaika ndi, “Omwami, kamakaari kano kekesia siina?”

⁵ Angobosia ali, “Chino chili chimbeka chine che sibala chama khwicha khukhwama ebweeni wo Mwami we sibala sioosi.”

⁶Likaari liliakhwesibwa ne chifarasi chimali yaba lilikho licha ebunaswa e Babiloni, ne lie chiwaanga yaba lilikho licha mumbo, ne lie chifarasi che kamapala yaba licha ebunafubo.

⁷Nga chifarasi che kamapala ne charura chenya chiche khangu khulambuula sibala. Malaika aloma ali, “Cha mulambuule sibala!” Mala chaacha.

⁸Nio malaika amboolela ali, “Chifarasi chichacha ebunaswa e Babiloni chaosiisie lirima lia Wele Omunyali Owa Bioosi.”

⁹Wele Omunyali Owa Bioosi ambelesia burume buno,

¹⁰aloma ali, “Bukula biianwa bibiaanwa ne Helitai, Tobiya ne Yetaya ba baaba mu mbaambe, mala muche khangu mungo mwa Yoshua okhwa Sefania. Babaandu bano boosi bakoboole khukhwama mu mbaambe e Babiloni.

¹¹Khola ekuutwa khukhwama khu sahabu ne fwesa niyo baanile, mukhole ekuutwa mala mufware Yoshua Omusaayi Omukhulu Lukali, okhwa Yehosataki.

¹² Muboolele muli Omwami Owe Banamae aloma ali, ‘Omundu olaangwa bali Lusakia alarubura niio ali mala ombakhe lundi Lukaangu lwa Wele Omunyali Owa Bioosi.

¹³Niye oliombakha lukaangu lwa Wele Omunyali Owa Bioosi, mala anyoole luyali nga omwami, mala aliamiia babaandu bewe. Omusaayi alimuyeeta mu bwami bwewe mala boombi baliba ne kumuleembe ne liiuliilisiana.’

¹⁴Ne ekuutwa elaba mu Lukaangu lwa Wele Omunyali Owa Bioosi nga likhebusia khu Helitai, Tobiya, Yetaya ne Yosia.”

¹⁵Babaandu bamenyile aleeyi baliicha bayeete khukhwombakha lundi Lukaangu lwa Wele Omunyali Owa Bioosi. Ne kano ne kekholekha, mulimanya muli Omwami Owe Banamae anduma ese khwinywe. Bino bioosi biliekholekha mwaba ne muria endakaano eya Wele Omunyali Owa Bioosi, Wele wenywe mu bwichufu.