Read lubukusu Sak. 8 Bible Online

Sak. 8 - lubukusu bible

Sak. 8

¹Omwami Owe Banamae aboolela Sakaria ali,

²“Nekoomba njeete Yerusalemu sikila busiime bwase bukali khu baandu balwo, busiime bwakilile nakhalaliile basiku balwo.

³Ndikobola mu lukoba lwa Yerusalemu, lukoba lwase lutakatifu ndumenyemo. Yerusalemu lulilaangwa lukoba lusuubilwa ne sikulu sia Wele Omunyali Owa Bioosi Omunyali Owa Bioosi sililaangwa sikulu sitakatifu.

⁴Basaakhulu ne baloosi, bakofu lukali, babetiila khu siimbo balikhala khu ngila che lukoba lwa Yerusalemu.

⁵Basoleeli ne bakhaana balaba bakali ne benyayila khu ngila echo.

⁶“Wakana lino lilalolekhana nga likhanyalikhana tawe khu kholo chicharama, ne kakhali khwise linyalikhana.

⁷Ndareesia babaandu base khukhwama mu bibala nibio bayilwamo.

⁸Ndabakobosia khukhwama ebukwe ne mumbo beche bamenye Yerusalemu. Balaba babaandu base, ne ese ndaba Wele wabwe, mbamiie mu busuubilifu ne bung'ali.

⁹“Nyindaalila! Luno mulikho muulila kamakhuwa niko bang'oosi balomaloma mu siise nisio kumusiingi kwe Lukaangu kwaba ne kulikho kwombakhwa.

¹⁰Biise ebio ne bikhoola tawe, kimilimo kie kumuruungo se kiabao khu mundu namwe khu saang'i tawe, ne kumuleembe se kwabao khukhwama khu musiku tawe. Nakhola babaandu babiilana.

¹¹Ne kakhali luno se ndakhola babaandu babarama nga nakhola siise sisiabira tawe.

¹²Babaandu babarama balibiaala biakhulia biabwe mu muleembe. Kimisabibu kiliaama kamatuunda, ne liloba lilamamo bibiaamo, ne fula eliba engali. Khabiite chikhabi chino choosi khu baandu be kholo yase babarama.

¹³Baandu ba Yuda ne Isiraeli! Khale baakwa balaamananga ne baloma bali, ‘Silaamo sibe khwiwe nga sisiaba khu Yuda ne Isiraeli!’ Ne kakhali ndamuonia enywe, nio baakwa abo balome bali, ‘Obiitwe chikhabi nga cha Yuda ne Isiraeli!’ Khwako ba banyindaafu mukharia tawe.”

¹⁴Omwami Owe Banamae aloma ali, “Nga bakuuka benywe ne ba mbambia lirima, narekekha lilionaka khu nibo ne se nakaluukhasiakho kamebaasio kase tawe, nakhola niko naba ne ndekekhe.

¹⁵Ne kakhali luno ndikho nirekekha khubiita chikhabi babaandu ba Isiraeli ne Yuda. Khwako mukharia tawe.

¹⁶ Mukhoya mukhole bibiindu bino, boolela basienywe bung'ali, khola bukhalaki bwa ng'ali mu koti bureera kumuleembe.

¹⁷Mukharekekha khukholanila kamabi tawe, namwe mukhaboola bubeeyi ne mwechuba tawe. Ese Wele Omunyali Owa Bioosi nabiila bubeeyi, bukhalaki bukhali bwa ng'ali tawe ne sisiayuumba.”

¹⁸Omwami Owe Banamae lundi aboolela Sakaria ali,

¹⁹“Khukhweyimana khwe kumwesi kwa khane, kwa kharaano, kwa saba nende kwe likhumi bilaba biise bie ekhoyo ne busangaafu khu baandu ba Yuda. Mukhoya musiime bung'ali ne kumuleembe.”

²⁰Omwami Owe Banamae aloma ali, “Chindaalo chilikho chiicha nicho babaandu khukhwama mu ngoba choosi baliicha Yerusalemu.

²¹Abo babarama mu lukoba lulala baliboolela be luluundi bali, ‘Lekha khuche khusaaye Omwami Owe Banamae mala khu musabe niye chikhabi.’

²²Babaandu bakali ne chikholo che kamaani chiliicha Yerusalemu khusaaya Omwami Owe Banamae ne khusaba chikhabi chewe.

²³Mu ndaalo ng'ene echo baakwa likhumi baliicha khu muyaudi mulala ne khumuboolela bali, ‘Lekha khuche nawe sikila khwaulila bali Wele ali nanywe.’ ”