Read lubukusu Sak. 9 Bible Online

Sak. 9 - lubukusu bible

Sak. 9

¹ Buno nibwo burume bwa Wele Omunyali Owa Bioosi. Wele Omunyali Owa Bioosi abisiisie siiukuumo khu sibala sia Hatiraki ne lukoba lwa Damasika. Chikholo cha Isiraeli ne lukoba luboofu lwa Siria bili bia Wele Omunyali Owa Bioosi.

²Lukoba lwa Hamasi lulwetiila khu Hatiraki lwosi luli lulwewe. Akhaba chingoba cha Tiro ne Sidoni ne bukesi bwabwe bwe khukhola kimilimo.

³Lukoba lwa Tiro lwasirwa ne kamasiisi, lwaba ne efwesa ne sahabu engali, biasala nga kumuyekhe.

⁴Ne kakhali Omwami alibukula buli siindu nisio luli nasio, alimwaata buiinda bwalwo mu nyanja ne lukoba lulwene luliya sio.

⁵ Lukoba lwa Ashikeloni lulibona kano mala lurie. Babaandu be mu lukoba lwa Kasa balichuunwa lukali. Lukoba lwa Ekironi lwosi se luliba ne lilieyikina tawe. Kasa se lukhabe no mwami tawe, ne Ashikeloni lulianjukhwa.

⁶Babaandu Be Chikholo choosi khukhwama aleeyi balimenya mu Ashitoti. Wele Omunyali Owa Bioosi aloma ali, “Ndakamia lilielola lie ba Filisiti.

⁷Babaandu balwo se baliliakho lundi enyama elimo kamalasile tawe, namwe biakhulia bibiindi nibio bakaania tawe. Babaramamo boosi baliba balala khu baandu base, khuba nga be lisaaye lie kholo eya Yuda. Babaandu ba Ekironi balibalikha nga babaandu base, bulayi bwene nga Bayebusi.

⁸Ndiliinda kamaloba kase banamae se balibao bakhabiremo tawe, omukuluumi oupia siibi babaandu base se alibao lundi tawe, naboone siibi nisio babaandu base bapile.”

⁹ Baandu ba Sayuni yekhoya lukali! Ee baandu ba Yerusalemu, sangaala lukali! Lola omwami wenywe alikho echa! Echa ne khoyo ne bukhili ne kakhali ali ne lilieboombia mala akeendela khu punda, khu punda eng'ana.

¹⁰ Wele Omunyali Owa Bioosi aloma ali, “Ndarusia kamakaari ke liie mu Isiraeli ne khurusia chifarasi che liie mu Yerusalemu, buyiingo burumikhirwanga mwiie bulafunakwa Omwami wenywe alarao kumuleembe akari we chikholo, alamiia khukhwama khu nyanja khukhwola khu kiindi, khukhwama khu luuchi lwa Efurati khukhwola khu siakamo sie sibala.”

¹¹ Wele Omunyali Owa Bioosi aloma ali, “Khulwe ndakaano yase nanywe eyakholwa khubirira khu malasile ke chimbosio, ndalekhuula babaandu benywe, khukhwama mu mbaambe nimwo kameechi kakhali tawe.

¹²Kobola, baambe muli luno ne lilieyikina, kobola abwilukhilo bwenywe. Luno ndoma ndi ndamuruunga khukhwola khabili khulwe siibi nisio mwapwa.

¹³Ndarumikhira Yuda nga buyiingo bwo musikaari ne Isiraeli nga buembo. Ndarumikhira babaandu ba Sayuni nga embalu, khu khuupana ne Bakiriki.”

¹⁴Wele Omunyali Owa Bioosi alabonekha angaaki we babaandu bewe, alalasa buembo bwewe nga lueni. Omwami WELE alapa ekhoombi yewe, mala alakeendela mu mbembeesi khukhwama ebunafubo.

¹⁵Omwami Owe Banamae akhaliinde babaandu bewe, ne balibunia basiku babwe. Baliyokela mwiie nga bamelile ne balichukha kamafuki ke basiku babwe, kalichichukha nga ke embosio kachukhilwe khu alutare khukhwama khu sipwakuli.

¹⁶Endaalo eyo ne yola Wele Omunyali Owa Bioosi alionia babaandu bewe, nga omwaayi aonianga lituuli liewe khukhwama khu busiku. Baling'enang'enela mu sibala siewe nga kamamili ke kuutwa.

¹⁷Sibala esio siliba silayi lukali! Basoleeli ne bakhana baliba ne kamaani khulwe bukali bwe likesa ne endali embia