Read lubukusu Mal. 2 Bible Online

Mal. 2 - lubukusu bible

Mal. 2

¹Wele Omunyali Owa Bioosi aboolela basaayi ali, “Enywe basaayi, lino lili lilaka khwinywe.

²Khukhwola mumbe luyali mu bikholwa bienywe. Mwaba ne mukharekeeresia elomo niyo muboolela tawe, aba ndamulaama enywe ne bibiindu nibio munyoolanga khulwe buyeeti. Ne ng'ali nabilaamile khale sikila enywe se muli ne sinani khuria lilaka liase tawe.

³Ndaukuuma babaana benywe mala maale mumoni mwenywe buuse bwe bibiaayo nibio muaananga ne embosio mala murusie enywe ebweeni wase.

⁴ Nio mulimanya muli ese namuelesia enywe kamalaka kano nio endakaano yase ne basaayi be lisaaye lia Lawi elekhe khufunikha tawe.

⁵ “Mu ndakaano yase ne basaayi, nasuubisia khubaelesia bulamu ne kumuleembe mala nakhola ndio nio bandie ese. Mu ndaalo echo bandia lukali.

⁶Bekisia bung'ali bwong'ene mala bamenya nase mu muleembe ne buluungi, lundi bayeeta bakali khulekha khukhola bubwoni.

⁷Kuli kumulimo kwe basaayi khukhwikisia babaandu bung'ali bwa Wele. Babaandu bakhoyela bacha khu nibo khukhweyika niko neenya sikila nibo bali barumwa ba Wele Omunyali Owa Bioosi.

⁸“Ne kakhali enywe basaayi mwakaluukhane mwarurire khu ngila enuungi. Kamekisio kenywe kakilile bakali bakholile kamabi. Mwafunaake endakaano niyo ese nakhola nanywe.

⁹Khwako, ese ndakhola babaandu ba Isiraeli bamulekelesie enywe sikila se mumbulila ne khukhola niko nenya tawe, lundi mutombolaanga babaandu mu mekisio kase.”

¹⁰Efwe fweesi se khuli ne Paapa mulala tawe ku? Se ali Wele mulala oyo owakhubumba efwe fweesi? Nono siina sikila ne khufunakanga kamasuubisia niko khukholile fwabene khu beene mala khulekelesia endakaano niyo Wele aakhola ne bakuuka befwe?

¹¹Babaandu ba Yuda bafunake lisuubisia liabwe khu Wele. Bakholile kumwiima kukhafukiililwa mu Isiraeli ne Yerusalemu tawe. Banyaalutisie lukaangu nilwo Wele Omunyali Owa Bioosi asiima. Babaandu be siseecha bakhweele bakhasi khukhwama mu kholo chisaaya bifwaani.

¹²Abo babakhola kano, Wele Omunyali Owa Bioosi akhoya abarusia mu Isiraeli mala bakhafukiililwakho lundi baana biianwa khu Wele Omunyali Owa Bioosi.

¹³Lundi mukholanga muri. Mulililaanga khu alutare ne khukukuula mala mutosia alutare ya Wele Omunyali Owa Bioosi ne kamasika sikila Wele Omunyali Owa Bioosi leelo se afukiililanga biianwa nibio mu mureereranga tawe.

¹⁴Ne mureeba sikila siina ne akhabifukiililanga tawe. Se abifukiililanga tawe sikila amanyile ali ewe wafunake endakaano yowo niyo wakhola no mukhasi owe mu buele bwowo. Aaba niye ewe okhoyela khumenya naye, ne kakhali wafunake lisuubisia liowo khu niye akhaba ne wasuubisia ebweeni wa Wele oli oliba omusuubilwa khu niye.

¹⁵Wele nga ne amuambaasia mu mubili ne mu roho afunana siina? Afunana mube ne babaana baali babaandu ba Wele bang'ali khwako omundu yesi yesi akhafuna lisuubisia liewe khu mukhasi wewe tawe.

¹⁶Wele Omunyali Owa Bioosi, Wele owa Isiraeli aboola ali, “Ese nabiila khulekhana. Nabiila omundu okhola likhuwa lie khuchunisia kumwoyo nga lino liri khu mukhasi wewe. Mukhebilila mwafuna lisuubisia lienywe khu bakhasi benywe tawe.”

¹⁷Enywe mwaluisie Wele Omunyali Owa Bioosi ne chilomo chenywe. Ne mureeba muli, “Khwamuluisie khuriena?” Mwamuluisie khulwe khuloma muli, “Buli mulala okhola bubi ali omulayi mumoni cha Wele Omunyali Owa Bioosi, mala niye abasangaalila.” Ne khureeba muli, “Wele okhola bung'ali ali waena?”