Read lubukusu Mat. 10 Bible Online

Mat. 10 - lubukusu bible

Mat. 10

¹Yesu aalaanga babeeka bewe likhumi na babili, abaelesia bunyali bwe khu rusia bisieeno ne khuonia bulwaale bwa buli lukano ne butekhele.

²Kamasina ke barumwa likhumi na bibili niko kano Omurangirisi, Simoni owalaangwa Petero, ne wandaaye Andereya, Yakobo omwana owa Sebetayo, ne wandaaye Yoana,

³Filipo ne Baturimayo, Tomasi ne Matayo omuroosi owe busuuru, Yakobo omwana owa Alufayo, ne Tadayo,

⁴Simoni Omukanaani, ne Yuda Isikarioti, owamuchaama.

⁵Yesu aruma likhumi na babili abo, enje ne abalaka ali, “Mukhacha abuundu osi osi mu Be Chikholo, namwe mwengila mu lukoba lwe Basamaria tawe.

⁶Ne kakhali khemuche khu makheese ka katiba ke nju eya Isiraeli.

⁷ Ne mucha yiilwacha muli, ‘Bubwami bwe mwikulu buli siimbi!’

⁸Khemuonie balwaale, mulamusie bafu, muonie be kamakele mala murusie bisieeno. Mwanyoolile busa, aana busa.

⁹Mukhasuta esahabu yosi yosi efwesa, namwe koopa mu mifuuko kienywe tawe;

¹⁰ mukhaba ne kumufuko kwe babaandu babesabiilisia khu lukeendo lwenywe tawe, namwe kamasiati kabili, namwe biraaro namwe esiimbo tawe. Sikila omukholi akhoya anyoole siakhulia siewe.

¹¹“Ne mucha mu lukoba namwe mu sirekere siosi siosi reeba yesi yesi naalimo onyala amwakaanila enywe, menya naye nabwila murekukha.

¹²Ne mwingila munju kheesia baalimo muli, ‘kumuleembe kube nanywe.’

¹³Babaandu be munju omwo ne bamwakaanila lekha kumuleembe kwenywe kube nabo, ne bakhamwakaanila tawe cha ne kumuleembe kwenywe.

¹⁴ Kaaba bali yesi yesi se amwakaanila namwe se amuulila, namwe se arekeeresia kamakhuwa kenywe tawe, yeyela abuundu bwenao lutamuusi lwe khu bikele bienywe.

¹⁵ Ng'ali ese muboolela enywe ndi, khu Ndaalo eye likhalaka, Wele alikholela siisa babaandu ba Sodomu ne Komora khukhila babaandu be lukoba lwene olwo!

¹⁶ “Rekeeresia! Ese muruma enywe enje nga kamakheese akari we bisuuche, khwako kesiya nga chindemu lundi mube baolu nga kamauusi.

¹⁷ Khemwiyaye khu baandu, sikila bakhabatiile bamuyaale, lundi bamupile mu masinakooki.

¹⁸Bakhamukhurure ne bamuyila ebweeni we baruki ne babaami sikila ese, khubelwachila nibo nende Be Chikholo.

¹⁹Ne bamuchongela enywe, mukheembeelela nga mukhalomalome, namwe niko mukhalome tawe, sikila niko mukhalome kakhaanwe khwinywe siise siene esio.

²⁰Se muli enywe mukhalomalome tawe, ne kakhali Roho owa Wele akhalomalomele mwinywe.

²¹ “Wandaaye alichongela wandaaye erwe, ne bapaapa ne babaana babwe balichonganila, ne babaana balikaluukhanila basaasi babwe ne benya khubeera.

²² Buli mundu alimubiila enywe sikila ese. Ne kakhali oyo oliekhaliilikha khukhwola khu siakamo alionisibwa.

²³Ne bamupia enywe siibi mu lukoba lulala, yilukhila mu lundi, ng'ali ese muboolela enywe ndi, se mukhamale mu ngoba cha Isiraeli choosi Omwana wo Mundu ne akhecha tawe.

²⁴ “Omweeka se akhila omwekisia tawe, namwe omukholi se akhila omwami wewe tawe.

²⁵ Khwako kanyalikha omweeka khuba nga omwekisia wewe ne omukholi khuba nga omwami wewe. Kaaba bali balangile omwenenju bali Beelisebuli, aba balakhoma bariena bamenyile mu nju yewe!

²⁶ “Nono mukharia babaandu tawe, sikila mbao sisiakukhuulilwa siosi siosi sikhalifunulwa namwe sisiakisibwa sikhalimanyikhana tawe.

²⁷Niko ese ndamuboolelanga enywe mu siilima mukhoya mukalomele abuwaanga, ne niko muulila ne kalomwa mu bwikisi, mukhoya mukalomele khu bisekese bie nju.

²⁸Mukharia babeera kumubili mala bakhilwa khukhwira kumwoyo tawe, ne khali murie Wele, oyo owonaka bioombi, kumwoyo ne kumubili emakoombe.

²⁹Opicho bibili se bikulwa limotole? Ne khalalakho se khanyala khakwa aasi Raraawenywe ne akhenyile ario tawe.

³⁰Akhaba lichuune lienywe lioosi liabalwa.

³¹Nono mukharia tawe, enywe mukhila opicho bikali!

³²“Khwako buli mundu oufukiilila ese ebweeni we babaandu sesi ndimufukiilila niye ebweeni wa Paapa oli Mwikulu.

³³ Ne yesi yesi ounjekaana ebweeni we babaandu, sesi ndimwekaana ebweeni wa Paapa oli Mwikulu.

³⁴“Mukhebaasia muli nechile khureera kumuleembe khu sibala tawe, se nechile khureera kumuleembe tawe, ne kakhali bulomani.

³⁵ Ese necha khukhola omundu abiilane ne raraawe, ne omukhaana ne maawe, ne mukho mwana ne masalaawe,

³⁶ne basiku bo mundu baliba be nju yewe eng'ene.

³⁷“Yesi yesi osiima raraawe namwe maawe khu khukhila ese se olaana khuba omuloondi wase tawe, yesi yesi osiima omwana wewe omusoleeli namwe omukhaana khu khukhila ese se olaana khuba omuloondi wase tawe.

³⁸ Ne yesi yesi okhabukula kumusalaba kwewe mala anondakho se olaana khuba omuloondi wase tawe.

³⁹ Yesi yesi okhaka khuonia bulamu bwewe akhabutibie, ne yesi yesi otibia bulamu bwewe sikila ese akhabunyoole.

⁴⁰ “Yesi yesi omwakaanila enywe anjakanila nase, ne ounjakanila ese akaanila owanduma ese.

⁴¹Yesi yesi owakaanila omung'oosi sikila ali omung'oosi alinyoola kumuruuru kwo mung'oosi, yesi yesi owakaanila omundu omuluungi sikila ali omuluungi alinyoola kumuruuru kwo muluungi.

⁴²Lundi yesi yesi oelesia sikoombe sie kameechi kamanyifu mulala khu bakeekhe bano sikila ali omweeka wase, ng'ali ese muboolela enywe ndi, se alitibia kumuruuru kwewe tawe.”