Read lubukusu Mat. 13 Bible Online

Mat. 13 - lubukusu bible

Mat. 13

¹Endaalo eyo ne eng'ene Yesu arura munju ekhala anyanja khukhwekisia.

² Mala babaandu bakali bamwibusiao, bakila engila mu liaaro ekhalamo ne babaandu abo nabo bema khu sikiingi.

³Yesu ababoolela bibiindu bikali mu ngano ne aloma ali: “Omumiichi arura khucha khumiicha.

⁴Nga aba namiicha bumiicho bulala bwakwa khu ngila, mala chinyuni checha chabuboocha.

⁵Bubuundi bwakwa khu lwanda lukhalikho liloba likali tawe khwako bwarubura khangu.

⁶Ne nga enyanga yarura kumuumu kwabwosia bwaniaala mala bwoma sikila bwaba bukhekhisia chiisi aasi tawe.

⁷Bumiicho bubuundi bwakwa mu mawa, mala eng'eneeni eye kamawa yakila bwafwa.

⁸Bumiicho bubuundi bwakwa mwiloba lilayi, bwaama bibiaamo, bulala khukhwola emia, bubuundi kamakhumi sita, bubuundi kamakhumi kataru.”

⁹Yesu amaliilisia ali, “Ooli ne kamaru, aulile!”

¹⁰Nio babeeka beecha bamureeba bali, “Siina sikila ne orumikhira chingano khulomaloma khu baandu?”

¹¹Abakobosia ali, “Enywe mwaelesebwa bubweyaangu bwe khumanya ke bubwami bwe mwikulu kakakiswa ne nibo tawe.

¹² Oli nabio alaebwa bibiindi bikali, ne okhali nabio tawe, alanuulwa akhaba sitiiti nisio ali nasio.

¹³Kano niko kakila ne ndoma nabo mu ngano, sikila khulola balola ne se babona tawe, lundi barekeeresia ne se baulila tawe, namwe se bamanya tawe.

¹⁴ Khu nibo kaba kario nio kechusibwe niko omung'oosi Isaya aaloma ali, ‘Mukharekeeresie ne se mukhaulile tawe, mukhalole ne se mukhabone tawe.

¹⁵Sikila kimiooyo kiabwe kimilume, ne kamaru kabwe kaminyaalile, ne chimoni chabwe chabofuule. Busa andi baboone, lundi andi bauliile, ne khumanyilisia mu miooyo kiabwe, mala bangobolela ese mbaonie.’

¹⁶ “Ne kakhali enywe muli ne khabi! Sikila chimoni chenywe chibona ne kamaru kenywe kaulila.

¹⁷Ese muboolela enywe bung'ali, bang'oosi ne babaandu baluungi be khaale bakali bekoombanga khubona niko mubona kano, lundi khuulila niko muulila kano mala se bakaulila tawe.

¹⁸“Rekeeresia mala mumanye sifuno sie lukano lwo mumiichi.

¹⁹Yesi yesi oulila Elomo eye Bubwami bwe nwikulu ne se akimanya tawe, ali nga bumiicho bubwakwa khu ngila. Omumayaanu echaanga mala abukula kabialiilwe mu niye.

²⁰Ne bubwamiichwa mwiloba lie khu mabaale, buli nga oyo oulila Elomo akifukiilila bwangu ne liliekhoya.

²¹Ne kakhali se akitiila tawe, elumilisiakho khulwe siise sitiiti, oli siibi ne butinyu bibao sikila Elomo eyo, ne bwangu akilekhuula.

²²Ne bubwamiichwa mu mawa buli nga abo baulila Elomo, ne kakhali bibiindu bie sibala ne khusiima buiinda biira Elomo eyo, mala se saala kamatuunda tawe.

²³Ne bubwamiichwa mu maloba kamalayi buli abo baulila Elomo bakimanya, basaala kamatuunda, balala emia ndala, babaandi kamakhumi sita ne babaandi kamakhumi kataru.”

²⁴Yesu ababoolela lukano luluundi ali, “Bubwami bwe mwikulu bunyala khufwaananisibwa khu mundu owamiicha bumiicho bulayi mu mukuunda kwewe.

²⁵Ne kakhali babaandu baba oli bakona, omusiku wewe echa amiicha libaye mu ngaanu, mala arekukha.

²⁶Khwako engaanu nga yamela oli eraakho, libaye chana liamanyikhana.

²⁷Bakholi bewe becha bamuboolela bali, ‘Omwami, ewe se wamiicha bumiicho bulayi mu mukuunda kwowo? Nono libaye nalio liamile waena?’

²⁸Abakobosia ali, ‘Omusiku niye okholile kano.’ Bakholi bamureeba bali, ‘Nono wenya khuche khulikhuule?’

²⁹Naye abakobosia ali, ‘Tawe, mukhola murio oli mulikhuula mwakhuulilamo engaanu.

³⁰Lekha bioombi bichoele alala khukhwola mwikesa, ndilaka bakesa ndi, nyoa mukhuule libaye muliboe mu bikala muliosie mala mukese engaanu mala mu kibuunge mu sirara siase.’ ”

³¹Yesu ababoolela lukano luluundi ali, “Bubwami bwe mwikulu buli nga khamiicho khe kumupeeli nikho omundu abukula amiicha mu mukuunda kwewe.

³²Khali khakeekhe khukhila bumiicho bubuundi bwoosi, ne kakhali ne khakhulile khaba kumurongooro kumuboofu mu kioosi nikwo chinyuni chiicha ne chombakha biswi khu sakia chakwo.”

³³Yesu aabakanila lukano luluundi: “Bubwami bwe mwikulu buli nga limela nilio omukhasi abukula ne apaakhila mu bipanga bitaru bie bufu nabwila bwoosi buyiimba.”

³⁴Yesu aaboolela babaandu kano koosi mu ngano, se ababoolelakho sisiindu siosi siosi nekhali khubirira mu ngano tawe.

³⁵ Aakhola ario nio niko omung'oosi aaloma kechusibwe. “Ndilomaloma nabo mu ngano. Ndiboola kakakiswa khukhwama nga sibala ne siabaang'anwa.”

³⁶Nga Yesu arura mu baandu engila munju, babeeka bewe bacha niio ali bamuboolela bali, “Khwinooselie lukano lwe libaye mu mukuunda nga luboola.”

³⁷Yesu akobosia ali, “Omiicha bumiicho bulayi ali Omwana wo Mundu;

³⁸sibala nisio kumukuunda, ne bumiicho bulayi nibwo babaandu be Bubwami; libaye lili babaandu bo Mumayaanu,

³⁹ne omusiku owabumiicha ali Sietani. Likesa lili Siieli sie sibala, ne bakesa bali malaika.

⁴⁰Nga libaye libuusibwa ne khukhwosebwa mu mulilo, kaliba kario mu siieli sie sibala.

⁴¹Omwana wo Mundu aliruma malaika bewe mala babuusie khukhwama mu Bwami bwewe abo boosi batiimia babaandu khukhola bubwoni ne babaandi boosi bakhola bumayaanu,

⁴²mala bakhabamwaate mu sioso sie kumulilo, mu bwene omwo babaandu balilila ne khukhwelumakaka.

⁴³Nio baluungi balikhosia nga enyanga mu Bwami bwa Raarawabwe. Oli ne kamaru, aulile!

⁴⁴“Bubwami bwe mwikulu buli nga libiikhilo liliakisibwa mu mukuunda, nilio omundu anyoola elilisia mala mu khoyo yewe acha akusia bioosi nibio ali nabio, aakula kumukuunda mwene okwo.

⁴⁵“Lundi Bubwami bwe Mwikulu buli nga omwofuli, oenja chisiimbi chindayi.

⁴⁶Oli anyoola esiimbi ndala eye bukusi bukali, ne acha akusia bioosi nibio ali nabio mala akikule.

⁴⁷“Lundi Bubwami bwe Mwikulu buli nga lutiimba lulwamwaatwa mu nyanja mala lwabuusia ching'eeni buli lukano lwoosi.

⁴⁸Nga lwechula, babaandu balukhwesa balura khu sikiingi, bekhala aasi, mala bangalamo chindayi bachira mu bikono mala bamwaata chimbi.

⁴⁹Kaliba kario mu siieli sie sibala, malaika baliicha baukhasie babooni khukhwama mu baluungi,

⁵⁰mala bamwaate babooni mu sioso sie kumulilo, mu bwene omwo balilila ne khukhwelumakaka.”

⁵¹Yesu abareeba ali, “Mwamanyile kano koosi ku?” Bamukobosia bali, “Yee.”

⁵²Nio ababoolela ali, “Khwako omuandiki we Lilaka yesi yesi owekisiibwe khulwe Bubwami bwe mwikulu ali nga, omwene mungo obukula khukhwama mwibiikhilo liewe, bibiindu biyia ne bikhale.”

⁵³Yesu nga ne amala chingano chino, arura ebweeneyo

⁵⁴akobola mu lukoba lwe wabwe. Ekisia mu sinakooki mwabwe mala babamurekeeresia bauka, baloma bali, “Omundu yuno amia waena bukesi ne kamayia kano?

⁵⁵Yuno se ali omwana owo omundu ong'oonanga bibiindu bie chimbao? Maawe se ali Maria? Lundi bawandaaye se bali Yakobo, Yosefu, Simoni ne Yuda?

⁵⁶Ne bakooko bewe boosi se bamenyile ano? Nono niye amia waena kano koosi?”

⁵⁷ Bamubonela niye bubi. Ne Yesu ababoolela ali, “Omung'oosi se ali ne fuma mu sibala siewe ne munju yewe omwene tawe.”

⁵⁸Mala se akhola kamayia kamakali ebweeneyo tawe, sikila khutaamba lisuubila khwabwe.