Read lubukusu Mat. 14 Bible Online

Mat. 14 - lubukusu bible

Mat. 14

¹Mu siise siene esio Herodi omuruki owa Kalilaya aulila efuma eya Yesu.

²Aboolela babemeelesi ba baaba aasi wewe ali, “Yuno ali Yoana Omubatiisi asiukhile khukhwama mu bafu, aka niko kakila nakhola kamayia kano.”

³ Herodi yuno niye owaamba Yoana amura mu siboe sikila Herotia, mukha wandaaye Filipo.

⁴ Sikila Yoana amuboolela ali, “Lilaka se likhufukiilila ewe khukhwila khu Herotia tawe.”

⁵Herodi enya khukhwira Yoana, ne kakhali aria babaandu, sikila bamanya bali Yoana aaba omung'oosi.

⁶Nga endaalo eye khukhebulila khusaalwa khwa Herodi ne yoola, omwana owa Herotia omukhaana akhinila sisiikhasio, mala asiimisia Herodi lukali.

⁷Khwako Herodi amulaka ne khu mwichubila ali alamuelesia siosi siosi nisio enya.

⁸Nio Herotia aachilisia omwana ali loma oli, “Mbelesie kumurwe kwa Yoana Omubatiisi khu lutelu siise sino!”

⁹Ne kakhali sikila aaba echubile ebweeni we bakeni bewe, alakiilisia ali bamuelesie.

¹⁰Nio arumania munju eye baboe bakhala Yoana kumurwe.

¹¹Mala bareera kumurwe kwewe khu lutelu baelesia omukhaana oyo, naye ayilila maawe.

¹²Babeeka ba Yoana becha babukula kumubili kwewe mala basiikha mala bacha baboolela Yesu.

¹³Nga Yesu ne aulila kano, engila mu liaaro arura ebweeneyo acha abuundu niio babaandu bakhaba tawe aaba ebweeneyo yeng'ene. Nga babaandu bakali ne baulila, bama mu ngoba chabwe bamuloondakho khu bikele.

¹⁴Oli eema khu sikiingi abona babaandu bakali mala abakholela siisa, aonia ba baaba balwaale.

¹⁵Oli ekolooba, babeeka bewe bamwichakho baloma bali, “abuundu ano ali mu sichiimi, ne enje bwelabuule. Sibula babaandu bache mu birekere bakule biakhulia balie.”

¹⁶Yesu aloma ali, “Bakhenaana khucha tawe, enywe baelesie siakhulia balie!”

¹⁷Babeeka bewe bamuboolela bali, “Ano khuli ne kimikaati kiraano kiong'ene ne ching'eeni chibili.”

¹⁸Ababoolela ali, “Bireere ano.”

¹⁹Nio aboolela babaandu abo khukhwikhala aasi khu bunyaasi mala abukula kimikaati kiraano ekio ne ching'eeni chibili echo alola mu ngaaki apila Wele orio. Akimesula aelesia babeeka, mala babeeka bakaba babaandu.

²⁰Babaandu boosi balia bekura. Nio babeeka babuusia bitonyi bie kimikaati bibiarama mala biechula bikono ekhumi na bibili.

²¹Ne babakilia baba babaandu chielefu chiraano be siseecha bong'ene nokhabaliilekho bakhasi ne babaana tawe.

²²Nio aboolela babeeka bengile mu liaaro banyoe bambukhe enyanja bache ebweeni wewe niye omwene nasisibula babaandu khurekukha.

²³Enyuma we khusibula babaandu acha mu sikulu yeng'ene khusaba mala bwelabulilayo.

²⁴Ne mu siise sieneesio liliaaro liaba aleeyi khukhwama khu sikiingi, ekhuungu yaba engali yakila bibuli bie kameechi bialitengaasia.

²⁵Mu makhelebeende Yesu echa niio babeeka bali, ne alikho akeenda khu meechi.

²⁶Ne babeeka nga bamubona nakeenda khu meechi buuri bwabaamba. Mala bakukuula bali, “Simakoombe nisio!”

²⁷Nio oli bakhasila tawe, Yesu ababoolela ali, “Niise nyindaalila, mukhaba ne buuri tawe.”

²⁸Nio Petero amukobosia ali, “Omwami, waba ne oli ewe loma sesi ngende khu meechi niche niio oli ao.”

²⁹Yesu aloma ali, “Yiicha.” Nio Petero arura mu liaaro akeenda khu meechi acha niio Yesu ali.

³⁰Ne nga Petero abona ekhuungu, aria, mala arakikha khukhwisiikha. Nio alila ali, “Omwami mbonie!”

³¹Oli akhasila tawe, Yesu enaa aamutiila mala aloma ali, “Omundu we lisuubila likeekhe! Siina sikila ne okhali ne lisuubila?”

³²Nga bengila mu liaaro, ne ekhuungu eyenjeela.

³³Babeeka ba baaba mu liaaro basaaya Yesu, ne baloma bali, “Ng'ali khane ewe oli Omwana owa Wele.”

³⁴Nga baba ne bambuukhe enyanja, boola mu sibala sia Kenesareti,

³⁵ne nga babaandu be bweneyo bamanya bali niye, barumania bareere balwaale khukhwama mu ngoongo che eyo choosi khu Yesu.

³⁶Bamwikoonjelela bali balwaale batilekho khwikemo lie ngubo yewe; ne buli owatiilakho aona.