Read lubukusu Mat. 15 Bible Online

Mat. 15 - lubukusu bible

Mat. 15

¹Bafarisayo ne baandiki be Lilaka bama Yerusalemu becha khu Yesu bamureeba bali,

²“Siina sikila babeeka bowo ne bonaka kimiima kie sikuuka? Sikila nibo se basaabanga kamakhono nio balia tawe.”

³Yesu abakobosia ali, “Siina sikila nanywe ne mukharia Lilaka lia Wele mala muloonda kamekisio kenywe?

⁴ Sikila Wele alaka ali, ‘Ria raraao ne maao’, lundi, ‘Oyo okholela raraawe namwe maawe embelekeu akhoya eerwe.’

⁵Ne enywe muloma muli, ‘Kaaba bali omwana yesi yesi aboolela raraawe namwe maawe ali, sisiindu nisio akhoyeele abayeete aelesie Wele, aba se enaana khubaria tawe.’

⁶Khwako, sikila kumwiima kwenywe, mwakhola Elomo eya Wele khuba sisiindu busa.

⁷Babacha enywe! Isaya ang'oola abwene khwinywe, nga ne aloma ali:

⁸ ‘Babaandu bano bamba riria ne kiminwa kiabwe, ne kimiooyo kiabwe kili aleeyi khukhwama khwise.

⁹Bakhola ka busa khu khusaaya ese, bekisia kamalaka ke babaandu busa bali kakaase khana tawe.’ ”

¹⁰Yesu alaanga babaandu becha mala ababoolela ali, “Ulila lundi mumanye,

¹¹se sili siicha mukhanwa sinyaalutia omundu tawe, ne kakhali sisiamamo.”

¹²Nio babeeka bewe becha bamureeba bali, “Ewe omanyile oli Bafarisayo baboone bubi nga baulile niko olomile?”

¹³Yesu abakobosia ali, “Buli simelwa nisio Paapa wase owe mwikulu akhabiaala tawe, silisiuulwa.

¹⁴ Balekhe babe, nibo bali barangirisi babofu. Kaaba bali omubofu arangirira omubofu wasie, boombi balakwa mwiloo.”

¹⁵Ne kakhali Petero amuboolela ali, “Khwinooselie lusimo luno.”

¹⁶Nio Yesu areeba ali, “Akhaba enywe musiili busa mukhamanya tawe?

¹⁷Se mubona muli siosi siosi siicha mukhanwa sioola munda, lundi sirura mu mubili tawe ku?

¹⁸ Ne kakhali sirura mukhanwa siama mu mwoyo, mala sino sikhola omundu aaba omunyaalu.

¹⁹Sikila mu mwoyo kamamo kamebaasio kamabi, bubwiri, bukhobani, bueeyi, bubwifwi, khurusia buloli bwe bubeeyi ne khukiikha.

²⁰Bino nibio binyaalutia omundu khuloondekhana ne Lilaka, ne khulekha khusaaba kamakhono se khunyaalutia omundu tawe.”

²¹Yesu arura ebweeneyo acha mu sibala sia Tiro ne Sidoni.

²²Nio omukhasi Omukanaani owe mu sibala siene esio aulukha arakikha khukhwekoonjelela Yesu ali, “Kholele siisa! Omwami, Mwana owa Daudi, omwana wase omukhaana ali ne sisieeno sirafu.”

²³Ne Yesu se amukobosiakho tawe. Babeeka bewe becha bekoonjelela Yesu ne baloma bali, “Muboolele arekukhe ache eyo, sikila alikho akhuloondelela nalila.”

²⁴Yesu aloma ali, “Ese narumwa khu makheese kakatiba kong'ene, babaandu ba Isiraeli.”

²⁵Ne kakhali omukhasi chana eecha asikama ebweeni wewe aloma ali, “Omwami njeete.”

²⁶Nio Yesu aaloma ali, “Se buli buluungi khubukula kumukaati kwe babaana ne khu mwaatila chimbwa tawe.”

²⁷Omukhasi chana aloma ali, “Ako ka ng'ali, Omwami, ne kakhaba kario chimbwa chana echo chilia bimesu bikwa khukhwama khu mesa che babeenecho.”

²⁸Nio Yesu amukobosia ali, “Mukhasi ewe, lisuubila liowo lili likali po! Kho kholelwe nga wenyile.” Ne omukhaana wewe aona abwene na bwene.

²⁹Yesu aarura ebweeneyo aacha aabirira anyanja eya Kalilaya. Aniina khu sikulu, ekhala aasi.

³⁰Babaandu bakali bamwichakho, ne bamureerera ba balemala, ba bakataala, babofu, ba baanda chinimi ne khureera balwaale babaandi bakali ebweeni wewe; Yesu abaonia.

³¹Nabwila babaandu bauka, nga babona ba baanda chinimi ne balomaloma, ba balemala ne bakeenda, lundi babofu ne babona. Nio baelesia Wele owa Isiraeli luyali.

³²Nio Yesu aalanga babeeka bewe aloma ali, “Ndikho kholela sipupu siisa, sikila khukhwola luno babeele nase chindaalo chitaru, ne se bali na siosi nisio balia tawe, ne se nenya mbaboolele bache ne enjala tawe. Bakhola bario bakwa khu ngila.”

³³Babeeka bewe bamureeba bali, “Mu siangalaamwe sisioomu sino efwe khwamia waena kimikaati kikiola khuliisia sipupu siboofu siri?”

³⁴Yesu aabareeba ali, “Muli ne kimikaati kinga?” Baloma bali, “Kimikaati saba ne ching'eeni chindiiti ngekhe chiri.”

³⁵Aaboolela sipupu khukhwikhala aasi mu maloba.

³⁶Aabukula kimikaati saba ne ching'eeni, aapa orio aakimesula aelesia babeeka, mala babeeka nabo bakaba bipupu.

³⁷Boosi balia, bekura; mala babuusia bimesu bibiaramirakho biechula bikono saba.

³⁸Abo babalia baba chielefu chine, nokhabaliilekho bakhasi ne babaana tawe.

³⁹Yesu aasibula babaandu khucha, ne omwene aniina mu liaaro aacha mu sibala sia Makadani.