Read lubukusu Mat. 16 Bible Online

Mat. 16 - lubukusu bible

Mat. 16

¹ Mala Bafarisayo ne Basatukayo bacha khu Yesu ne khumukhaka, bamusaba abekesie kamayia kakaama mwikulu.

²Yesu aabakobosia ali, “Biise bie ekolooba, muloma muli, ‘Enje yalengaalile; sikila likulu liabeseeme.’

³Ne oli kumutikhinyi muli, ‘Luno efula eye embembeesi elakwa, sikila likulu liabeseeme, lundi liriisia.’ Mwamanyilisia niko efwaani eye likulu yekesia, ne se mumanyile kamayia ke siise sino tawe![5]

⁴ Eselukho emayaanu, ekharia Wele, yenya kamayia. Ne kamayia se kalikhoo ne kakhali ka Yona tawe.” Khwako abalekha acha.

⁵Babeeka nga boola engelekha baba bebiliile khusuta kimikaati.

⁶ Yesu ababoolela ali, “Mulole bulayi lundi mumanye khukhweliinda khukhwama khu limela lie Bafarisayo ne Basatukayo.”

⁷Nio baloma bali, “Aloma kano sikila se khusutilekho kumukaati kwosi kwosi tawe.”

⁸Ne kakhali Yesu amanya niko balikho, abareeba ali, “Enywe baandu be lisuubila litiiti, siina sikila ne mulomaloma muli se mulikho ne kumukaati tawe?

⁹ Mukhamanyanga tawe? Se mukhebulila kimikaati kiraano nikio namesulemo kialiisia babaandu chielefu chiraano tawe? Ne mwabuusiisie bimesu bikono biinga?

¹⁰ Ne kimikaati saba khu baandu chielefu chine nakio? Ne mwabuusiisie bimesu bikono biinga?

¹¹Kanyalikha kariena enywe khukhilwa khumanya muli se nalomanga ke kumukaati tawe? Yeliinda khukhwama khu mamela ke Bafarisayo ne Basatukayo.”

¹²Nio bamanya bali se ababoolela khukhwiyaya khukhwama khu mamela ke kumukaati tawe, ne kakhali khukhwama khu mekisio ke Bafarisayo ne Basatukayo.

¹³Yesu oola mu sibala sia Kaesarea-filipi aareeba babeeka bewe ali, “Babaandu baloma bali Omwana wo Mundu ali naanu?”

¹⁴ Bakobosia bali, “Balala baloma bali ali Yoana Omubatiisi, babaandi bali Elicha, ne babaandi bali Yeremia namwe mulalakho khu bang'oosi.”

¹⁵Aabareeba ali, “Ne enywe muloma muli ese ndi naanu?”

¹⁶ Simoni Petero aakobosia ali, “Ewe niwe Kristo, Omwana owa Wele omenyile mindali.”

¹⁷Yesu aamukobosia ali, “Oli ne khabi ewe, Simoni okhwa Yona! Sikila omundu se akhubuuliile kano tawe, nakhali Paapa wase oli mwikulu.

¹⁸Khwako Petero ese khuboolela, ewe oli lulwanda, khu lwanda luno ndiombakhakho e kanisa yase, mala bunyali bwe lifwa se buli kiula tawe.

¹⁹ Ndikhuelesia chifunguo che bubwami bwe mwikulu, ne siosi siosi nisio okaania khu sibala sikanisibwa mwikulu, lundi siosi siosi nisio ofukiilila khu sibala sifukiililwa mwikulu.”

²⁰Nio Yesu akaania babeeka lukali ali bakhaboolela omundu yesi yesi bali ali Kristo tawe.

²¹Khukhwamila siise sienesio Yesu aarakikha khuboolela babeeka bewe abuwaanga ali, “Khukhwola ese nje e Yerusalemu mala khupwe siibi lukali khukhwama khu bemeelesi, basaayi bakhulu ne babekisia be Lilaka. Kheerwe, ne kakhali enyuma we chindaalo chitaru khalamukhe.”

²²Nio Petero amulaanga alubeka arakikha khumurafwira, naloma ali, “Omwami, Wele akhiingilile kano! Kano se kalikholekhakho khwiwe tawe!”

²³Ne Yesu ayuukha mala aboolela Petero ali, “Sietani, kobola enyuma wase! Sikila kamebaasio kowo kano se kaama khu Wele tawe kaama khu mundu busa.”

²⁴ Nio Yesu aboolela babeeka bewe ali, “Yaaba bali omundu yesi yesi enya anoonde lekha ekaane omwene mala etiuukhe kumusalaba kwewe anondekho.

²⁵ Lundi yesi yesi owenya khuonia bulamu bwewe alibutibia, ne yesi yesi otibia bulamu bwewe sikila ese alibunyoola.

²⁶Omundu anyoola bukhala siina, aaba bali anyoola sibala sioosi mala atibie bulamu bwewe? Se anyoolamo siindu tawe! Se siliio nisio anyala aana khunyoola bulamu bwewe lundi tawe.

²⁷ Omwana wo Mundu akheeche ne malaika bewe mu luyali lwa Raraawe, mala aruunge buli mundu khuloondekhana ne bikholwa biewe.

²⁸Ng'ali ese muboolela enywe ndi, bali ano balala se bakhachanjamekho lifwa ne bakhaabona Omwana wo Mundu ne echa mu Bwami bwewe tawe.”