Read lubukusu Mat. 18 Bible Online

Mat. 18 - lubukusu bible

Mat. 18

¹ Siise esio babeeka becha khu Yesu, bamureeba bali, “Naanu omukali khukhila boosi mu Bwami bwe mwikulu?”

²Yesu alanga omwana, amwimia akari wabwe,

³ mala aaloma ali, “Muboolela bung'ali, ne mukhakaluukhana mwaba nga babaana, se mulingilakho mu Bwami bwe mwikulu tawe.

⁴Yesi yesi oweboombia aaba nga omwana yuno, niye oli omukali mu Bwami bwe mwikulu.

⁵Yesi yesi owakaanila omwana mulala nga yuno ari, mwisina liase aba anjakaniile ese.

⁶“Ne yesi yesi okila mulala khu batiiti babasuubila ese bano bakhola bubwoni, buli bulayi khukhila khu niye khurwa lususi luboofu mwikosi mwewe ne khusiikhwa mu lusiba lwe nyanja.

⁷Silaamo sili khu sibala sikila kamakhako ke khukhola bubwoni! Khukhwola kamakhako kabeo, ne kakhali omundu oreera kamakhako ako ali ne silaamo.

⁸ “Kaaba bali kumukhono kwowo namwe sikele siowo, sikila ewe wakhola bubwoni, sikhale mala osimwaate eyo; buli bulayi khukhwingila mu bulamu ne oli ne sikhuumbu namwe ne walemala khukhila khuba ne kamakhono koombi namwe ne bikele bioombi mala omwaatwe mu mulilo kwa mindali.

⁹ Lundi kaaba bali emoni yowo ekila wakhola bubwoni, kitomole mala okimwaate eyo; buli bulayi khwiwe khukhwingila mu bulamu ne moni ndala khukhila ne chimoni chombi mala omwaatwe emakoombe mu mulilo kwa mindali.

¹⁰“Mukhalekelesiakho mulala khu batiiti bano tawe. Sikila muboolela enywe ndi mwikulu malaika babwe busiele bali ebweeni wa Paapa wase we Mwikulu. [

¹¹ Sikila Omwana wo Mundu echa khuonia babatiba.][7]

¹²Mwibaasia muli siina? Omundu aaba ne kamakheese emia, mala lilalakho liatiba, salekha kamakhumi tisa na tisa mumaayilwe mu bikulu mala acha khuyiima lilala litibile elio tawe ku?

¹³Ng'ali muboolela ndi, nalinyoolile aliekhoyela khukhila kamakhumi tisa na tisa kakhatibile tawe.

¹⁴Bulayi bwene se lili lilienya lia Paapa oli mwikulu mulala khu bakeekhe bano atibe tawe.

¹⁵ “Kaaba bali wandaayo akhukholela kamabi cha omuboolele kamabi kewe; ne muli babili mweng'ene. Kaaba bali akhuulila, aba wamuoniisie.

¹⁶ Ne nakhakhuulila tawe, cha no mundu mulala namwe babili, nio buli likhuwa liaandalasibwe ne buloli bwe babaandu babili namwe bataru.

¹⁷Kaaba bali aloba khubaulila, boolela e kanisa yoosi. Ekhumaliilikha nakhaulila ke kanisa tawe, mubukule nga omundu okhamanyile Wele tawe, namwe orosiaanga busuuru.

¹⁸ “Ng'ali muboolela ndi, siosi siosi nisio mukaania khu sibala aba siakaanisiibwe mwikulu, lundi siosi siosi nisio mufukiilila khu sibala siafukiiliilwe mwikulu.

¹⁹“Lundi muboolela ndi, kaaba bali babili khwinywe mufukiilisiana khu sibala khu siindu siosi siosi nisio musaba, mulakholelwa murio ne Paapa wase we mwikulu.

²⁰Sikila niio babili namwe bataru bebuusiisie mwisina liase, aba ndi nabo abwenao.”

²¹ Nio Petero echa khu Yesu aamureeba ali, “Omwami, wandaayase akholela bubwoni khenga ne mubeela? Kamakhabi saba?”

²²Yesu amukobosia ali, “Se khuboolela ndi khukhwola kamakhabi saba tawe, ne kakhali kamakhabi kamakhumi saba khukhwola saba.[8]

²³Khwako Bubwami bwe mwikulu bunyala khulekhasibwa no mwami owenya khumenieelesia bitabu bie chirupia bie bakholi bewe.

²⁴Nga arakikha khubala, mulala aareerwa khu niye owaba ne likobi lie chirupia chimilioni chingali,

²⁵ne nga nilwo akhanyala khuruunga tawe, Omwami wewe aalaka ali akusibwe, alala no mukhasi wewe ne babaana bewe nende nibio aba nabio bioosi, likobi liruungwe.

²⁶Nio omukholi oyo aamukwa mu bikele ne khumwikoonjelela ali, ‘Omwami kholele siisa khakhuruunge choosi!’

²⁷Omwami amukholela siisa, amubeela likobi aamulekhuula acha.

²⁸“Ne kakhali omukholi chana oyo, nga ne aarura enje, aanyoola mulala khu bakholi basie owaba ne likobi liewe lie chirupia emia, aamutiila enjasi ne aloma ali, ‘Nduunge likobi liase.’

²⁹Nio omukholi wasie oyo aamukwa mu bikele amwikoonjelela ali, ‘Kholele siisa, khakhuruunge choosi!’

³⁰Aaloba, mala aacha aamura niye mu siboe nabwila nga akharuunge likobi elio.

³¹Nga bakholi basie babona bario babiililwa lukali, mala bacha baboolela omwami wabwe kakakholekha.

³²Nio omwami wewe aamulaanga amureeba ali, ‘Ewe omukholi omumayaanu! Khubeleele likobi liowo lioosi sikila unjikoonjelele!

³³Ne ewe nawe andi sokholeele omukholi wasio siisa nga sesi ne khukholeele?’

³⁴Omwami wewe aambwa lirima amumwaata mu cheela, nabwila aliruunga likobi liewe lioosi.”

³⁵Nio Yesu amaliilisia ali, “Akhaba Paapa wase owe mwikulu alikholela ario buli mulala khwinywe, kaaba bali se mubeela bawandaayenywe khukhwama mu miooyo kienywe tawe.”