Read lubukusu Mat. 19 Bible Online

Mat. 19 - lubukusu bible

Mat. 19

¹Nga Yesu ne amala khuloma kamakhuwa ako arura Kalilaya acha mu sibala sie Buyuda engelekha we luluuchi lwa Yoritani.

²Mala babaandu bakali bamuloondakho, abaoneseliayo.

³Bafarisayo bamwichakho bamukhaka mu khumureeba bali, “Lilaka liefwe lifukiilila omundu khulekhana ne omukhasi wewe khulwe sifuno siosi siosi ku?”

⁴ Yesu aabakobosia ali, “Mukhasomakho liiandike liboola lili mukhurakikha Wele Omubuumbi abuumba omuseecha no mukhasi tawe?

⁵ Mala aloma ali, ‘Sikila sifuno sino omundu alalekha raraawe ne maawe mala aambaane no mukhasi wewe, mala boombi babe sisiindu silala.’

⁶Khwako se basiili babili lundi tawe, ne khali ali mulala. Khwako nisio Wele aambasiisie, omundu yesi yesi akhaukhasia tawe.”

⁷ Bamureeba bali, “Nono siina sikila Musa ne aana lilaka omundu khuelesia ebarwa eye khulekhana khu mukhasi wewe mala amulekhe?”

⁸Yesu aabakobosia ali, “Musa amufukiilila enywe khuoona bakhasi benywe sikila mwaluma emirwe, ne se kaba kario khukhwama mu khurakikha tawe.

⁹ Ne ese muboolela enywe ndi, yesi yesi oona omukhasi wewe, ne bukhali sikila bueeyi, mala aareera omukhasi okundi aba akhola bueeyi. Lundi oreera niye baoona, aba akhola bueeyi.”

¹⁰Babeeka bamuboolela bali, “Kamakhuwa ko museecha no mukhasi wewe kaaba ne kali kario aba se buli bulayi khureera omukhasi tawe.”

¹¹Yesu aabakobosia ali, “Se bali babaandu boosi banyala khufukiilila liliekisia lino tawe, ne kakhali nibo Wele ekhelamo bong'ene.

¹²Sikila baliio bachili babasaalwa bario, lundi baliio bachili nibo babaandu bakhola baba bario, lundi babaandi baliio babekhola babeene bachili sikila Bubwami bwe Mwikulu. Lekha oyo ofukiilila kamekisio kano akhole ario.”

¹³Babaandu balala bareera babaana khu Yesu ne khubasabila ne kakhali babeeka barafwira babaandu abo.

¹⁴Yesu aloma ali, “Lekha babaana beche mukhabakhiingilila tawe, sikila Bubwami bwe mwikulu buli bwabo baali nga babaana bano.”

¹⁵Aabarakho kamakhono kewe mala aarekukha.

¹⁶Omundu mulala echa, khu Yesu areeba ali, “Omwekisia, khola sikholwa siina silayi, nio nyoole bulamu bukhawa tawe?”

¹⁷Yesu aamukobosia ali, “Siina sikila ewe ne undeeba khuloondekhana nende sikholwa silayi? Aliio Mulala yeng'ene oli omulayi. Ne wenya khukhwingila mu bulamu, tiila kamalaka ka Wele.”

¹⁸ Omusoleeli chana aamureeba ali, “Malaka siina?” Yesu amukobosia ali, “Okhachukha sifuki tawe, okhakhola bueeyi tawe, okheeba tawe, okhakiikhila owasio tawe,

¹⁹ ria raraao ne maao, lundi siima owasio nga ne wesiima wamwene.”

²⁰Omusoleeli chana amukobosia ali, “Kamalaka kano koosi naloonda, siina nisio mbombelelwa?”

²¹Yesu amuboolela ali, “Ne wenya khuba owolaana, cha okusie bioosi nibio oli nabio mala oeleesie bataambi chirupia, mala wiche unondekho ne olanyoola buiinda mwikulu.”

²²Nga omusoleeli oyo ne aulila ario arekukha na abiiliilwe, sikila aba ne kimiaandu kimikali.

²³Nio Yesu aboolela babeeka bewe ali, “Ng'ali ese muboolela enywe ndi, buliba butinyu khu muyiinda khukhwingila mu Bwami bwe mwikulu.

²⁴Lundi muboolela enywe ndi, lili liliangu khu ngamia, khubirira mu mwanya kwe sindani khukhila omuiinda khukhwingila mu Bwami bwa Wele.”

²⁵Nga babeeka baulila kano bauka lukali, ne bareeba bali, “Naanu aba onyala aonisibwa?”

²⁶Yesu asuta chimoni abalola mala ababoolela ali, “Khu baandu kano se kali kanyalikha tawe, ne kakhali khu Wele bibiindu bioosi bili binyalikha.”

²⁷Nio Petero aakobosia ali, “Lola khwalekha bibiindu bioosi, mala khwakhuloondakho. Khukhanyoole siina?”

²⁸ Yesu aabakobosia ali, “Ng'ali ese muboolela ndi, mu siise sisiicha, nga Omwana wo Mundu alikhala khu ndebe yewe eye bubwami eye luyali lwewe, enywe babeeka base nanywe mulikhala khu ndebe che bubwami ekhumi na chibili, ne mukhalakila Chikholo cha Isiraeli ekhumi na chibili.

²⁹Yesi yesi olekhile chinju chewe namwe bawandaaye be siseecha nende be siikhasi, namwe raraawe ne maawe, namwe babaana namwe kamaloba, sikila lisina liase, alibinyoola bikali khukhwola emia ndala, mala abe bulamu bukhawa tawe.

³⁰ Ne kakhali bakali babanyoa, balimaliilikha, ne bamaliilisi balinyoa.