Read lubukusu Mat. 2 Bible Online

Mat. 2 - lubukusu bible

Mat. 2

¹Yesu nga ne asaalwa mu lukoba lwa Betelehemu e Buyuda mu ndaalo cho mwami Herodi, babaandu bakesi baama ebukwe becha Yerusalemu, ne bareeba bali,

²“Omwana osaalilwe khuba Omwami owe Bayaudi ali waena? Sikila khwaboone eng'enieesi yewe ebukwe, mala khwechile khumusaaya.”

³Nga omwami Herodi aaulila kano, eendekhelela, akhaba be mu Yerusalemu boosi.

⁴Abuusia basaayi bakhulu ne baandiki be Lilaka boosi, khukhwenya khumanya niio Kristo alisaalilwa.

⁵Nio bamukobosia bali, “Mu Betelehemu, lwe Buyuda, sikila kano niko omung'oosi aandika,

⁶ ‘Ne ewe, Betelehemu, mu sibala sia Yuda, se olaba omutiiti mu ngoba che Buyuda tawe, sikila omuruki okhaame mwiwe akhaaye babaandu base Isiraeli.’ ”

⁷Nio Herodi alaanga bakesi abo mu bwikisi amanyila elala khukhwama khu nibo siise nisio eng'enieesi yabonekha;

⁸mala aabaruma Betelehemu, aabalaka ali, “Khemuche muenje omwana oyo bulayi, ne mumalile khumunyoola mundereere likhuwa nio sesi nje musaaye niye.”

⁹Nga bamala khuulila ko mwami, barekukha bacha; oli basiili, babona eng'enieesi niyo babona ebukwe yarangiire, yecha yema abuundu niio omwana aba.

¹⁰Ne nga babona eng'enieesi chana eyo basangaala, bekhoya lukali po,

¹¹oli bengila munju, babona Omwana ne maawe Maria; basaaya omwana ne khukangulula chioochwa chabwe, bamuturira esahabu ne bimuli bie kumuuya kumulayi nende manemane.

¹²Nio Wele aabakaania mu marooro ali bakhakobola wa Herodi tawe, barekukha bela mu sibala siabwe, khubirira khu ngila ekiindi.

¹³Baba oli bamalile khurekukha, malaika owa Wele Omunyali Owa Bioosi abonekhela Yosefu mumarooro aaloma ali, “Yinyokha obukule Omwana ne maawe, wilukhile e Misiri, mala omenyeyo nabwila ndikhureerera likhuwa, sikila Herodi alikhuyiima omwana enya khumwiira.”

¹⁴Yosefu enyokha siilo aabukula Omwana ne maawe, acha e Misiri.

¹⁵ Bamenyayo nabwila Herodi afwa. Kano kaba kario khukhwichusia niko Omwami aboola khubirira mu Mung'oosi ali, “Nalaanga Omwana wase arure e Misiri.”

¹⁶Herodi nga amanya ali bakesi chana abo bamubachile, aba ne lirima likali, abisia lilaka lie khukhwira babaana be siseecha boosi be bukhulu bwe kimiiko kibili khukhwila aasi mu Betelehemu, ne birekere biili siimbi nalwo, khukhwamila khu siise nisio amanyilamo bung'ali khukhwama khu bakesi chana abo khuloondekhana ne siise nisio eng'enieesi yabonekhelamo.

¹⁷Nio niko omung'oosi Yeremia aaloma kekholekha,

¹⁸ “Kumumilo kuuliilikha mu Rama, ne bililo birafu ne khusooma. Raeli alila babaana bewe, alobile khuolelesibwa, sikila boosi babunile.”

¹⁹Nga Herodi ne afwa, malaika wo Mwami abonekhela Yosefu mu marooro e Misiri, amuboolela ali,

²⁰“Yinyokha obukule Omwana ne maawe, okobole mu sibala sia Isiraeli, sikila abo babenyanga khukhwira Omwana bafwa.”

²¹Nio Yosefu enyokha abukula omwana ne maawe, mala bakobola mu sibala sia Isiraeli.

²²Ne nga Yosefu aulila bali Akelasi aamiie e Buyuda mu bweyaangu bwa raraawe Herodi, aria khucha ebweeneyo, nga nilwo aboolelwa mu marooro, akobola mu sibala sia Kalilaya.

²³ Khwako acha khumenya mu lukoba lwa Nasareti, nio kakaboolwa ne bang'oosi kechusibwe bali, “Alilaangwa Omunasareti.”