Read lubukusu Mat. 20 Bible Online

Mat. 20 - lubukusu bible

Mat. 20

¹“Bubwami bwe mwikulu buli nga omwene enju owauuna makhelebeende khuboolana ne babaandu khumukholela kumulimo mwiruuti lie kimisabibu.

²Enyuma we khufukiilisiana ne bakholi bene abo chirupia che kumuruungo kwe ndaalo, aabayila mwiruuti liewe.

³“Lundi oli acha khu soko embi mu saa eya khataru aabona babaandi bemilekho busa,

⁴nabo aababoolela ali, ‘Enywe mweesi khemuche mwiruuti, ne ndamuruunga siosi siosi sisiolaana.’

⁵Khwako bacha. Nio lundi khu saa eye mwiangilwe nende eya tisa, akhola ario.

⁶Embi khu saa eye khumi na ndala acha lundi mala anyoola babaandi bemile, mala aabareeba ali, ‘Siina sikila enywe ne mwimile busa endaalo yoosi?’

⁷Bamukobosia bali, ‘Sikila se aliio yesi yesi okhulangiile kumulimo tawe.’ Aababoolela ali, ‘Nono, ne kali kario, khemuche mukhole mwiruuti liase.’ ”

⁸ “Oli ekolooba omwene liruuti aaboolela omwimeelesi ali, ‘Laanga bakholi obaruunge khurakikhira khwaabo bamaliilikhe, khukhwola khu banyoilemo.’

⁹Nga babalaangwa khukhola kumulimo embi esaa eye khumi na ndala becha, buli mulala khu nibo anyoola kumuruungo kwe ndaalo ndala.

¹⁰Oli be bweeni becha bebaasia bali wakana balanyoola chingali khukhilakho, ne kakhali buli mulala khu nibo boosi anyoola kumuruungo kwe ndaalo ndala.

¹¹Nga bakunyoola bakaamba ne khukhweng'ulung'unyila omwene liruuti,

¹²baloma bali, ‘Bamaliilisi bano bakholile esaa ndala yong'ene, mala ewe walekhasiisie kumuruungo kwabwe ne kukwefwe, efwe khukhwekhaliilikhe kumuumu kumurafu khukhola kimilimo kie ndaalo.’

¹³Naye aakobosia mulala khu nibo ali, ‘Omusaale, ese se ndikho khukholelakho kamakhiikha kosi kosi tawe, se khufukiilisiane nawe kumuruungo kwe ndaalo ndala?

¹⁴Nono bukula bibiowo oche, ndoboore khuelesia omumaliilisi yuno nga khuelesie ewe.

¹⁵Se ndi ne bulekhuule khurumikhira bibiase nga nenya tawe ku? Namwe okhendekha sikila buaani bwase bukali?’ ”

¹⁶ Nio Yesu atabusia ali, “Khwako bamaliilisi baliba be khunyoa ne be khunyoa balimaliilikha.”

¹⁷Nga Yesu ne aba nacha Yerusalemu, alaanga babeeka bewe ekhumi na babili alubeka mala alomaloma nabo nga yaba ne balikho bakeenda.

¹⁸Ababoolela ali, “Rekeeresia, khulikho khucha khwoole Yerusalemu; niio Omwana wo Mundu alareebwa mu makhono ke basaayi bakhulu ne babekisia be Lilaka, balamukhalakila lifwa,

¹⁹mala bamwakaanisie khu Be Chikholo achekhwe ne khu khupwa biboko ne khukhwirwa khu musalaba ne kakhali enyuma we chindaalo chitaru akhalamukhe.”

²⁰Nio mukha Sebetayo echa ne babaana bewe khu Yesu, asikama ebweeni wewe asaba Yesu amukholele sisiindu.

²¹Yesu amureeba ali, “Wenya siina?” Aamukobosia ali, “Ndakiilisie oli babaana base babili bano balikhala mulala kumukhono kwowo kumuseecha ne okundi kumukhasi mu Bwami bwowo.”

²²Ne kakhali Yesu amukobosia ali, “Se mwamanyile nisio mulikho musaba tawe. Enywe munyala khunywa sikoombe sie buchuuni nisio ese ndi siimbi khunywa?” Bakobosia bali, “Yee, khunyala.”

²³Yesu abakobosia ali, “Ng'ali mulanywa sikoombe siase, ne kakhali se kali kakaase khufukiilila mwikhale amukhono kwase kumuseecha namwe kumukhasi tawe, ne kakhali abuundu ao ali e babaandu nibo Paapa wase arekekhera.”

²⁴Ne nga babaandi likhumi abo ne baulila, babonela babili abo bubi.

²⁵ Ne kakhali Yesu aabalaanga boosi alala becha niio ali mala ababoolela ali, “Mumanyile muli baruki Be Chikholo bekesianga kamaani khu nibo bamiia, lundi babemeelesi bali ne bunyali khu nibo.

²⁶ Se kali kario khwinywe tawe. Mulala khwinywe aaba ne enya khuba omukali, khukhwola abe omukholi we babaandi;

²⁷ne yesi yesi owenya khuba owe bweeni khwinywe akhoya anyoe abe nasioobi wenywe,

²⁸bulayi bwene nga Omwana wo Mundu akheecha khukholelwa tawe, ne kakhali khukhalabanila babaandi ne khuaana bulamu bwewe khulwe khuonia bakali.”

²⁹Nga Yesu ne babeeka bewe baba ne bama mu Yeriko, babaandu bakali babaloondakho.

³⁰Babofu babili ba baaba ne bekhaale khundulo khwe ngila nga baulila bali Yesu alikho abira, bayokela bali, “Mwana owa Daudi khukholele siisa!”

³¹Babaandu babarafwira, ne khu baboolela basile; ne kakhali batasa khuyokela ne baloma bali, “Omwami, Mwana owa Daudi khukholele siisa!”

³²Nio Yesu eema, mala aabalaanga, ne khubareeba ali, “Enywe mwenya mukholele siina?”

³³Bamukobosia bali, “Omwami khola chimoni chefwe chibone!”

³⁴Yesu aabakholela siisa aatiila khu moni chabwe mala abwene ne abwene babona mala bamuloondakho.