Read lubukusu Mat. 21 Bible Online

Mat. 21 - lubukusu bible

Mat. 21

¹Nga Yesu ne babeeka bewe baba siimbi khwoola Yerusalemu boola Betifake khu Sikulu sia Miseituni. Yesu aruma babeeka babili ebweeni

²ababoolela ali, “Cha mu sirekere sie ataayi esio, ne mwolilemo kane mubone epunda yaboilwe, ne ng'ana alubeka; chikangulule chombi mundeerere.

³Yesi yesi oloma siindu khwinywe, muboolele muli, ‘Omwami achenya’ ne alachilekhuula khangu.”

⁴Kano kekholekha nio niko omung'oosi aaloma kechusibwe,

⁵ “Boolela lukoba lwa Sayuni, lola, omwami wowo alikho echa khwiwe! Omuolu, mala ekhaale khu punda, eng'ana eye punda.”

⁶Nio babeeka bacha bakhola nga Yesu abalaka,

⁷bareera epunda ne ng'ana, bakialakho chingubo chabwe mala Yesu akiikhalakho.

⁸Babaandu bakali baala chingubo chabwe khu ngila, ne babaandi babuta kamasaafu khukhwama khu mirongooro baara khu ngila.

⁹ Babaandu bakali ba barangira ebweeni wewe ne babaandi baba enyuma wewe, bemba bali, “Efuma ebe khu mwana wa Daudi! Omwami Wele abiita chikhabi oyo owicha mwisina lio Mwami! Wele afume.”

¹⁰Nga Yesu engila mu Yerusalemu, lutiri lwaba mu lukoba, babaandu bareeba bali, “Naanu niye?”

¹¹Babaandu bakali abo bakobosia bali, “Yuno ali Yesu omung'oosi owama Nasareti e Kalilaya.”

¹²Yesu engila mu Lukaangu mala atimania boosi ba baaba ne bakusia ne baakula, afumalikhaka chimesa che babaandu bafunja chirupia ne chindebe chabo babakusianga kamauusi kamabaya,

¹³ ababoolela ali, “Kaandikwa kali, Wele aaloma ali, ‘Enju yase elilaangwa enju eye lisaba.’ Ne kakhali enywe mwakikholile libina lie banuuli!”

¹⁴Babofu ne baleme becha niio ali mu Lukaangu mala aabaonia.

¹⁵Ne kakhali nga basaayi bakhulu ne baandiki ne babona bibiindu bie khuukia nibio akhola, ne babaana khukhwimba mu Lukaangu bali, “Omwana wa Daudi afume!” Baambwa lirima.

¹⁶ Nio bareeba Yesu bali, “Olaulilanga niko baloma?” Aabakobosia ali, “Yee nauliile, enywe mukhasomakho liiandiko liboola lili, ‘Weyikia babaana batiiti ne banuuna khuaana efuma eya ng'ali’ tawe ku?”

¹⁷Nio Yesu abalekha, arura enje we lukoba acha Betania akonelayo.

¹⁸Nga Yesu aba ne akobola mu Yerusalemu enje ne busiele, enjala yamulia.

¹⁹Oli abona kumutuli ao, achao mala khunyoolakho enduli yosi yosi tawe, ne kakhali kamasaafu kong'ene. Nio akulaama ali, “Chinduli chikhaamakho khwiwe lundi tawe!” Ne kumutuli kuniala abwene ne abwene.

²⁰Nga babeeka ne babona kano bauka, mala bareebana bali, “Kumutuli chana kwomile khangu busa kuriena?”

²¹ Nio Yesu aabakobosia ali, “Ng'ali ese muboolela enywe ndi, mwaba ne lisuubila mala mwalekha khuba ne liaayaaya tawe, munyala mwakhola niko ese kholile khu murongooro kuno. Ne se kali kano kong'ene tawe, ne kakhali munyala mwaboolela sikulu sino muli, ‘Yinyokha oche mu nyanja,’ mala siacha.

²²Ne muli ne lisuubila mulanyoola siosi siosi nisio musaba.”

²³Yesu akobola mu Lukaangu, ne nga aba ne ekisia, basaayi bakhulu, ne babemeelesi, becha mala bamureeba bali, “Bunyali siina nibwo olikho okholelamo bibiindu bino, lundi naanu owakhuelesia bunyali bwene obu?”

²⁴Yesu abakobosia ali, “Ese sesi ndamureeba lireeba lilala, ne mungobosia aba sesi ndamuboolela bunyali nibwo kholelamo bibiindu bino.

²⁵Yoana amia waena bunyali bwe khubatiisia, bwama khu Wele namwe khu baandu?” Nio bayingana babeene ne babeene bali, “Kaaba bali khuloma khuli, ‘Khukhwama khu Wele,’ alaloma ali, ‘Siina sikila ne mukhamusuubila tawe?’

²⁶Lundi ne khuloma khuli, ‘Khukhwama khu baandu,’ khuli ne buuri khu niko babaandu banyala bakhola sikila boosi bamanya bali Yoana aba omung'oosi.”

²⁷Nio bakobosia Yesu bali, “Se khumanya tawe.” Yesu ababoolela ali, “Sesi se muboolela bunyali siina nibwo kholelamo bibiindu bino tawe.

²⁸“Nono, enywe mwibaasia siina? Omundu aba ne babaana bewe basoleeli babili, acha khu mukhulu aaloma ali, ‘Mwana wase, luno cha okhole kimilimo mwiruuti lie kimisabibu.’

²⁹Omwana oyo amukobosia ali, ‘Se nja tawe’; ne kakhali akelao ebiiya mala aacha.

³⁰Lundi raraawabwe chana aacha khu owe khabili aloma niko aboolele omukhulu, omukeekhe aaloma ali, ‘Yee Paapa ndacha,’ ne kakhali se acha tawe.

³¹Mulala siina khu babili abo owakhola lilienya lia raraawe?” Bamukobosia bali, “Omukhulu.” Yesu aababoolela ali, “Ng'ali ese muboolela enywe ndi, baroosia busuuru ne bakhobani balikho bacha mu bwami bwa Wele enywe ne mu siili.

³² Sikila Yoana Omubatiisi echa mwinywe amwekesia engila eye buluungi, ne se mwamusuubila tawe, ne kakhali baroosia busuuru ne bakhobani bamusuubila, akhaba nga ne mwabona kano, se mwakelao mwekanila mala mwamusuubila tawe.”

³³ Yesu ababoolela ali, “Ulila lukano luluundi. Abao omwene liruuti owabiaalamo kimisabibu asira lumako alibotookhelesia, ayabamo liloo lie khukhamululilamo endali, araamo endeleelwa, mala aelesia liruuti chana bakholi khuliamo, mala acha mu sibala sisiindi.

³⁴Nga siise sie khubuta chisabibu siola, aaruma nasioobi bewe khucha khu bakholi abo anyoole sikelo siewe.

³⁵Bakholi chana bebwaakala nasioobi bewe, baapa mulala, beera okundi, mala baapa okundi kamabaale.

³⁶Lundi aaruma nasioobi babaandi bakalikho khukhila bataayi, mala bakholi babakholela busa bosi bario.

³⁷Ekhumaliilikha aruma omwana wewe omusoleeli ne ebaasia ali, ‘Ng'ali balaria omwana wase.’

³⁸Nga bakholi abo ne babona omwana chana baboolana bali, ‘Yuno ali omwana wewe, yiicha khumwire nio efwe khukiilekho!’

³⁹Nio bamutiila bamuyiila enje we liruuti, bamwiira.”

⁴⁰Nio Yesu abareeba ali, “Khwako nga omwene liruuti nalikobola alikhola bakholi abo ariena?”

⁴¹Bamukobosia bali, “Aliira babaandu bamayaanu abo mala aelesie liruuti elio bakholi babaandi balimuelesia sikelo siewe mu siise sikhoyela.”

⁴² Yesu ababoolela ali, “Enywe mukhasoma mu maandiko kaloma kali, ‘Libaale nilio babombakhi baloba, liliene ne liene liabeele lie mu koona. Likhuwa lino liakholwa no Mwami; lola nga lili lie khuukia mumoni chefwe.’

⁴³“Khwako ese muboolela enywe ndi, mulinuulwa bubwami bwa Wele buebwe khu kholo ekhola bikholwa bibiolaana nabwo.” [

⁴⁴Ne yesi yesi okwa khwibaale lino alifunakwa mu bitonyi; ne ne liakwa khu mundu yesi yesi limutubundulaka.] [9]

⁴⁵Nga basaayi bakhulu ne Bafarisayo baulila chingano chewe, bamanya bali alabalomanga nibo.

⁴⁶Ne kakhali nga bakhaka khumuaamba, baria babaandu bakali, sikila babaandu bamanya bali Yesu aba omung'oosi.