Read lubukusu Mat. 22 Bible Online

Mat. 22 - lubukusu bible

Mat. 22

¹Lundi Yesu aaloma nabo mu ngano ali,

²“Bubwami bwe mwikulu bunyala khufwaananisibwa khu mwami owakhola naikara eye siselelo sio omwana wewe omusoleeli.

³Mala aruma bakholi bewe khulaanga bakeni beche mu naikara eye siselelo esio, ne kakhali se becha tawe.

⁴Lundi aruma bakholi babaandi ne aloma ali, ‘Boolela bakeni muli, nang'oonile siakhulia, chieeyi chase ne chiunwa chinefu chakhonyilwe, mala narekeekhe buli siindu, khemwiche mu naikara eye siselelo sino.’

⁵Ne kakhali belekela busa mala buli mundu echiila khu kiewe, mulala e mukuunda, okundi khukusia,

⁶ne babaandi boosi batiila bakholi bewe babaapa ne khubeera.

⁷Omwami oyo aambwa lirima likali, mala aruma banamae bewe bacha babunia babeeri abo, lundi bosia lukoba lwabwe.

⁸Nio alaanga bakholi bewe ababoolela ali, ‘Narekeekhe naikara eye siselelo, ne kakhali balangiilwe se bolaana tawe.

⁹Khwako khemuche khu ngila chimbalaayi, mulaange yesi yesi niye mwakaanana beche mu naikara.’

¹⁰Mala bakholi abo barura bacha mu chingila chimbalaayi babuusia boosi nibo banyoola, babi ne balayi sitube nabwila enju eye siselelo yechula bakeni.

¹¹“Nga omwami engila munju khubonana ne bakeni abonamo omundu okhaba ne ngubo eye siselelo tawe.

¹²Mala amureeba ali, ‘Musaale, ewe wingiile muno oriena nokhali ne ngubo eye siselelo tawe?’ Omundu oyo atamba niko aloma.

¹³ Mala omwami aboolela bakholi ali, ‘Muboe kamakhono ne bikele, mala mumumwaate mu siilima enje. Ebweeneyo alilila ne khukhwelumakaka.’ ”

¹⁴Nio Yesu atabusia ali, “Bakali balaangwa ne kakhali batiiti ba baroborwa.”

¹⁵Bafarisayo bacha bakhola etoloondo nga banyala khureka Yesu mu lilomaloma liewe.

¹⁶Nio bamurumakho babeeka babwe, alala ne Baheroti, ne bamureeba bali, “Omwekisia khumanyile khuli ewe oli owa ng'ali, wekisia engila eya Wele mu bung'ali, se wesiindukhila omundu yesi yesi tawe, sikila sobala bukali bwo omundu tawe.

¹⁷Nono khuboolele niko wibaasia? Lilaka likhufukiilila efwe khuruunga busuuru khu Kaisari namwe tawe?”

¹⁸Yesu aba amanyile kumureko kwabwe, nio abareeba ali, “Enywe babacha, siina sikila ne mukhaka ese!

¹⁹Njekesie erupia eye khuruunga busuuru!” Mala bamureerera erupia.

²⁰Yesu abareeba ali, “Kumurwe kuulikho kuno ne lisina bia naanu nibio?”

²¹Bamukobosia bali, “Bia Kaisari.” Ne Yesu ababoolela ali, “Khwako elesia Kaisari biili bia Kaisari, ne elesia Wele biili bia Wele!”

²²Nga baulila kano bauka, mala bamwinyokhayo bacha.

²³ Endaalo eyo ne ng'ene Basatukayo ba balomanga bali, “Khulamukha khwe bafu se khuliio tawe.” Becha niio Yesu aaba bamureeba bali,

²⁴ “Omwekisia, Musa aaloma ali, ‘Kaaba bali omundu afwa nakhali ne babaana tawe, khukhwola wandaaye akobosie namulekhwa, asaalile wandaaye owafwa oyo babaana.’

²⁵Nono, babao wandaaye ne wandaaye saba babamenyanga nafwe, omubele areera omukhasi mala afwa ne akhasaalakho omwana tawe, alekhela wandaaye namulekhwa.

²⁶Lundi kaba kario khu owa khabili ne owa khataru khukhwola khu owa saba.

²⁷Ekhumaliilikha, namulekhwa oyo yesi afwa.

²⁸Nono, enyanga niyo bafu balilamukhila, aliba mukha naanu khu baseecha saba abo? Sikila boosi baba baseecha bewe.”

²⁹Ne Yesu abakobosia ali, “Enywe mwekhiikhile, sikila se mumanyile kamaandiko namwe kamaani ka Wele tawe.

³⁰Sikila babafwa ne balilamukha baliba nga malaika mwikulu se balireerana tawe.

³¹Nono, mukhulamukha khwe bafu, enywe se mwasoma kakaboolwa khwinywe ne Wele, bali,

³² ‘Ese ndi Wele owa Aburahamu, Wele owa Isaaka, lundi Wele owa Yakobo.’ Ali Wele we balamu, se ali Wele we bafu tawe.”

³³Nga babaandu ne baulila kano, bauka khu mekisio kewe.

³⁴Nga Bafarisayo baulila bali Yesu se anyalikhaane khukhakwa ne Basatukayo tawe, babuusiana alala.

³⁵ Mala mulala khu nibo omwekisia owe Lilaka, amureeba lireeba, khumukhaka, ali,

³⁶“Omwekisia, Lilaka siina lili liboofu khukhila koosi?”

³⁷ Ne Yesu amukobosia ali, “Siima Omwami Wele wowo ne kumwoyo kwowo kwoosi, ne liiba liowo lioosi, ne kamebaasio kowo koosi.

³⁸Lilaka lino nilio liboofu, lundi likhila koosi.

³⁹ Ne lie khabili lili mbo, ‘Siima owasio nga ne wesiima wamwene.’

⁴⁰Lilaka lia Musa ne kamekisio ke bang'oosi bieyikina kamalaka kabili kano.”

⁴¹Nga Bafarisayo baba ne bebuusiisie alala, Yesu abareeba ali,

⁴²“Mwibaasia siina khu Kristo? Omwana wa naanu niye?” Bamukobosia bali, “Ali Omwana owa Daudi.”

⁴³Yesu ababoolela ali, “Nono kaba kariena Daudi khubirira mu Roho aamulaanga ali, ‘Omwami’; sikila aloma ali,

⁴⁴ ‘Omwami aboolela Omwami wase ali: Yikhala ano amukhono kwase kumuseecha, khukhwola nga ndira basiku bowo mu bikele biowo.’

⁴⁵Ne, kaba bali, Daudi amulaanga ali, ‘Omwami,’ kanyalikha karie Kristo abe omwana wewe?”

⁴⁶Se abao yesi yesi onyala khukobosia Yesu likhuwa na lilala tawe, lundi khukhwamila endaalo ng'eneyo se abao owanyindaalila khumureeba kakaandi koosi tawe.