Read lubukusu Mat. 23 Bible Online

Mat. 23 - lubukusu bible

Mat. 23

¹Mala Yesu aboolela babaandu ne babeeka bewe ali,

²“Baandiki ne Bafarisayo nibo babaebwa bunyali bwe khukhwinoosia Lilaka lia Musa.

³Khwako khukhwola murie ne khuloonda kosi kosi niko bamuboolela; ne kakhaba kario, mukhakhola nga nibo ne bakholanga tawe, sikila se bakholanga niko belwacha tawe.

⁴Bara bisiro lukali khu mikoongo kie babaandu ne nibo babene se benya khutiilakho akhaba ne lulwala lwong'ene tawe.

⁵ Bakhola bikholwa biabwe bioosi bali nio babaandu bababone. Lola nga baandika chinyilili che liiandiko khu misiipi nikio beboa khu bweni ne khu makhono, lundi lola nga buyenje[10] bwe chikaanjo chabwe ne bwalea!

⁶Lundi basiima khukhwikhala ebweeni mu naikara ne khu ndebe che ebweeni mu chisinakooki;

⁷lundi basiima khukhesebwa ne liria khu soko, ne khulaangwa ne babaandu bali ‘Rabii,’

⁸Ne enywe mukhalaangwa muli, ‘Rabii’ tawe, sikila muli bo mwekisia mulala, ne enywe mweesi muli be nju ndala.

⁹Lundi mukhalangakho omundu yesi yesi khwiloba khuno muli, ‘Paapa’ tawe, sikila muli ne Paapa mulala yeng'ene oli mwikulu.

¹⁰Namwe enywe mukhalaangwakho bali, ‘Omwami’ tawe, sikila muli ne omwami mulala yeng'ene niye Kristo.

¹¹ Oyo oli omukali khukhila boosi mwinywe alaba omukholi wenywe.

¹² Yesi yesi oweniinia omwene kane ekhisibwe, ne oweboombia alaniinisibwa.

¹³“Ne kakhali enywe muli ne silaamo baandiki ne Bafarisayo, enywe babacha! Sikila mwikala kumuliango kwe bubwami bwe mwikulu khu baandu; ne enywe mwabene semwingilamo tawe, mala mukhiingilila abo bakhaka khu khwingilamo! [

¹⁴Muli ne silaamo baandiki ne Bafarisayo, enywe babacha! Mwingila mu chinju che banamulekhwa ne mubanuula bibiindu biabwe mala mubafufwasia ne khusaba kamasaba kamaleeyi; khwako mulinyoola sinyaasio sikhilakho sie babaandi.][11]

¹⁵“Muli ne silaamo baandiki ne Bafarisayo, enywe babacha! Mwambukha enyanja ne bibala bioosi khukaluukhasia omundu mulala aambaane nanywe, ne mu munyoolile, mumukhola olaana khukhwola khabili khucha mu mulilo nga enywe mwabeene.

¹⁶“Muli ne silaamo muuli bakeleki babofu! Mwikisia muli, ‘Kaaba bali yesi yesi echubila khu Lukaangu, sesili siindu tawe; ne kaba bali yesi yesi echubila khu sahabu eye mu Lukaangu, aba omwene eboyile.’

¹⁷Enywe babofu muli basilu! Siina sikhila sisiindi, esahabu namwe Lukaangu lukhola esahabu eyo yaba endakatifu?

¹⁸Lundi mwikisia muli, ‘Waaba bali yesi yesi aaba ne echubila khu alutare, se sili siindu tawe; ne aaba ne echubila khu siianwa sie khu alutare aba omwene eboyile.’

¹⁹Enywe babofu muli basilu? Siina sikhila sisiindi, siianwa namwe alutare ekhola siianwa siaba sitakatifu?

²⁰Khwako oyo owichubila khu alutare, echubila khu nisio biianwa bioosi bilikho;

²¹ne oyo owichuba khulwe Lukaangu echubila khu nilwo Wele amenyilemo,

²² ne oyo owichuba khulwe likulu, echubila khu ndebe eya Wele eye bubwami ne khuyo okikhalakho.

²³ “Muli ne silaamo baandiki ne Bafarisayo, enywe babacha! Sikila muaana khu Wele sikelo silala khwi khumi sie bibiindu nga chinyenyi ne biiunya bulayi, ne binjari ne tania ne kakhali mulekelesia kamakhuwa ke lilaka kamasiro khukhilakho nga bung'ali ne siisa ne busuubilwa; mukhoya mukhole bino, ne mukhalekelesia kakaandi tawe.

²⁴Bakeleki babofu enywe! Muli nga babaandu batiing'a eesi ne mala bamila engamia!

²⁵“Muli ne silaamo enywe baandiki ne Bafarisayo, enywe babacha! Sikila musiinga sikoombe ne sahani enje, ne mukari biechulemo bunuuli ne bukhalukha.

²⁶Enywe bafarisayo babofu! Nyoa musiinge sikoombe ne sahani bimiliie mukari, nio enje yosi ebe emiliiu.

²⁷ “Muli ne silaamo baandiki ne Bafarisayo, enywe babacha! Sikila muli nga biliindwa nibio baakha luloongo, bibonekha bulayi enje, ne mukari biechulamo bikuumba bie bafu ne bunyaalu bwosi.

²⁸Akhaba enywe mwesi mulolekha khuba baluungi khu baandu enje, ne kakhali mukari mwenywe mwechulamo bubacha ne bubwoni.

²⁹“Muli ne silaamo enywe baandiki ne Bafarisayo, enywe babacha! Sikila mwombakha biliindwa bie bang'oosi ne khusaa biliindwa bie ba baaba baluungi;

³⁰ne muloma muli, ‘Khubanga khukhwamenya mu ndaalo che bakuuka befwe, andi se khwaambaana nabo khuchukha sifuki sie bang'oosi tawe.

³¹Khwako muaana buloli bumuboa enywe mwabene, sikila enywe muli babaana be babaandu babeera bang'oosi.’

³²Nono, chiililila mutabusie niko bakuuka benywe barakikha.

³³ Enywe chindemu, baana ba nafwo mulaona murie khukhalakilwa khucha e makoombe?

³⁴Khwako namurumira bang'oosi ne bakesi ne baandiki. Balala khu nibo mulibeera ne babaandi muli beerera khu misalaba, ne babaandi muli bapila mu chisinakooki chenywe, lundi mubatimanie khukhwama mu lukoba khucha mu lundi.

³⁵ Nio kamafuki ke baluungi boosi kakachukhwa khu sibala keche khwinywe, khukhwama khu mafuki kakhaaba ne bubi ka Abili khukhwola khu ka Sakaria okhwa Barakia, niye mwereera akari we atakatifu ne alutare.

³⁶Ng'ali muboolela enywe ndi, kano koosi kaliekholekha khu selukho yino.

³⁷“Ee! Yerusalemu Yerusalemu! Enywe mumwiira bang'oosi ne khu khupa kamabaale nibo Wele aruma khwinywe. Khukhwola khenga ne nenya khubuusia alala babaana benywe nga engokho ne buusia binywinywi biayo mundaa chayo, ne kakhali se mwakana tawe!

³⁸ Khwako Lukaangu lwenywe lulanjuukhwa mala lube busa.

³⁹ Sikila muboolela enywe ndi, khukhwama luno, se mulimbonakho ese lundi tawe, nabwila muliloma muli, ‘Ali ne khabi oyo owicha mu lisina lio Mwami.’ ”