Read lubukusu Mat. 27 Bible Online

Mat. 27 - lubukusu bible

Mat. 27

¹Nga ne bwasia, basaayi bakhulu boosi ne babemeelesi be babaandu bakhola etoloondo eye khukhwira Yesu.

²Bamuboa kiminyololo bacha naye, bamura mu makhono ka Pilato omuruki owe bubwami bwe Barumi.

³ Nga Yuda omuchaami ne abona Yesu akhalakiilwe khufwa, eebiiyia mala aakobosia chirupia kamakhumi kataru chana echo khu basaayi bakhulu ne babemeelesi.

⁴Aaloma ali, “Nakholile bubwoni nga nachaamile omundu omuluungi khukhwirwa.” Bamureeba bali, “Kamene ako kali siina khwifwe? Wamwene koongo!”

⁵Yuda amwaata chirupia chana aasi mu Lukaangu, aarekukha aacha ekoka.

⁶Basaayi bakhulu, babukula chirupia chana echo, baloma bali, “Lilaka se likhufukiilila efwe khuchira mwibiikhilo tawe, sikila chili che sifuki.”

⁷Bafukiilisiana mala bachibukula bakula, lusaambu lwo mubuumbi, khusiikhamo baakwa.

⁸Khwako lusaambu lwene olwo lulaangwa lwe sifuki khukhwola endaalo yino.

⁹ Nio niko omung'oosi Yeremia aloma kechusibwe. “Mala babukula chirupia kamakhumi kataru, sikelo nisio babaandu ba Isiraeli bafukiilila khumuruunga,

¹⁰barumikhira chirupia echo khukula lusaambu lwo mubuumbi, nga Omwami ne aandaka.”

¹¹Yesu eema ebweeni wa Pilato omuruki owe bubwami bwe Baruumi; mala Pilato chana aamureeba ali, “Ewe niwe Omwami we Bayaudi?” Yesu aamukobosia ali, “Ewe walomile orio.”

¹²Ne kakhali nga basaayi bakhulu ne babemeelesi bamuloma se aabakobosia siindu tawe.

¹³Khwako Pilato aamureeba ali, “Ewe se olikho oulila bibiindu nibio balikho bakhusataka tawe?”

¹⁴Ne kakhali Yesu se aalomakho likhuwa liosi liosi tawe, nabwila omuruki oyo ne auka lukali.

¹⁵Buli ndaalo eya naikara eye Pasaka omuruki we bubwami bwe Baruumi alekhuulaanga omuboe yesi yesi niye babaandu benyaanga.

¹⁶Siise esio omuboe abao owamanyikhana khu mabi owalaangwa Baraba,

¹⁷nono nga babuusiana Pilato abareeba ali, “Enywe mwenya mulekhulile naanu, Baraba namwe Yesu olaangwa Kristo?”

¹⁸Amanya busa ali Bayaudi bamurereere Yesu sikila likhendekha liabwe.

¹⁹Pilato aba ekhaale khu ndebe eye likhalaka, omukhasi wewe amurumira likhuwa ali, “Okhabakho ne sisiindu siosi siosi khu mundu omuluungi oyo tawe, luno naanisibwe lukali mu marooro sikila niye.”

²⁰Basaayi bakhulu ne babemeelesi baachiilisia babaandu basabe Baraba alekhuulwe ne Yesu eerwe.

²¹Omuruki chana aabareeba lundi ali, “Mwenya mulekhulile mulala siina khu babili bano?” Bakobosia bali, “Baraba!”

²²Pilato aabareeba ali, “Nono ese khole ndiena Yesu olaangwa Kristo?” Ne boosi bayokela lukali bali, “Abaambwe.”

²³Nio Pilato aareeba ali, “Akholile mabi siina?” Ne kakhali bayokela lukali bali, “Abaambwe!”

²⁴ Khwako Pilato abona ali salikho anyoola siosi siosi tawe, ne kakhali sisiayuumba sinyala siarakikha, abukula kameechi asaaba kamakhono kewe ebweeni we babaandu, naloma ali, “Ese se ndi ne sisiindu khu lifwa lio omundu yuno tawe! Makhuwa kenywe mwabene, ese koongo!”

²⁵Ne babaandu boosi baloma bali, “Sifuki siewe sibe khwifwe ne khu baana befwe!”

²⁶Nio aabalekhuulila Baraba, ne nga amala khu khuupa Yesu biboko, amuaana abaambwe!

²⁷Nio banamae bayila Yesu mwichipi lio muruki Pilato mala bebuusia ebweeni wewe boosi.

²⁸Bamufuula chingubo chewe, bamufwara ekaanjo embesemu,

²⁹baruka ekuutwa eye kamawa bamufwara khu murwe, bamuambia liteeka mukhono kwewe kumuseecha. Basikama ebweeni wewe ne bamuchekheelela ne baloma bali, “Muleembe Omwami owe Bayaudi!”

³⁰Bamufuchakho mala babukula liteeka chana bamupila khumurwe.

³¹Oli bamala khumuchekheelela, bamufuula ekaanjo embesemu chana eyo, bamufwara chichewe mala bamuyila abaambwe.

³²Nga baaba ne balikho bacha, batundubikha omundu khukhwama Kireni niye balaanga lisina bali Simoni, mala banamae bamuyingiilila khusuta kumusalaba kwa Yesu.

³³Nga boola abuundu alaangwa bali Kolikota, lisina liboola lili, “abuundu we Siianga.”

³⁴ Baelesia Yesu endali niio batubasiisie ne endurwe bali anywe; ne nga akichanjamakho aakiloba khukinywa tawe.

³⁵ Bamubaamba khu musalaba mala bakabana chingubo chewe mu ngila eye khu khupa ekuura.

³⁶Enyuma wako bekhalao ne bamuloleelela.

³⁷Bara khu ngaaki khwe kumurwe kwewe kamaandiko ke kamasitako kaboola kali, “Yuno niye Yesu, Omwami we Bayaudi.”

³⁸Nio banuuli babili ba baambwa naye, mulala kumukhono kumuseecha ne okundi kumukhasi.

³⁹ Babaandu ba babirirangao basukusa kimirwe bamukhoma ne bamuchekheelela bali,

⁴⁰ “Ewe niye owenya khutechula Lukaangu mala olwombakhe lundi mu ndaalo chitaru! Yeonia wamwene waaba ne oli Omwana owa Wele! Yama khu musalaba wikhe aasi khubone.”

⁴¹Akhaba basaayi bakhulu ne baandiki be Lilaka ne babemeelesi, bamuchekheelela, ne baloma bali,

⁴²“Aonia babaandu; mala sanyala khukhwionia omwene tawe! Se ali Omwami owa Isiraeli? Khe ame khu musalaba ekhe aasi luno luri khubone, nio khumusuubile!

⁴³ Eyikina mu Wele, ne khuloma, ali ese Omwana owa Wele. Nono kaba kario, lekha khubone nga Wele amuonia luno!”

⁴⁴Akhaba banuuli ba babambwa naye boosi bamukhoma mu ngila ng'eneyo.

⁴⁵Sisiilima siaba khu sibala sioosi khukhwama chisa sita che kumuusi khukhwola chisa tisa.

⁴⁶ Oli yola esaa eya tisa Yesu aayulukha ne kumumilo kumukali ali, “Eloi, Eloi, lama sabaki tani?” Liboola lili, “Wele wase, Wele wase, siina sikila ne undekhile?”

⁴⁷Balala khu nibo babamwimao nga baulila bario baloma bali, “Omundu yuno alikho alaanga Elicha!”

⁴⁸ Mulala khu nibo atima khangu aabukula sisiaangu, aasiinikha mu ndali enduruuchi asira khu liteeka mala akhaka khumuelesia bali anywe.

⁴⁹Ne kakhali babaandi baloma bali, “Liinda nio, khubone nga Elicha echa khumuonia.”

⁵⁰Yesu aayulukha lundi ne kumumilo kumukali mala akwiisia kumwoyo.

⁵¹ Nio engubo eye mu Lukaangu yatabukhamo, khukhwama khu ngaaki khukhwola aasi. Sibala siaterema chinyaanda chabukhakamo,

⁵²biliindwa bioosi biekukha, mala batakatifu ba Wele bakali babafwa balamukha.

⁵³Barura mu biliindwa, enyuma we khulamukha khwa Yesu bacha mu lukoba luboofu lutakatifu ne khubonekhela babaandu bakali.

⁵⁴Nga omunamae omukhulu ne banamae babaandi ba baaba alala naye, ne baloleelela Yesu, babona khuterema khwe sibala nende kakekholekha, buuri bwabaamba, baloma bali, “Ng'ali yuno abeele Omwana owa Wele!”

⁵⁵ Lundi bakhasi bakali babayo, ne baloleelela khukhwama sinao, abo nibo babaloonda khu Yesu khukhwama Kalilaya, ne bamuyeeta.

⁵⁶Balala khu nibo baba Maria Makatalena, ne Maria maawe owa Yakobo ne Yosefu, ne maawe we basoleeli ba Sebetayo.

⁵⁷Oli ekolooba, omuinda echa khukhwama Arimatea, owalaangwa bali Yosefu, yesi aba omweeka owa Yesu.

⁵⁸Acha khu Pilato asaba kumulaambo kwa Yesu. Nio Pilato alaka ali aebwe.

⁵⁹Nio Yosefu aabukula kumulaambo kwa Yesu, aakuboela mungubo eye khusiikhilamo eya katani emiliiu,

⁶⁰akura mu ng'ani yewe embia, niyo abeecha mu libaale. Apiringisia libaale libalaayi alikhiikha emuliango we siliindwa, mala arekukha.

⁶¹Maria Makatalena ne Maria okundi oyo babao, bekhaale baloleelele esiliindwa.

⁶²Endaalo eyaloondakho, nio busie Sabato, basaayi bakhulu ne Bafarisayo babusiana ebweeni wa Pilato

⁶³ ne baboola bali, “Omwami, efwe khukhebulila nga omubeeyi oyo aloma, nasiili omulamu ali, ‘Ndilamukha enyuma we chindaalo chitaru.’

⁶⁴Khwako laka oli siliindwa sibeo baliindi khukhwola endaalo eya khataru, babeeka bewe bakhola bario bacha bamwiba, mala baboolela babaandu bali, ‘Alamukhe khukhwama mu bafu’, mala aba bubeeyi bumaliilisi bulakhilakho butaayi.”

⁶⁵Pilato ababoolela ali, “Enywe muli ne baliindi, khe muche, mubareo nga mwenya.”

⁶⁶Khwako bacha, bamaalilila kumuuri khwibaale e muliango we siliindwa ne khurao baliindi basiliinde.