Read lubukusu Mat. 28 Bible Online

Mat. 28 - lubukusu bible

Mat. 28

¹Oli endaalo eya Sabato yabira, busia bwe endaalo eye mwichuuma, Maria Makatalena ne Maria okundi oyo bacha khulola siliindwa.

²Nio literema likali lie sibala liabao, sikila malaika wo Mwami ekha khukhwama mwikulu apiringisia libaale enyosiayo, mala aalikhalakho.

³Aafwaana nga lueni, ne chingubo chewe chaba chiwaanga chwe nga enyaange.

⁴Baliindi be siliindwa baba ne buuri bukali baterema baba nga bafu.

⁵Ne kakhali Malaika aboolela bakhasi abo ali, “Mukharia tawe; sikila manyile ndi mulikho muenja Yesu owa baambwa.

⁶Se ali ano tawe; sikila alamukhe, nga aaloma yiicha mubone niio bamurere.

⁷Khe muche khangu muboolele babeeka bewe muli alamukhe khukhwama mu bafu, lundi arangiire ebweeni wenywe alikho acha Kalilaya; mulamubonela ebweeneyo! Khebulila niko ese mubooleele enywe.”

⁸Khwako barekukha khangu ne buuri ne liliekhoya likali, batimaka khuboolela babeeka bewe.

⁹Nio Yesu aabakaanana aababoolela ali, “Kumuleembe kube nanywe!” Becha bamukwa mu bikele bamusaaya.

¹⁰Yesu ababoolela ali, “Mukharia tawe; khemuche muboolele bawandaayase bache e Kalilaya, balambonela ebweeneyo.”

¹¹Nga bakhasi abo ne barekukha, balala khu baliindi ba baliinda siliindwa bacha mu lukoba luboofu mala baboolela basaayi bakhulu koosi kakakholeekhe.

¹²Nio basaayi bakhulu ne babemeelesi nga bamala etoloondo yabwe; baana sikelo siboofu sie chirupia khu baliindi abo.

¹³Baloma bali, “Boolela babaandu muli, ‘Babeeka bewe bechile siilo bamwiba efwe ne khukona.’

¹⁴Ne aaba bali likhuwa lino liolela omuruki, efwe khulamwikusia ne enywe se mulaba mu butinyu tawe.”

¹⁵Khwako baliindi babukula chirupia echo mala bakhola nga baboolelwe. Likhuwa elio liamanyikhana mu Bayaudi khukhwola endaalo eya luno.

¹⁶ Babeeka ekhumi na mulala abo bacha Kalilaya, khu sikulu nisio Yesu abalaka bachekho.

¹⁷Nga bamubona bamusaaya, ne kakhaba kario balala baayaaya.

¹⁸Yesu echa siimbi ababoolela ali, “Bunyali bwe mwikulu ne bwe khu sibala bwoosi bwamalile khuebwa khwise.

¹⁹ Khwako enywe khemuche mukhole be chikholo choosi babe babeeka base, mubabatiisie mu Lisina lia Paapa nende lio Mwana nende lia Roho Omutakatifu,

²⁰ne mubekisia khutiila bioosi nibio malile khumulaka enywe. Khebulila muli, ndi nanywe chindaalo choosi, khukhwola khu siakamo sie chiselukho.”