Read lubukusu Mat. 4 Bible Online

Mat. 4 - lubukusu bible

Mat. 4

¹ Nio Roho ayila Yesu mu sichiimi Sietani amukhake.

²Eyimana khulia chindaalo kamakhumi kane, siilo ne kumuusi mala enjala yamulia.

³Nio Sietani amwichakho amuboolela ali, “Ewe waaba ne oli Omwana owa Wele khola kamabaale kano kabe kimikaati.”

⁴ Ne Yesu amukobosia ali, “Liaandikwa lili, ‘Omundu se alamenya khulwe siakhulia siong'ene tawe, ne kakhali amenya khulwe buli Lomo niyo Wele aloma.’ ”

⁵Lundi Sietani chana amuyila mu Lukoba lutakatifu lwa Yerusalemu, amuniinia khu lusuli lwe Lukaangu,

⁶ amuboolela ali, “Ewe waaba ne oli Omwana owa Wele, suna aasi, sikila liaandikwa lili, ‘Wele alaruma bamalaika bewe balakhwakaniila mu makhono kabwe, okhakhola orio wetuya khwibaale tawe.’ ”

⁷ Yesu amuboolela ali, “Lundi liaandikwa lili, ‘Okhakhaka Omwami Wele wowo tawe.’ ”

⁸Lundi Sietani amuyila khu sikulu sileeyi lukali, amwekesia bubwami bwe sibala bwoosi ne luyali lwasio.

⁹Amuboolela ali, “Ndakhuelesia bino bioosi, waaba bali ungwa mu bikele ne khu khusaaya.”

¹⁰ Nio Yesu amuboolela ali, “Sietani, rekukha oche! Sikila liaandikwa lili, ‘Olasaaya Omwami Wele wowo mala omukhalaabanile niye yeng'ene.’ ”

¹¹Nio Sietani amulekha, mala malaika becha bamuyeeta.

¹² Yesu nga aulila bali Yoana ali mu siboe, acha mu Kalilaya.

¹³ Nio aama Nasareti acha amenya Kaperinaumu, lukoba luuli khu sikiingi sie nyanja, mu njakha che lukoongo lwa Sebuluni ne Nafutali,

¹⁴kakholekha kario, khukhwichusia niko omung'oosi Isaya aloma ali,

¹⁵ “Sibala sia Sebuluni ne sibala sia Nafutali, lubeka lwe sia nyanja, engelekha wa Yoritani, sibala sia Kalilaya sie Be Chikholo.

¹⁶Babaandu ba baaba mu siilima baboone buwaanga bukali, ne naabo ba baaba mu siniini sie lifwa, buwaanga bwabooleele.”

¹⁷ Khukhwama siise sieneesio Yesu arakikha khukhwilwacha, naboola ali, “Yekanila, sikila bubwami bwe mwikulu buli siimbi.”

¹⁸Yesu nga aaba ne akeenda khu sikiingi sie nyanja eya Kalilaya abona babaandu babili wandaaye ne wandaaye. Simoni olaangwa Petero ne Andereya, ne bamwaata lutiimba mu nyanja, sikila baba banaabi.

¹⁹Ababoolela ali, “Nondekho mala ndamukhola enywe mube banaabi be babaandu.”

²⁰Balekha chindiimba chabwe khangu mala bamuloondakho.

²¹Oli esendakho abweeni abona babaandi babili wandaaye ne wandaaye, Yakobo ne Yoana babaana ba Sebetayo. Baba mu liaaro ne raarawabwe ne bang'oona chindiimba chabwe. Yesu abalaanga,

²²abwene ne abwene balekha liliaaro ne raarawabwe, mala bamuloondakho.

²³ Yesu aacha buli abuundu mu Kalilaya mwoosi ne ekisia mu chisinakooki chabwe ne elwacha Elomo Endayi eye bubwami, lundi ne aonia buli bulwaale ne butekhele mu baandu.

²⁴Khwako efuma yewe yoola mu sibala sia Siria sioosi, lundi bamureerera balwaale boosi, lufu lwa buli lukano ne buchuuni chingano choosi, be bisieeno, be chiteleng'i nende babafwokoya, mala Yesu abaonia boosi.

²⁵Babaandu bakali bama Kalilaya ne Tekapoli ne Yerusalemu ne mu Buyuda, nende engelekha wa Yoritani, baloonda khu Yesu.