Read lubukusu Mat. 7 Bible Online

Mat. 7 - lubukusu bible

Mat. 7

¹“Mukhakhalakila babaandi tawe, mwesi mukhakhola murio mwakhalakilwa tawe.

² Sikila mulakhalakilwa khuloondekhana ne likhalaka nilio murumbura, lundi sikelo nisio mukelelamo mwesi mulakelelwamo.

³Siina sikila ne obona khasosono khaali mumoni eya wandaayo, ne se obona lilindu lili mumoni yowo wamwene tawe?

⁴Namwe olaboolela wandaayo oriena oli, ‘Lekha khurusie khasosono mumoni yowo,’ ne khane lilindu lili mumoni yowo wamwene?

⁵Ewe omubacha, nyoa orusie lilindu chana elio lili mumoni yowo wamwene, nio obone bulayi nga ne orusia khasosono mumoni eya wandaayo.

⁶“Mukhaelesia chimbwa siili sitakatifu tawe, chilakaluukhana chimwibwaakale, lundi mukhamwaatila chimbiichi chisiimbi chenywe tawe, chikhola chirio chachiswalakilila mu bikele mala chayuukha cha mwibwaakala mwabeene.

⁷“Saba, ne mulaebwa, yiima, ne mulanyoola; khong'oonda, mala mulekulilwao.

⁸Yesi yesi osaba aebwa, ne oyo oyiima anyoola, ne okhong'oonda ekulilwao.

⁹Namwe mundu siina khwinywe, omwana wewe ne amusaba busuma, amuelesia libaale?

¹⁰Namwe ne asaba eng'eeni amuelesia endemu?

¹¹Kaaba bali enywe muli bamayaanu, mumanyile khuana biianwa bilayi khu baana benywe Raraawenywe oli mwikulu alaana bibiindu bilayi bikali lukali khwaabo bamusaba!

¹² “Nono siosi siosi nisio mwenya muli babaandu bamukholele enywe; bakholele murio, sikila lino nilio sifuno sie Lilaka lia Musa ne kamekisio ke bang'oosi.

¹³“Yingilila mu silibwa sinyiki, sikila engila echa mu khubuna ebirira mu silibwa sibalaayi, ne mala lukeendo lwakhwo luli lulwangu, ne bakibirirakho bali bakali.

¹⁴Engila echa mu bulamu ebirira mu silibwa sinyiki ne bakibona bali bakeekhe.

¹⁵“Ba meso khulwe bang'oosi be bubeeyi babeecha niio muli ne befwarire kamasieelo ke kamakheese, ne mukari bali bisuuche bie kumuliuliu.

¹⁶Mulabamanyila mu bikholwa biabwe. Babaandu babutangakho chisabibu khu binyenya, namwe chinduli khu marakaru ku?

¹⁷“Khwako buli kumurongooro kumulayi kwaama kamatuunda kamalayi ne kumurongooro kumubi kwaama kamatuunda kamabi.

¹⁸Kumurongooro kumulayi se kunyala kwaama kamatuunda kamabi tawe, namwe kumurongooro kumubi se kunyala kwaama kamatuunda kamalayi tawe.

¹⁹ Kumurongooro kwosi kwosi kukhaama kamatuunda kamalayi tawe, kuremwa ne khumwaatwa mu mulilo.

²⁰ Khwako enywe mulamanyila bang'oosi be bubeeyi mu bikholwa biabwe.

²¹“Se kali bali buli mundu oundanga ese ali, ‘Omwami, Omwami,’ alingila mu bwami bwe mwikulu tawe, ne kakhali abo bakholanga lilienya lia Paapa wase oli mwikulu bong'ene.

²²Endaalo ng'eneyo bakali balinjiloochela bali, ‘Omwami, Omwami, se khwang'oolela mwisina liowo, ne khukhola kamayia kamakali mwisina liowo!’

²³ Mala ndibaboolela ndi, ‘Ese se namumanyakho enywe tawe, khemundureo, enywe mukholanga kamamayaanu!’

²⁴“Nono buli mundu oulila kamakhuwa kase kano ne khukakhola alaba nga omukesi owombakha enju khu lwanda;

²⁵mala efula yakwa, kimikhula kiekha, lundi ekhuungu yaucha ne khukhwikhupa khunju ng'ene eyo ne kakhali se yasiuukha tawe, sikila yaba yombakhwa khu lwanda.

²⁶“Ne kakhali buli mundu oulila kamakhuwa kase kano ne khulekha khukakhola aliba nga omusilu owombakha enju yewe mumuyekhe.

²⁷Efula yakwa kimikhula kiekha, lundi ekhuungu yauucha ne khukhwikhupa khunju ng'ene eyo, mala yasiukha, ne likwa liayo liaba liboofu lukali!”

²⁸ Yesu nga ne amala khuloma kamakhuwa kano bipupu biauka khulwe kamekisio kewe.

²⁹Sikila abekisia nibo nga oyo owaba ne bunyali, se abekisia nga baandiki tawe!