Read lubukusu Mat. 8 Bible Online

Mat. 8 - lubukusu bible

Mat. 8

¹Yesu nga ne ekha khukhwama khu sikulu, babaandu bakali bamuloondakho.

²Nio omundu owe kamakele echa asikama ebweeni wewe, aloma ali, “Omwami, waaba ne wenya onyala wandakaasa.”[2]

³Yesu amutilakho ne aloma ali, “Nenya, takaasibwa.” Ne abwene ne abwene kamakele kamururakho.

⁴ Nio Yesu amuboolela ali, “Rekeeresia, okhaboolelakho omundu yesi yesi sisiindu siosi siosi tawe, ne kakhali cha weyokesie khu musaayi, orusie siianwa nisio Musa alaka, nio babaandu boosi bamanye bali waonile.”

⁵Yesu aba nga alikho engila mu lukoba lwa Kaperinaumu omunamae omukhulu owe Barumi amwichakho amwikoonjelela ne aloma ali,

⁶“Omwami omukholi wase ali engo, akonile aasi se anyala akhaba khukhweyusia tawe.”

⁷Yesu amuboolela ali, “Kane niche muonie.”

⁸Ne omukhulu owe banamae chana amukobosia ali, “Tawe Omwami! Ese se nolaana ewe wiche munju mwase tawe, ne kakhali loma busa Elomo, mala omukholi wase alaona.

⁹Sikila akhaba ese ndi ne omukhongo wase, ne lundi ndi ne banamae aasi wase, ne mboolela mulala ndi ‘Cha!’ Ne acha; okundi ndi, ‘Yiicha!’ Ne echa, ne nasioobi wase, ndi ‘Khola lino!’ Ne akhola!”

¹⁰Yesu nga aulila kano, auka mala aboolela ba bamuloondakho ali, “Ng'ali muboolela enywe ndi, khanyoolakho lisuubila nga lino liri akhaba mu Isiraeli tawe.

¹¹ Ng'ali ese muboolela enywe ndi, bakali baliama e bukwe ne mumbo mala bekhale khu siaalwa nende Aburahamu, Isaaka, ne Yakobo mu Bwami bwe mwikulu.

¹² Ne kakhali bakhoyelwa khuba mu Bwami bwene obwo balimwaatwa enje mu siilima, balililemo ne khukhwelumakaka.”

¹³Yesu aboolela omukhulu owe banamae chana oyo ali, “Cha engo, lekha kabe nga ne osubiile.” Nio omukholi chana oyo aaona mu siise esio ne sisiene.

¹⁴Yesu nga ne engila munju eya Petero, abona masalaawe owa Petero akonile aasi ali ne kumureengo.

¹⁵Amutiila kumukhono; mala aona nio enyokha amuelesia siakhulia.

¹⁶Ekolooba ao bamureerera babaandu bakali ba baaba ne bisieeno, mala Yesu abirusia khulwe khuloma elomo yewe, lundi aonia balwaale boosi.

¹⁷ Lino liaba lirio khukhwichusia niko omung'oosi Isaya aaloma ali, “Aabukula butekhele bwefwe, Lundi asuta bulwaale bwefwe.”

¹⁸Yesu nga ne abona baandu bakali ne bamwichuleo, aboolela babeeka bewe bambukhe enyanja.

¹⁹Nio omuandiki owe lilaka echa niio Yesu aba amuboolela ali, “Omwekisia, ndakhuloondakho buli osi osi niio ocha!”

²⁰Yesu amuboolela ali, “Chinjusi chili ne kamaloo, ne chinyuni chili ne biswi, ne kakhali Omwana wo Mundu se ali ne abuundu niio auluukhila tawe.”

²¹Okundi khu beeka bewe amuboolela ali, “Omwami lekha nje siikhe paapa nio.”

²²Ne kakhali Yesu amuboolela ali, “Nondekho, mala olekhe bafu babeene basiikhe bafu babwe.”

²³Yesu aniina mu liaaro, mala babeeka bewe bamuloondakho.

²⁴Nio embembeesi engali yaaba khu nyanja, yakila liliaaro liarakikha khutengaala sikila bibuli bie kameechi, ne Yesu aaba alikho akona.

²⁵Babeeka bamusiisimusia ne baloma bali, “Omwami, khuonie! Khulikho khubuna.”

²⁶Nio abareeba ali, “Siina sikila ne muriire?” Muli ne lisuubila litiiti lukali! Enyokha arafwira embembeesi ne enyanja biyenjeele, mala biayenjeela.

²⁷Buli mundu auka lukali ne baloma bali, “Omundu owa lukano siina yuno, niye akhaba ekhuungu ne nyanja biria!”

²⁸Yesu nga oola engelekha mu sibala silaangwa Katara babaandu babili be bisieeno bamwakaanana, ne baama e biliindwa. Baba barafu lukali abele omundu yesi yesi se abirira khu ngila ng'ene eyo tawe.

²⁹Nio baapa lulwang'a bali, “Mwana owa Wele ewe wenya okhukhole oriena? Ewe wechile ano khu khuukuuma efwe endaalo ne siili khwola?”

³⁰Abeele chimbiichi chingali chilikho chaaya sinao khukhwama niio baba.

³¹Mala bisieeno biekoonjelela Yesu bili, “Waaba ne okhurusia efwe enje, khuile mwituuli lie chimbiichi.”

³²Nio Yesu abiboolela ali, “Khemuche.” Abwenao biabaruramo biacha mu mbiichi, mala lituuli lioosi liasalamata khu mwikha kwe sikulu kumukali liaweela mu nyanja.

³³Nio babaayi belukha, bacha mu lukoba baboola bibiindu bioosi bibiekholeekhe khu be bisieeno chana abo.

³⁴Khwako be lukoba boosi barura, khukhwakaanana Yesu mala bamwekoonjelela bali arure mu sibala siabwe.