Read lubukusu Mat. 9 Bible Online

Mat. 9 - lubukusu bible

Mat. 9

¹Yesu aniina mu liaaro, ambukha engelekha we nyanja, oola mu lukoba lwe wabwe[3].

²Niio, bamureerera omundu owafwokoya, naali khu sitanda, ne nga Yesu abona lisuubila liabwe aboolela owafwokoya oyo ali, “Mwana wase luma kumwoyo! Wabeleelwe bubwoni bwowo.”

³Nio balala khu baandiki bamonyana bali, “Omundu yuno alikho akholela Wele embelekeu.”

⁴Ne kakhali Yesu amanya kamebaasio kabwe mala abareeba, ali, “Siina sikila ne mwibaasia kamamayaanu mu miooyo kienywe?

⁵Lilala siina liliangu, khuloma oli, ‘Wabeleelwe bubwoni bwowo’ namwe khuloma oli, ‘Yinyokha okeende’?

⁶Khukhwola mumanye muli, Omwana wo Mundu ali ne bunyali khu sibala bwe khubeela bubwoni,” nio aboolela owafwokoya chana ali, “Yinyokha, bukula sitanda siowo oche engo!”

⁷Nio owafwokoya enyokha acha engo.

⁸Nga babaandu ne babona bario, baria, mala bafumia Wele, khulwe khuaana bunyali nga buno buri khu baandu.

⁹Yesu arekukha khukhwama ao, mala oli alikho abira, abona omundu olaangwa Matayo ekhaale munju nimwo baroseriangamo busuuru, mala Yesu aamuboolela ali, “Nondekho.” Matayo enyokha amuloondakho.

¹⁰ Nga Yesu ekhala khu siaalwa munju mwa Matayo baroosia busuuru bakali ne babooni becha bekhala ne Yesu ne babeeka bewe.

¹¹Bafarisayo nga babona bario, bareeba babeeka ba Yesu bali, “Siina sikila omwekisia wenywe nalia ne babaandu nga bano bari?”

¹²Yesu nga aulila ario abakobosia ali, “Baali balamu se beenya omusilikhi tawe, ne kakhali balwale bong'ene.

¹³ Cha mwiyike nisio kano kaboola, ‘Nenya siisa se neenya chimbosio tawe?’ Sikila se neecha khulaanga baluungi tawe, ne kakhali neecha khulaanga babooni.”

¹⁴Nio babeeka ba Yoana Omubatiisi, beecha khu Yesu ne bareeba bali, “Siina sikila efwe ne Bafarisayo ne khweyimaane khulia, ne babeeka bowo se beyimanangakho khulia tawe?”

¹⁵Yesu naye abakobosia ali, “Bakeni be siselelo banyala khu khweyimana khulia omusoleeli niye baakhiile ne asiili nabo ku? Se kanyalikhana tawe. Ne kakhali chindaalo chiliicha nicho niye baakhiile alibukulilwa khukhwama khu nibo, nio beyimane khulia.

¹⁶“Se aliio yesi yesi onabila khu ngubo ekhale silaka siyia tawe, sikila silaka esio sikitabula mala kumwanya kwabalaa khukhila nga nebeele.

¹⁷Namwe endali embia se chukhwa mu oochwa chikhale tawe, ne yaaba ne chukhwamo, chioochwa chitabukha, mala endali yachichukha aasi, ne kakhali endali embia echukhwa mu oochwa chimbia nio bioombi bibiikhwe bulayi.”

¹⁸Yesu nga ne aba ne aloma kano, omwimeelesi muyaudi eecha niio ali asikama ebweeni wewe aaloma ali, “Omwana wase omukhaana ama khufwa busa ari, yiicha omureekho kamakhono kowo mala alalamukha.”

¹⁹Yesu enyokha amuloondakho, ne babeeka bewe.

²⁰Omukhasi owakhobokhanga khu miiko likhumi na kibili aamila enyuma wa Yesu mala atiila khu likemo lie engubo yewe.

²¹Ebaasia ali, “Natiilakho busa engubo yewe, ndaona.”

²²Yesu ekhebukha oli amubona aaloma ali, “Luma kumwoyo mukhaana wase! Lisuubila liowo liakhuoniisie.” Abwene ne abwene omukhasi oyo aona.

²³Nga Yesu engila munju yo mwimeelesi chana oyo, abona bakhupi be kimilele, ne babaandu bakali, ne basooma,

²⁴aaloma ali, “Rura enje mweesi, sikila omukhaana yuno se aafwiile tawe, alikho akona!” Mala bamuchekha lukali.

²⁵Ne kakhali enyuma we babaandu khurusibwa enje, Yesu engila munju amutiila kumukhono mala omukhaana chana oyo enyokha.

²⁶Kamakhuwa ke sikholwa siene esio kasalanila mu ngoongo choosi.

²⁷Yesu nga aama abwenao eseenda abweeni, babofu babili bamuloondakho, ne baloma bali, “Mwana owa Daudi khukholele siisa!”

²⁸Yesu nga engila munju, babofu babili chana abo bamwichakho, mala Yesu abareeba ali, “Musuubila muli ese nyala namuonia enywe?” Bamukobosia bali, “Yee Omwami!”

²⁹Nio atiila khu moni chabwe, ne aloma ali, “Lekha kakholekhe khwinywe khuloondekhana ne lisuubila lienywe!”

³⁰Mala babona. Yesu abakaania lukali ali, “Mukhaboolelakho omundu yesi yesi kano tawe!”

³¹Ne kakhali nga bamao basalanisia efuma yewe mu sibala siene esio sioosi.

³²Nga babaandu abo baba ne bali khabeecha, babaandu babaandi bamureerera omundu owaanda lulimi sikila aba ne sisieeno.

³³Ne enyuma we khurusibwamo sisieeno omundu owaanda lulimi oyo aarakikha khulomaloma, mala babaandu bauka, ne baloma bali, “Sisiindu siosi siosi nga sino siri sikhabonekhakho mu Isiraeli tawe!”

³⁴ Ne kakhali Bafarisayo baloma bali, “Arusia bisieeno mu maani ke kusieeno kukhulu.”

³⁵ Mala Yesu abotookhelela ne khukeniia mu ngoba chimboofu ne birekere, ne ekisia mu masinakooki ne khukhwilwacha Elomo Endayi eye bubwami bwe mwikulu, ne khuonia bulwaale bwoosi, ne butekhele bwoosi.

³⁶ Nga abona babaandu bakali, abakholela siisa, sikila baba beendekheleele ne lundi buyeeti mbao, bali busa nga kamakheese kakhali no mwaayi tawe.

³⁷ Nio aboolela babeeka bewe ali, “Likesa lili likali, ne kakhali bakholi bali bakeekhe.

³⁸Nono saba Omwami omwene likesa arume bakholi bache mwikesa.”