Read lubukusu Mk. 1 Bible Online

Mk. 1 - lubukusu bible

Mk. 1

¹Lirakikha lie Lomo Endayi eya Yesu Kristo Omwana owa Wele

² nga omung'oosi Isaya ne aandika ali, Wele aloma ali, “Ndaruma Omurumwa wase ebweeni wowo, khu khurekekhera ewe engila.”

³ Kumumilo kwo mundu kulomela mu sichiimi kuli, “Rekekha kumuyila kwo Mwami, kololosia chingila chewe nicho acha khubirirakho!”

⁴Nio Yoana Omubatiisi abonekha mu sichiimi ne elwacha libatiisia lie liliekanila ne khubeelwa bubwoni.

⁵Babaandu bakali khukhwama mu sibala sie Buyuda ne mu lukoba lwa Yerusalemu becha khumurekeeresia. Beyama bubwoni bwabwe, mala ababatiisia mu luuchi lwa Yoritani.

⁶ Yoana efwaraanga chingubo che bufuumbo bwe ngamia, ne kumusiipi kwe lisielo mu sibuno, ne biakhulia biewe biaba chisike ne bubuukhi bwe mundaa.

⁷Elwacha ne aloma ali “Omundu oliicha enyuma wase ali omukali khu khukhila ese. Se nolaana khukhwinama aasi ngangulule biraaro biewe tawe,

⁸ese mubatiisia enywe mu meechi, ne naye akhamubatiisie enywe mu Roho Omutakatifu.”

⁹Mu ndaalo echo Yesu echa khukhwama Nasareti mu sibala sia Kalilaya, mala Yoana amubatiisia mu Yoritani.

¹⁰Abwene ne abwene nga Yesu ne arura mu meechi, abona likulu liekuulwe mala Roho amwikhakho nga liuusi.

¹¹Kumumilo kwauliilikhana khukhwama mwikulu ne kuloma kuli, “Ewe oli Omwana wase Omusiime. Nasiimisibwe nawe.”

¹²Abwene ne abwene Roho amuyila mu sichiimi,

¹³ nimwo aamenya khu ndaalo kamakhumi kane, Sietani ne amukhaka. Chisaang'i che mundaa chosi chabaamo, ne kakhali malaika beecha bamuyeeta.

¹⁴Enyuma wa Yoana khuaambwa, Yesu aacha mu Kalilaya mala elwacha Elomo Endayi eya Wele

¹⁵ ali, “Siise siolile, ne bubwami bwa Wele buli siimbi! Yekanila bubwoni bwenywe mala musuubile mu Lomo Endayi yino!”

¹⁶Nga Yesu akeenda khu sikiingi sie nyanja eya Kalilaya, abona banaabi babili, Simoni ne wandaaye Andereya banaaba ching'eeni ne lutiimba.

¹⁷Yesu ababoolela ali, “Nondekho mala ndamwekisia khu naaba babaandu,”

¹⁸abwene ne abwene balekha chindiimba chabwe bacha naye.

¹⁹Nga ne esendakho atiiti, abona wandaaye ne wandaaye babili lundi, Yakobo ne Yoana basoleeli ba Sebetayo. Baba mu liaaro liabwe bang'oona chindiimba chabwe.

²⁰Ao ne ao Yesu ababona, abalaanga; mala balekha raarawabwe Sebetayo mu liaaro ne bakholi mala nibo bacha ne Yesu.

²¹Yesu ne babeeka bewe bacha mu lukoba lwa Kaperinaumu, oli endaalo eya sabato yoola acha mu sinakooki arakikha khukhwikisia.

²² Engila niyo ekisiliangamo yakila babaandu babamuulila bauka lukali. Sikila se aaba nga babekisia be Lilaka tawe, ne kakhali, ekisianga ne bunyali.

²³Siise esio omundu owaba ne sisieeno echa mu sinakooki mala apa lulwang'a ali,

²⁴“Wenya siina khwifwe, Yesu owa Nasareti? Oli ano khu khubunia efwe? Nakhumanyile ndi ewe oli Omurumwa owa Wele Omutakatifu!”

²⁵Yesu arafwira sisieeno esio ali, “Sila mala orure mu mundu yuno!”

²⁶Sisieeno esio siasisiikha omundu oyo lukali, siapa lulwang'a mala siamururamo.

²⁷Babaandu boosi barangararwa mala barakikha khuloma bali, “Makana siina kano? Lundi bareebana bali se kanyala kaaba kamekisio kamaya tawe ku? Omundu yuno ali ne bunyali bwe khuyibila bisieeno mala bimuria!”

²⁸Mala kamakhuwa ka Yesu kasalanila khangu buli abuundu mu sibala sia Kalilaya.

²⁹Yesu ne babeeka bewe, alala ne Yakobo ne Yoana barura mu sinakooki mala bacha waaba Simoni ne Andereya.

³⁰Masalaawe owa Simoni aaba ne bulwaale bwe kumureengo mala aba akonile khu sitanda, nga Yesu ne olao bamuboolela ko muloosi oyo.

³¹Acha, amutiila kumukhono, amuyeeta khukhwinyokha mala aona kumureengo arakikha khu baliisia.

³²Nio nga enyanga yakwa, babaandu bareera khu Yesu balwala bulwaale buli lukano nende be bisieeno.

³³Babaandu be mu lukoba olwo boosi bebuusia ebweeni we nju eyo.

³⁴Yesu aaonia babaandu bakali ba baaba ne bulwaale lukano na lukano, lundi aoona bisieeno bikali. Se aanakho bubweyaangu khu bisieeno bilome siindu siosi siosi tawe, sikila biaba biamumanya.

³⁵Mu makhelebeende, enje ne siili khubayuukha tawe Yesu enyokha arura munju acha enje we lukoba abuundu niio omundu akhaba tawe, asabilao.

³⁶Ne Simoni ne basaale bewe barura bacha khumuyiima.

³⁷Ne nga bamunyoola bamuboolela bali, “Buli mundu alakhuyiimanga ewe.”

³⁸Nio Yesu abakobosia ali, “Lekha khuche mu birekere bibiindi biili siimbi. Khoya nilwache burume mu birekere ebio bioosi, sikila kano kakakila nio necha.”

³⁹ Khwako akeenda mu Kalilaya mwoosi ne elwacha burume mu chisinakooki ne khurusia bisieeno.

⁴⁰Omundu we kamakele echa khu Yesu, asikama aasi, amwekoonjelela ali, “Waaba ne wenya khu khumbonia, onyala wambonia.”

⁴¹Nio Yesu amukholela siisa sikali, amutilakho mala amukobosia ali, “Nenya, ona!”

⁴²Abwene ne abwene, omundu oyo aona bulwaale bwe kamakele.

⁴³Nio Yesu amuboolela arekukhe khangu

⁴⁴ ne khumutanyilila ali, “Rekeeresia, okhaboolelakho omundu yesi yesi kamakhuwa kano tawe. Ne kakhali yiluungikha oche khu musaayi akhubone khukhwekesia buli mundu abuwaanga mbo ewe waonile, mala oaane embosio niyo Musa alaka.”

⁴⁵Nio omundu oyo acha mala arakikha khusalanisia kamakhuwa kano buli abuundu. Ng'ali amubuyila abiriirira akhola Yesu khunyala khucha mu lukoba olwo abuwaanga tawe. Ne kakhali ekhala abwikisi yeng'ene mala babaandu becha niio ali khukhwama buli lubeka.