Read lubukusu Mk. 11 Bible Online

Mk. 11 - lubukusu bible

Mk. 11

¹Nga baba ne becha Yerusalemu embi ne lukoba lwa Betifake ne Betania, boola khu sikulu sia Miseituni. Yesu aruma babeeka bewe babili ebweeni

²ne kamalaka kano, “Cha mu sirekere siili ebweeni esio, nga mwolamo kane munyoole baboyile epunda eng'ana niyo bakhatimilakho tawe, kikangulule mala munderere.

³Omundu yesi yesi aaba ne amureeba sikila ne mukikangulula, muboolele muli Omwami akienya mala alakikobosia khangu.”

⁴Nio bacha banyoola epunda yino khu ngila bakiboyile a muliango. Nga yaba ne bakikangulula,

⁵ba baaba ne bemileo bareeba bali, “Siina sikila ne mulikho mukangulula epunda yino?”

⁶Nio bakobosia busa nga Yesu aba ne ababooleele, mala abo bafukiilila babeeka khucha nayo.

⁷Bareera epunda niio Yesu ali, bamwaata chingubo chabwe khu mukoongo kwayo, mala Yesu akiikhalakho.

⁸Babaandu bakali baala chingubo chabwe khu ngila ne babaandi bafuna chisakia che kamasaafu bachisalanisia khu ngila.

⁹ Babaandu ba baaba ebweeni ne nyuma barakikha khuyokela bali, “Hosana, ali ne chikhabi owicha mwisina lio Mwami.

¹⁰Wele aane chikhabi khu Bwami bubwiicha bwa Paapa wefwe omwami Daudi, Hosana khuyo oli angaaki! Omwami afume!”

¹¹Yesu engila mu Yerusalemu, acha mu Lukaangu alola buli siindu sisiabamo. Sikila bwaba bwelabuule, arura acha mu lukoba lwa Betania ne babeeka bewe ekhumi na babili.

¹²Endaalo ekhola khabili Yesu aba ne njala nga baba ne baama e Betania.

¹³Abona kumutuli sinaao kwechuule kamasaafu, acha alolakho ne kulikho chinduli, ne nga ola siimbi anyoola kamasaafu kong'ene. Sikila se siaba siise sie khukhwaama tawe.

¹⁴Yesu aboolela kumutuli okwo ali, “Se aliio yesi yesi olilia enduli khukhwama khwiwe lundi tawe!” Babeeka bewe baulila naloma ario.

¹⁵Nga boola mu Yerusalemu, Yesu engila mu Lukaangu mala atimania boosi ba baaba ne bakula lundi ne bakusia. Afumalikha chimeesa che baboofuli be chirupia ne chindebe chaabo ba baaba ne bakusia kamauusi,

¹⁶mala khwenya omundu yesi yesi asute siosi siosi a luuya we Lukaangu tawe.

¹⁷ Nio ekisia babaandu ali, “Se liaandikwa lili, ‘Enju yase elilaangwa enju eye lisaba khu baandu Be Chikholo choosi’ tawe ku? Ne kakhali enywe mwakikholile libina lie banuuli!”

¹⁸Basaayi bakhulu ne baandiki nga baulila kano barakikha khuyiima chingila che khukhwira Yesu. Baba ne buuri khu niye sikila babaandu boosi bauka lukali khulwe liliekisia liewe.

¹⁹Oli bwelabula Yesu ne babeeka bewe barura mu lukoba.

²⁰Nga ne babirao kumutikhinyi, babona kumutuli okwo kwomile ne chiisi chosi.

²¹Petero akhebulila kakekholekhana mala aboolela Yesu ali, “Omwami, lola! Kumutuli nikwo walaamile kwomile.”

²²Yesu aabakobosia ali, “Ba ne lisuubila mu Wele.

²³ Musuubisia ndi yesi yesi oboolela sikulu sino khusiuukha siche mu nyanja mala se ali ne liaayaaya mu mwoyo kwewe tawe, ne kakhali asuubile ali nilio alomaloma licha khwekholekha, lilienelio acha khukholelwa.

²⁴Khwako muboolela enywe ndi, ne osaba sisiindu mwisaba, suubila oli wasinyoolile lundi olaebwa nisio osabile.

²⁵ Lundi nga nilwo wima ne osaba, beela omundu yesi yesi khu siindu siosi siosi, nio Raraawenywe ooli mwikulu amubeele bubwoni bwenywe. [

²⁶Ne mwaba ne mukhabeela babaandi tawe, aakhaba Raraawenywe ooli mwikulu yesi se alamubeela bubwoni bwenywe tawe.”] [5]

²⁷Lundi boola mu Yerusalemu, nga Yesu aba ne akeenda mu Lukaangu, basaayi bakhulu, baandiki ne babemeelesi bamwichakho

²⁸bamureeba bali, “Bunyali siina nibwo oli nabwo khukhola bibiindu bino? Naanu owakhuelesia bunyali buno?”

²⁹Nio Yesu abakobosia ali, “Ndamureeba busa lireeba lilala, ne mwaba ne mungobosia ndamuboolela bunyali siina nibwo ndi nabwo bwe khukhola bibiindu bino.

³⁰Mboolele, Yoana anyoola waena bunyali bwe khubatiisia, bwaama khu Wele namwe khu mundu?”

³¹Barakikha khuyingana babeene ne babeene bareebana bali, “Khulaloma khuli siina? Ne khuloma khuli, ‘Bwaama khu Wele,’ alaloma ali, ‘Siina sikila ne mukhaamusuubila niye tawe?’

³²Ne kakhali khunyala khwaloma khuli, ‘Khukhwama khu mundu’ ku?” (Baba ne buuri khu baandu, sikila buli mulala aamanya ali Yoana aaba omung'oosi.)

³³Khwako likobosia liabwe khu Yesu liaba lili, “Se khumanya tawe.” Yesu aabakobosia ali, “Aakhaba ese seesi se muboolela ndi na bunyali siina khukhola bibiindu bino tawe!”