Read lubukusu Mk. 12 Bible Online

Mk. 12 - lubukusu bible

Mk. 12

¹ Nio Yesu abalomalomakho mu lukano ali, “Abao omundu mulala owabiaala liruuti lie kimisabibu, asira lumako abotookhelesia, ayaba liloo lie khukhamululilamo endali, mala ombakha endeleelwa eye khulindilakho. Aelesia liruuti elio bakholi baliemo, mala arura mungo acha lukeendo mu sibala sisiindi.

²Oli siise sie khubuta chisabibu aruma nasioobi khu bakholi be mwiruuti anyoole sitonyi siewe.

³Bakholi abo batiila nasioobi bamupa mala bamuoona akobolayo makhono mataaka.

⁴Omwene liruuti aruma nasioobi okundi, bakholi chana bamwara kamakuma ne khumuambia chisoni.

⁵Omwene liruuti aruma nasioobi okundi naye bamwiira mala bakhola bario khu bakali khu khupa balala ne khukhwira babaandi.

⁶Omundu owarama khurumwa aba omusoleeli wewe omusiime. Ekhumaliilikha aruma omwana wewe yuno khu bakholi bano aaloma ali, ‘Ndi nasuubi kane barie omwana owase.’

⁷Bakholi chana baboolana bali, ‘Yuno omwana wewe, yiicha khumwire, mala kimiaandu kiewe kino kilaba kikiefwe!’

⁸Nio batiila omwana oyo bamwiira mala bamwaata kumubili kwewe enje we liruuti.”

⁹Yesu abareeba ali, “Nono omwene liruuti alakhola siina? Alecha mala eere bakholi be mwiruuti abo ne khuelesia liruuti babaandu babaandi.

¹⁰ Ng'ali mwasomakho liiandiko lino: ‘Libaale nilio babombakhi baloba bali se lili ne bukhala tawe, liliene ne liliene liabeele lie bukhala khukhila koosi.

¹¹Wele Omunyali Owa Bioosi niye owakhola kano, kali ke khuukia mu moni chefwe.’ ”

¹²Babemeelesi be Bayaudi bakhaka khutiila Yesu, sikila bamanya bali Lukano luno luli khu nibo. Ne kakhali baba ne buuri sikila babaandu babaao bakali, khwako bamulekha bacha.

¹³Bafarisayo balala ne babaandu babaandi be kumukaanda kwa Herodi barumwa khukhaka Yesu ne kamareeba.

¹⁴Becha niio ali baloma bali, “Omwekisia, khumanyile khuli olomanga kang'ali, se wieendekhelelanga niko baandu bebaasia tawe, se winananga khumanya naanu niye naanu tawe, ne kakhali wekisianga bung'ali bwe kamakhuwa niko Wele enya khu baandu. Khuboolele, kali ng'ali bali khufunanga Lilaka liefwe khuruunga busuuru khu mwami owe Burumi? Khuruunge namwe tawe?”

¹⁵Yesu anyoa abona kumureko kwabwe mala abakobosia ali, “Siina sikila ne mukhaka? Reera erupia ndole.”

¹⁶Nio bamureerera ndala mala abareeba ali, “Kumurwe ne lisina liilikho bia naanu?” Bamukobosia bali, “Bia Kaisari.”

¹⁷Yesu abakobosia ali, “Khwako, elesia Kaisari biili bia Kaisari ne eelesia Wele biili bia Wele.” Mala baba ne liuka khu Yesu.

¹⁸ Balala khu Basatukayo, balomanga bali babaandu se balilamukha mu bafu tawe, bacha khu Yesu baloma bali,

¹⁹ “Omwekisia, Musa akhuandikila efwe Lilaka lino: ‘Omundu aba ne afwa mala aalekha omukhasi okhali na mwana tawe, wandaaye owo mundu oyo khukhwola eele khu namulekhwa yuno nio banyoole babaana balaangilwe khu mundu owafwa oyo.’

²⁰Babao basoleeli saba, omukhulu areera omukhasi mala afwa busa khaba mwana tawe.

²¹Owa khabili eela khu mukhasi yuno mala yesi aafwa busa ario khaba mwana tawe, kaaba kario akhaba wandaaye owa khataru aafwa ario.

²²Kaaba kario khu boosi. Boosi saba beela khu mukhasi yuno mala bafwa bario mwana tawe, ekhumaliilikha omukhasi chana yesi aafwa.

²³Babaandu bano ne balilamukha, omukhasi yuno aliba owa naanu? Sikila boosi saba baba baseecha bewe.”

²⁴Yesu abakobosia ali, “Mwekhiikhile! Kano kakila ne mukhamanyile kamaandiko namwe bunyali bwa Wele tawe.

²⁵Sikila nga bafu ne bakhalamukhe, baliba nga malaika mwikulu mala se bakhareerane tawe.

²⁶ Khuloondekhana ne bafu khulamukha, khaba enywe mukhasomakho mu Sitabu sia Musa kamakhuwa ke sichakha sisiaba ne siyia tawe ku? Mu bweene omwo kaandikwa kali Wele aboolela Musa ali, ‘Ndi Wele owa Aburahamu Wele owa Isaaka lundi Wele owa Yakobo.’

²⁷Ali Wele owe balamu se ali owe bafu tawe, mwekhiikhile lukali po.”

²⁸ Omwekisia owe Lilaka abao owaulila embakha eyo. Abona ali Yesu akoboosie Basatukayo likobosio lilayi, khwako echa niio Yesu aba areeba ali, “Lilaka siina likhila kamalaka koosi?”

²⁹ Yesu aakobosia ali, “Liikhila koosi nilieli, ‘Ee Isiraeli rekeeresia! Omwami Wele, Wele wefwe, Omwami ali mulala.

³⁰Siima Omwami Wele wowo ne kumwoyo kwowo kwoosi, ne liiba liowo lioosi, ne kamebaasio kowo koosi lundi ne kamaani kowo koosi!’

³¹ Lilaka lia khabili khukhila koosi nilio lino: ‘Siima owasio nga wesiima wamwene.’ Mbao lilaka liliindi liboofu liikhila kabili kano tawe.”

³² Omwekisia owe Lilaka aboolela Yesu ali, “Walomile bulayi Omwekisia. Lili lia ng'ali nga noboola oli Omwami yeng'ene niye Wele lundi mbao wele okundi tawe ne akhali niye.

³³ Khukhwola omundu asiime Wele ne kumwoyo kwewe kwoosi, ne kamebaasio kewe koosi, ne kamaani kewe koosi; lundi khukhwola asiime owasie nga esiima omwene. Lili liboofu khuria kabili kano khukhila khurusia biianwa bie bibiaayo nende bibiindu bie khukhwosia khu Wele.”

³⁴Yesu abona nga nilwo akobosie sikesi mala amuboolela ali, “Se oli aleeyi khukhwama khu Bwami bwa Wele tawe.” Enyuma wa kano se abao yesi yesi owanyindaalila khureeba Yesu lireeba liosi liosi tawe.

³⁵Nga nilwo Yesu aba ne ekisia mu Lukaangu areeba lireeba ali, “Linyalikhana liriena baandiki khuboola bali Kristo aliama mu lisaaye lia Daudi?

³⁶ Daudi omwene aloma khubirira mu Roho Omutakatifu ali, ‘Omwami aaboolela Omwami wase ali, Yikhala ano khu mukhono kwase kumuseecha, khukhwola nga ndara basiku bowo boosi aasi mu bikele biowo.’

³⁷Daudi omwene amulaanga ali, ‘Omwami,’ nio kaba kariena Kristo ama mu lisaaye lia Daudi?” Babaandu bakali baba barekeeresie Yesu ne busangaafu.

³⁸Nga nilwo aba ne ekisia aloma ali, “Loleelela lukali baandiki babasiima khukeendela chikaanjo ne khukhesibwa mu ngila eye buuri khu soko.

³⁹Barobora chindebe chindayi mu sinakooki ne abuundu we lukoosi mu naikara.

⁴⁰Barumikhira bubweyaangu buno khukhwila khu banamulekhwa ne khubanuula kimiaandu kiabwe mala beyekesia mu khusaba lisaba lileeyi. Siiukuumo siabwe siliba sikali lukali.”

⁴¹Nga Yesu aaba ne ekhaale siimbi ne lisanduku lie libiikhilo lie Lukaangu, aloleelela babaandu nga barusianga biianwa, baiinda bakali baraamo chirupia chingali.

⁴²Ekhumaliilikha namulekhwa omutaambi echa araamo bisimiri bia koopa bibili bitiiti, bibioola erupia ndala.

⁴³Nio Yesi alaanga babeeka bewe alala mala aloma ali, “Ng'ali muboolela enywe ndi, namulekhwa yuno areere mwisanduku lie siianwa lino sikali khukhila omundu okundi yesi yesi.

⁴⁴Sikila babaandi bareeremo nisio abeele babikhile khu buiinda bwabwe, ne kakhali namulekhwa yuno, mu mutaambo kwewe areeremo bioosi nibio abeele nabio, arusiisie sioosi nisio abeele nasio khulwe khumenya.”