Read lubukusu Mk. 13 Bible Online

Mk. 13 - lubukusu bible

Mk. 13

¹Nga Yesu aaba narura mu Lukaangu, omweeka mulala aaloma ali, “Omwekisia, bona kamabaale kano, ne chiinju chino, bili bie liiukia!”

²Yesu akobosia ali, “Mwaboone chinju chimboofu chino mbao libaale akhaba lilala liong'ene likharame abuundu alio tawe. Buli lilala likhamwaatwe aasi.”

³Yesu aba ekhaale khu Sikulu sia Miseituni sisialoleelelana ne Lukaangu, nio Petero, Yakobo, Yoana ne Andereya bamwichakho mu bwikisi,

⁴Bamureeba bali, “Khuboolele kano kalibao liina, lundi khuboolele siina siikhabe simanyisio khukhwekesia sili siise siolile sie bibiindu bino khukhwekholekha.”

⁵Yesu abakobosia ali, “Ba barekeerefu, ne mukhafukiilila omundu yesi yesi amubea enywe tawe.

⁶Babaandu bakali bakheche mwisina liase ne baloma bali ‘Niise niye’ mala balibea babaandu bakali.

⁷Lundi mukhanaanisibwa ne muulila luyoka lwe liie siimbi ne aleeyi tawe. Bibiindu birio khukhwola biekholekhe, ne kakhali se lili bali aba sisiakamo siolile tawe.

⁸Bibala bicha khupana, bubwami ne bubwami bulebwaakalana, khuliba ne khuterema khwe sibala buli abuundu, lundi khuliba ne njala. Bibiindu bino bili busa nga omukhasi olumwa ne buloonda.

⁹ “Enywe mwabeene khukhwola mube barekeerefu. Bakhamutiile ne khumuyila mu koti, bakhamupile mu sinakooki, mukheme ebweeni we baruki ne babaami sikila ese, khubaboolela Elomo Endayi.

¹⁰Ne, sisiakamo ne sikhoola tawe Elomo Endayi khukhwola yilwachibwe khu baandu boosi.

¹¹Ne bamutiila bamuyila mu koti, mukheendekhelela siise ne sikhoola khu niko kane mulome tawe. Siise ne siolile loma liosi liosi nilio muelesiibwe sikila kamakhuwa niko mucha khuloma se kali kakenywe tawe, kakhaame khu Roho Omutakatifu.

¹²Babaandu baliaana bawandaayabwe babene khukhwirwa, ne bapaapa boosi bakhakhole bario khu babaana babwe. Babaana balikaluukhana khu basaasi babwe mala babakhole berwe.

¹³ Boosi balimubiila enywe sikila lisina liase. Ne kakhali oyo owikhaliilikha khukhwola khusiakamo niye olionisibwa.

¹⁴ “Mukhabone ‘Sibiilisio sie Lilionaka’ siemile niio sikhenyibwa tawe. (Likhebusia khu baasoma: manyilisia niko siboola). Abwenao abo bali mu Buyuda khukhwola belukhe bache mu ngulu

¹⁵ omundu oli khunju yewe khukhwola alekhe khu mala siise bali ekhe engile munju khubukula sisiindu siosi siosi ache nasio tawe.

¹⁶Omundu oli mu mukuunda akhacha munju khubukula engubo yewe tawe.

¹⁷Kaliba kamabi lukali khu bakhasi bali ne bisoombo ne bamaayi bali ne babaana batoro.

¹⁸Saba khu Wele muli bibiindu bino bikhakholekhana mu munaane tawe!

¹⁹ Sikila siibi sie chindaalo ng'enecho sikhabe siboofu khukhila sisiindi siosi siosi khukhwama mu lirakikha nga Wele ne abaang'ana sibala khukhwola siise sino. Lundi se silibao siibi sisiindi sikali lukano luno tawe.

²⁰Ne kakhali Omwami embiyisie chindaalo echo, abanga sakholile ario tawe, andi mbao oliona tawe. Khwako aboombisie chindaalo khulwe barobore bewe.

²¹“Ne omundu yesi yesi nakhuboolela ali, ‘Lola Kristo oyu siina’ namwe ‘Lola niyo oyo’ okhamusuubila tawe.

²²Babelaanga kristo ne bang'oosi be bubeeyi baleecha. Balakhola kamayia ne kamakhuwa ke khuukia khukhwenya khubea akhaba barobore ba Wele, ne kanyalikhana.

²³Ba meso, namubooleele buli siindu biise ne bikhoola tawe.

²⁴ “Mu ndaalo echo siibi nesiweleo, enyanga elimaliia ne kumwesi nakwo se kulikhosia tawe,

²⁵ ching'enieesi chilikwa khukhwama khwikulu, ne bunyali bwe mu ngaaki mwe sibala bulirusibwa niio bubechanga.

²⁶ Abwenao Omwana wo Mundu alibonekha mu maleesi ne alikho echa ne bunyali bukali ne luyali.

²⁷Akharume malaika mu mbeka chine che sibala khubuusia barobore ba Wele khukhwama khundulo khwe sibala khukhwola khukhundi.

²⁸“Lekha kumutuli kumwekisie lilieka. Chisakia chakwo nechinenekha kamasaafu mala chirakikhe khu khukhumusia, mu manya muli aba siimiyu siolile.

²⁹Mu ngila ng'eneyo, ne mubona bibiindu bino ne bikholekhana, mulamanya muli siise siolile.

³⁰Khebulila muli bino bioosi bikhekholekhane babaandu baliio luno ne bakhaafwa boosi tawe.

³¹Likulu ne liloba biliwao, ne Elomo yase se liwao tawe.

³² “Se aliio omanyile endaalo namwe esaa tawe, akhaba bamalaika mwikulu namwe Omwana se bamanyile tawe. Paapa yeng'ene omanyile.

³³Lindiilila, ba meso, sikila se mumanyile siise sie khukhwicha tawe.

³⁴ Ali nga omundu owalekhela bakholi bewe kimilimo ne omuliindi khuliinda silibwa acha lukeendo.

³⁵Ba meso, sikila se mumanyile siise nisio omwami wenju alichilamo tawe, wakana ekolooba namwe mu siilo akari namwe mumakhelebeende namwe enyanga nesoa.

³⁶Ne aaba ne echa nokhamanyile, akhakhola ario akhunyoola nokona tawe.

³⁷Niko muboolela enywe mboolela babaandu boosi ndi, ba meso!”