Read lubukusu Mk. 14 Bible Online

Mk. 14 - lubukusu bible

Mk. 14

¹ Chaba charamire chindaalo chibili khukhwola khu Naikara eye Epasaka ne khulia Kumukaati kukhalimo limela tawe. Basaayi bakhulu ne baandiki be Lilaka baba bayiima engila eye khuamba Yesu mu bwikisi mala bamwire.

²Baaloma bali, khukhamuaamba siise sia naikara tawe, babaandu bakhola bario bakhola sisiayuumba.

³ Yesu aba mu Betania munju eya Simoni, owaba owalwaala kamakele. Nga Yesu aba ne alikho alia, omukhasi echamo ne kamafura kaunya bulayi ke bukusi bwe angaaki lukali kakaama khu narito kechuule mu mwendo. Afuunula kumwendo okwo mala achukha kamafura kano khumurwe kwa Yesu.

⁴Babaandu balala ba babao baambwa lirima mala baboola bali, “Sifuno sie khusasia kamafura kano sili siina?

⁵Abele kanyala kakusibwa chirupia chibira chimia chitaru mala chiaanwe khu bataambi.” Mala babiiyia omukhasi yuno mu burafu.

⁶Ne kakhali Yesu aaloma ali, “Mulekhe abe! Siina sikila ne mu munaania? Akholile sisiindu silayi khwise.

⁷ Buli lwoosi enywe muli ne bataambi, ne siise siosi siosi nisio mwenya khubayeeta munyala mwabayeeta. Ne kakhali se muliba nase buli lwoosi tawe.

⁸Akholile niko anyala, ambakhile kamafura khukhwerekekhera siise sie lisiikhwa liase.

⁹Nono, ng'ali muboolela enywe ndi buli osi niio Elomo Endayi yino echa khwilwachibwa mu sibala sioosi, niko omukhasi yuno akholile kaliboolwa khumukhebulila niye.”

¹⁰Nio Yuda Isikarioti, mulala khu beeka ekhumi na babili, acha khu basaayi bakhulu khukhwenya khuchaama Yesu.

¹¹Baba ne busangaafu khuulila niko ababoolela mala bamulaka khumuelesia chirupia, khwako Yuda arakikha khuyiima bubweyaangu bwe khuaana Yesu khu nibo.

¹²Endaalo eye khurakikha Naikara eye kumukaati kukhalimo limela tawe, endaalo niyo bererangamo kamameeme ke siakhulia sie Epasaka, babeeka ba Yesu bamureeba bali, “Wenya khuche khukhurekekhele siakhulia sie Epasaka waena?”

¹³Yesu aruma babili khu nibo ne kamalaka kano, “Cha mu Lukoba mala mulakaanana omundu asutile esoongo eye kameechi. Muloondekho

¹⁴khukhwola munju nimwo alacha, mala mureebe omwene enju muli, omwekisia areeba ali, ‘Lusiro siina nilwo ese ne babeeka baase khulalilamo siakhulia sie Epasaka?’

¹⁵Alamwekesia lusiro luboofu lwe mukorofa nilwo barekeekhe. Mu bwenomwo khurekekhele buli siindu.”

¹⁶Babeeka abo bacha mu lukoba mala banyoola buli sisiindu nga Yesu nababooleele mala barekekha siakhulia sie Epasaka.

¹⁷Nga nilwo bwelabula Yesu echa ne babeeka bewe ekhumi na babili.

¹⁸ Nga baba ne bali khusialwa, Yesu aloma ali, “Ng'ali muboolela enywe ndi mulala khwinywe olikho olia nase alanjaama.”

¹⁹Babeeka besiindukha babona bubi mala buli mundu arakikha khumureeba ali, “Manya oloma ese?”

²⁰Yesu abakobosia ali, “Alaba mulala khwinywe nga muli ekhumi na babili, oyo olaronganga ne nase mu sibuumba silala.

²¹Omwana wo Mundu akhafwe nga ne kaandikwa khu niye, ne silaamo siliba khu mundu oyo omuchaama! Nabulayi andi omundu mwene oyo se asaalwa tawe!”

²²Nga nilwo baba ne balia, Yesu abukula kumukaati apa orio khu Wele akumesulamo aelesia babeeka bewe mala ababoolela ali, “Bukula mulie, kuno kuli kumubili kwase.”

²³Lundi abukula sikoombe siilimo endali, oli amala khu khupila Wele orio, abaelesia mala boosi banywa.

²⁴ Nio Yesu aloma ali, “Kano kali kamafuki kase ke ndakaano kachichukha khulwe babaandu bakali.

²⁵Ng'ali muboolela enywe ndi, se ndinywakho lundi endali eye kumusabibu yino tawe khukhwola endaalo niyo ndinywela endali embia mu Bwami bwa Wele.”

²⁶Nio bemba kumwenya mala barura bacha khu sikulu sia Miseituni.

²⁷ Yesu ababoolela ali, “Mweesi mulelukha mala mundekhe seng'ene, sikila liiandiko liboola lili, ‘Ndeera omwaayi mala kamakheese kalasalanile.’

²⁸ Ne enyuma we khulamukha ndacha e Kalilaya enywe ne mukholayo tawe.”

²⁹Petero akobosia ali, “Se ndikhulekha tawe, akhaba boosi ne bakhulekha.”

³⁰Nio Yesu aboolela Petero ali, “Ng'ali khuboolela ndi, olanjekaana etaaywa ne khakholiokha khukhwola khabili siilo sia luno tawe, olanjekaana khukhwola khataru oli se umanyile tawe.”

³¹Ne kakhali Petero akobosia naandalasia lukali ali, “Akhaba ne lili lifwa se ndikhwikaana ewe tawe.” Babeeka babaandi bosi baloma bario.

³²Boola abuundu alaangwa Ketisemani mala Yesu aboolela babeeka bewe ali, “Yikhala ano ese ndikho nja khusaba.”

³³Abukula Petero, Yakobo ne Yoana bacha naye. Aaba ne liaayaaya ne liliembeelela likali,

³⁴mala ababoolela ali, “Kumwoyo kwase kwabeleele khubira sikelo khukhwola embi khufwa, khemwikhale ano meso.”

³⁵Esendakho abweeni mala aakwa aasi, aasaba ali, ne kanyalikhana akhabirira mu saa eye sinyaasio esio tawe.

³⁶Aachiililila khusaba ali, “Paapa, bibiindu bioosi binyalikana khwiwe. Ndusirieo sikoombe sie sinyaasio sino, ne likhaba lilienya liase tawe, ne kakhali libe lilienya liowo.”

³⁷Nio akobola anyoola babeeka bataru chana bakona. Aboolela Petero ali, “Simoni, okona? Se onyala wekhala meso akhaba esaa ndala tawe?”

³⁸Nio ababoolela ali, “Ba meso, mala musabe muli mukhakhakwa tawe. Kumwoyo kwenya ne kakhali kumubili se kulimo kamaani tawe.”

³⁹Lundi Yesu akobolayo asaba, narumikhira kamakhuwa kameene ne kameene.

⁴⁰Oli echa anyoola babeeka bewe chana ne bali mwilo, akhaba khumoka khwong'ene se banyala tawe lundi se baamanya niko banyala bamuboolela tawe.

⁴¹Nga ne akobola lukhola khataru ababoolela ali, “Musiuluukha ne khukona? Mwanyalile murio. Esaa yolile, lola, Omwana wo Mundu nono alaelesibwa mu bunyali bwe babooni.

⁴²Yinyokha, khuche. Lola ounjaama oliile!”

⁴³Yesu aba asilomaloma ne Yuda mulala khu beeka ekhumi na babili oola. Babaandu bakali ba baaba ne Yuda baba basutile kimibano ne chiruungu. Basaayi bakhulu, baandiki ne babemeelesi baba babarumire.

⁴⁴Omuchaami aba abaelesie khale simanyisio ali, “Niye kane nekhoyele ne khumwikwayila aba niye mwenya. Mutiile muche naye.”

⁴⁵Nga Yuda oola, acha khu Yesu amwekwayila mala amulaanga ali, “Omwami.”

⁴⁶Nio baamba Yesu.

⁴⁷Ne mulala khwaabo ba baaba ne bemileo, achoola embalu mala aarema liiru lia nasioobi owo Omusaayi Omukhulu Lukali liakwa.

⁴⁸Nio Yesu abareeba ali, “Munyala mwecha ne kimibano ne chiruungu khu khumbamba nga ese oli omunuuli?

⁴⁹ Buli lwoosi nabechanga nanywe mu Lukaangu ne nekisia, ne se mwambamba tawe. Ne kakhali khukhwola liiandiko lichusibwe.”

⁵⁰Nio babeeka boosi belukha bamulekha.

⁵¹Omusoleeli mulala owaba ne eboyile esuuka eya katani yong'ene aloonda khu Yesu enyuma. Bakhaka khumuaamba,

⁵²mala atima sichula alekha esuuka chana enyuma.

⁵³Baayila Yesu munju mwo Omusaayi Omukhulu Lukali owe Lukaangu niio basaayi bakhulu boosi, babemeelesi, baandiki baba ne bebuusiisie.

⁵⁴Petero aloondakho enyuma mala acha ola khu luuya lwo Omusaayi Omukhulu Lukali ekhala ne basikari oora kumulilo.

⁵⁵Basaayi bakhulu nende be kumuse boosi bakhaka khunyoola buloli nio bayaale Yesu mala bamwire, mala khubunyoola tawe.

⁵⁶Baloli bakali bakiikhila Yesu, ne kakhali chilomo chabwe chabirana.

⁵⁷Nio babaandu balala benyokha bema baboola bubeeyi khu Yesu bali,

⁵⁸ “Khwamuulila naloma ali, ‘Ndatechula Lukaangu luno lulwombakhwa ne babaandu ne enyuma we chindaalo chitaru ndombakha luluundi lukhombakhwa ne babaandu tawe.’ ”

⁵⁹Kakhaba kario buloli bwabwe se bwafukiilisiana tawe.

⁶⁰Omusaayi Omukhulu Lukali enyokha ebweeni wa boosi areeba Yesu ali, “Se olikho ne likobosio khu niko bakhuyaala tawe? Kali kariena kano?”

⁶¹Ne kakhali Yesu asila busa khumukobosiakho tawe. Lundi Omusaayi Omukhulu Lukali amureeba ali, “Ewe niye Masiiya, Omwana owa Wele owe chikhabi?”

⁶² Yesu akobosia ali, “Yee niise, mala mweesi mulabona Omwana wo Mundu ekhaale kumukhono kumuseecha kwoyo we Kamaani, lundi ne echa mu maleesi ke mwikulu!”

⁶³Omusaayi Omukhulu Lukali etabulaka chingubo chewe aloma ali, “Se khwenya buloli bubuundi tawe!

⁶⁴ Mwaboone embelekeu yewe. Nono mubisia siina?” Nio boosi baapa ekura bali akhoyeele eerwa sikila anyoolekhane ne kamabi.

⁶⁵Balala barakikha khumufuchakho kamare ne khumufuuma chimoni, ne khumupa ne baloma bali, “Buula naanu okhupile?” Basikari bamuaamba mala bamupa chimbi.

⁶⁶Petero aba asiili busa khuluyia, nio mulala khu bakholi bakhaana bo Omusaayi Omukhulu Lukali echa.

⁶⁷Nga ne abona Petero oora kumulilo amuungusa mala aloma ali, “Ewe wesi wabele ne Yesu owe Nasareti.”

⁶⁸Ne kakhali Petero ekaana ali, “Se mumanyile tawe.” Lundi niko olalomalomanga se ngamanyile tawe. Nio acha mu silibwa, mala ao ne nao etaaywa yakholiokha.

⁶⁹Omukhaana chana oyo lundi abona Petero ebweeneyo mala arakikha khuboolela babaandu ba babao ali, “Yuno ali mulala khwaabo.”

⁷⁰Petero ekaana lundi. Siise sitiiti, babemile baboolela Petero lundi bali, “Se onyala wekaana oli se oli mulala khwaabo tawe, sikila wesi wama Kalilaya.”

⁷¹Ne kakhali Petero echuba ali, “Se manyile omundu yuno tawe.”

⁷²Abwenao etaaywa yakholiokha lukhola khabili mala Petero akhebulila nga Yesu ne amuboleele ali, “Etaywa ne khakholiokha khabili tawe, okhanjekaane khataru oli se umanyile tawe.” Mala Petero arundukha alila.