Read lubukusu Mk. 15 Bible Online

Mk. 15 - lubukusu bible

Mk. 15

¹Nga bwasia kumutikhinyi basaayi bakhulu, babemeelesi, baandiki nende be kumuse boosi bakaanana khangu mala bakhola etoloondo. Baboa Yesu kiminyololo mala bamuila khu Pilato.

²Pilato amureeba ali, “Ewe niye Omwami owe Bayaudi?” Yesu akobosia ali, “Ewe walomile.”

³Basaayi bakhulu basitaka Yesu khu biindu bikali,

⁴nio Pilato amureeba lundi ali, “Se okobosiakhomo tawe? Rekeeresia kamasitako kano koosi.”

⁵Yesu khukobosiakhomo likhuwa tawe, mala Pilato auka lukali.

⁶Buli mu Naikara eye Epasaka, Pilato aba ne kumwiima kwe khulekhuula omuboe mulala niye babaandu benyile.

⁷Siise sienesio omundu bali Baraba aba mu siboe ne babaandi ba baaba ne berire babaandu mu siayuumba.

⁸Babaandu bakali bebuusia mala barakikha khureeba Pilato nga kwaba kumwiima kwewe,

⁹abareeba ali, “Mwenya emulekhuulile Omwami owe Bayaudi?”

¹⁰Aamanya bulayi bwene ali basaayi bakhulu baba bamureerere Yesu sikila baba ne sikhalikhali.

¹¹Basaayi bakhulu baachilisia babaandu basabe Pilato abalekhuulile Baraba, ne Yesu tawe.

¹²Nio Pilato abareeba ali, “Nono mwenya khole ndiena omundu niye mulaanga muli Omwami owe Bayaudi?”

¹³Bayokela bali, “Mubaambe!”

¹⁴Ne kakhali Pilato areeba ali, “Akholile libi siina?” Baatasa khuyokela bali, “Mubaambe!”

¹⁵Sikila Pilato eenya khusangaasia babaandu, khwako aabalekhuulila Baraba, aapa Yesu kimisariti ne khumuaana abaambwe.

¹⁶Nio basikari baayila Yesu mukari khu luuya lwe lichipi lio mwami mala baalaanga eng'etuuti yabwe yoosi baakaanane alala.

¹⁷Bafwara Yesu ekaanjo efwaana buseemwa, baaruka ekuutwa eye kamawa mala baamufwara khu murwe.

¹⁸Nio baarakikha khumukheesia bali, “Okhoya oyindile Omwami owe Bayaudi.”

¹⁹Baamupa esiimbo khumurwe, bamufuchakho kamare, basikama ne khumwinamila.

²⁰Oli bamalile khumuchekheelela bario, bamufuula ekaanjo eyo mala bamufwara chingubo chewe ching'ene. Nio bamuila enje we lukoba khumubaamba.

²¹ Nga baba ne balikho bacha bakaanana no mundu bali Simoni, owaba ne alikho echa mu lukoba khukhwama enje, mala basikari bamuyingilila asute kumusalaba kwa Yesu. (Simoni aba ama Kireni, lundi aba raraawe owa Alekisanda ne Rufo.)

²²Baayila Yesu abuundu niio balaanga bali Kolikota liboola lili, “abuundu we siianga.”

²³Abwenao bakhaka khumuelesia endali niyo batubanisie ne manemane, ne kakhali Yesu se anywa tawe.

²⁴ Nio bamubaamba mala bakabana chingubo chewe mu khupa ekura khumanya naanu olabukula siina.

²⁵Chaba chisa chitaru che kumutikhinyi nicho bamubambilakho.

²⁶Kamaandiko ke kamasitako kaba bali, “Omwami owe Bayaudi.”

²⁷Babaamba banuuli babili alala ne Yesu, mulala khu mukhono kwewe kumuseecha ne okundi kumukhasi. [

²⁸ Mu ngila yino liiandiko liboola lili, “Aabalwa alala ne babooni” liechusibwa.][6]

²⁹ Babaandu bababiranga khu ngila ne bekeselela Yesu chinjala ne baloma bali, “Yaa! Ewe owaloma oli onyala watechula Lukaangu mala olwombakhe lundi mu ndaalo chitaru!

³⁰Nono yerusia khu musalaba mala weonie!”

³¹Mu ngila ng'eneyo basaayi bakhulu boosi ne baandiki bakhoma Yesu ne baloma bali, “Aonia babaandi mala se anyala eonia omwene tawe!

³²Lekha khubone Masiiya Omwami owa Isiraeli, ekhe aasi khukhwama khu musalaba siise sino mala efwe khulamusuubila!” Akhaba babili abo ba babaambwa ne Yesu boosi bamukhoma.

³³Oli choola chisa sita, sisiilima siaamba sibala sioosi khu saa chitaru.

³⁴ Oli choola chisa tisa Yesu alila ne kumwoyo kwe angaaki ali, “Eloi Eloi lama sabakitani.” Nikhwo khuboola khuli, “Wele wase, Wele wase, siina ne undekhile?”

³⁵Babaandu balala bamuulila nalila ario mala baloma bali, “Rekeeresia alikho alaanga Elicha.”

³⁶ Mulala khwaabo atima asanya sisiaangu mu ndali ekhali endulu tawe, mala aboa khu luteeka emusia, atilila khu munwa kwa Yesu naboola ali, “Liinda, lekha khubone nga Elicha echa khumurusia khu musalaba.”

³⁷Nio Yesu alila ne kumumilo kwe angaaki mala akwiisia kumwoyo.

³⁸ Epasia yaba mu Lukaangu yatabukhamo khabili, khukhwama angaaki khukhwola aasi.

³⁹Omusikaari owe liie owaba ne emile ebweeni we kumusalaba abona nga nilwo Yesu afwa mala aloma ali, “Ng'ali yuno abeele Omwana owa Wele.”

⁴⁰ Bakhasi balala babao, baloleleele khukhwama ataayi balala khwaabo baba Maria Makatalena, Solome ne Maria maawe owa Yakobo ne Yosefu.

⁴¹Baloondanga khu Yesu nga aba mu Kalilaya lundi bamuyeetanga. Bakhasi bakali abeele babechile e Yerusalemu ne naye boosi babao.

⁴²Yaba bulikho bwilabula ne Yosefu owe Arimatea oola. Aba omundu mulala niye be kumuse baria. Alindiililanga khukhwicha khwe Bubwami bwa Wele. Yaba Endaalo eye khukhwerekekhera esabato,

⁴³nio Yosefu anyindaalila acha khu Pilato mala asaba kumulaambo kwa Yesu.

⁴⁴Pilato esiindukha khuulila ali Yesu aaba afwiile khale. Nio alaanga omusikaari owe liie amureeba ali, “Khukhwama nga Yesu afwiile siabirire siise sileeyi?”

⁴⁵Enyuma wo musikaari khumuboolela, Pilato afukiilila Yosefu khubukula kumulaambo chana.

⁴⁶Yosefu akula esuuka eya katani ekhisia kumulaambo aasi, akuulukusila mu suuka mala akura mu ng'ani yaba eyabeechwa mu lwanda. Nio apiringisia kubaale kuboofu akukhiikha emuliango we siliindwa.

⁴⁷Maria Makatalena ne Maria maawe owa Yosefu baaba baloleleele babona niio ara kumulaambo kwa Yesu.