Read lubukusu Mk. 16 Bible Online

Mk. 16 - lubukusu bible

Mk. 16

¹Oli Esabato yaawa, Maria Makatalena, Maria maawe owa Yakobo, ne Solome bakula kamafura kaunya bulayi khucha khuakha kumulaambo kwa Yesu.

²Enyanga ne esoa chumapili bacha khu siliindwa.

³Ne balikho ne bacha bareebana bali, “Naanu olakhupiringisilia libaale lirure emuliango we siliindwa?” (Liaba liboofu lukali.)

⁴Oli balola babona bali libaale liarusiibweyo.

⁵Nio bengila mu siliindwa babonamo omusoleeli ne ekhaale kumukhono kumuseecha, afwarire engubo ewaanga mala besiindukha.

⁶Omusoleeli chana ababoolela ali, “Mukhesiindukha tawe, manyile ndi mulikho muenja Yesu owe Nasareti, niye babambile. Se ali ano tawe, alamusiibwe! Lola ano niio baamureere.

⁷ Nono khemuche muboolele babeeka bewe, alala ne Petero yesi muli, ‘Alikho acha Kalilaya oleyo enywe ne mukholayo tawe’, ebweeneyo mulamubona nga nilwo amuboolela.”

⁸Nio barura mu ng'ani chimbilo sikila baba mu bireengo ne khukhwesiindukha mala khuboolelakho omundu yesi yesi tawe, sikila baba ne buuri bukali. [

⁹Enyuma wa Yesu khulamukha khukhwama mu lifwa makhelebeende chumapili, anyoa abonekhela Maria Makatalena niye arusiamo bisieeno saba.

¹⁰Maria chana acha aboolela babaandu ba babechanga naye. Baba basooma ne khulila,

¹¹nga baulila naboola ali Yesu ali omulamu lundi amubone, se bamusuubila tawe.

¹²Enyuma wakano, Yesu abonekhela babeeka bewe babili mu ngila ekabukhane ne balikho ne bacha mu birekere.

¹³Bakobola baboolela babasiaabwe ne kakhali se babasuubila tawe.

¹⁴Khumaliilikha Yesu abonekhela babeeka bewe ekhumi na mulala nga baba ne balikho balia. Abayibila, sikila se baba ne lisuubila tawe, lundi sikila baba ne kimiooyo kimilume se basuubila abo ba bamubona enyuma we khulamukha tawe.

¹⁵ Ababoolela ali, “Cha mu sibala sioosi mala mwilwache Elomo Endayi khu buli mundu.

¹⁶Yesi yesi osuubila mala abatiisibwe alaonisibwa, ne oyo okhasuubila tawe, alakhalakilwa.

¹⁷Basuubili balaebwa bunyali bwe khukhola kamayia, bakharusie bisieeno mu lisina liase. Bakhalomalome mu ndimi chimbia,

¹⁸bakhatiila chindemu namwe banywa buchiba, se bakhanyoole butinyu bwosi bwosi tawe, balira kamakhono kabwe khu balwale mala baone.”

¹⁹ Enyuma wo Mwami Yesu khulomaloma ne nabo abukulwa aniina mwikulu mala ekhala kumukhono kumuseecha kwa Wele.

²⁰Babeeka bewe bacha belwacha buli abuundu, mala Omwami akhola kimilimo nabo, ne khukhwekesia bali kamelwacho ke burume kabwe kali ka ng'ali khuloondekhana ne kamayia niko bakholanga.][7] [ Limaliilisia likhale liliindi 16.9-10 Bakhasi bacha khu Petero ne basaale bewe mala bababoolela mu bwimbi koosi niko baboolelwe. Enyuma wakano Yesu omwene arumikhira babeeka bewe khukhwama ebukwe khukhwola mumbo khulandisia burume bwewe butakatifu bwe buonia bwa mindali.][8]