Read lubukusu Mk. 2 Bible Online

Mk. 2 - lubukusu bible

Mk. 2

¹Enyuma we chindaalo ndiiti Yesu akobola mu Kaperinaumu mala kamakhuwa kasalanila bali echile ali engo.

²Nio babaandu bakali becha bebuusia alala, mala bubwangu khubao bwosi bwosi akhaba mu matooche tawe. Yesu aba alikho abelwachila burume.

³Babaandu bane boolao ne bameemile omundu owafwokoya khumuyila khu Yesu.

⁴Ne se banyala khukhwosia omulwale khu Yesu tawe sikila babaandu baba bakali. Khwako bekula kumwanya khu nju khu ngaaki mala bekhisiliamo omulwale owaba nakonile khu mukeeka kwewe.

⁵Yesu nga abona lisuubila liabwe, aboolela omulwale oyo ali, “Mwana wase bubwoni bwowo bwabeleelwe.”

⁶Balala khu bekisia be Lilaka, ba baaba ne bekhaale abuundu ao bebaasia bali,

⁷“Anyindalile ariena khuloma kano? Yino eli embelekeu khu Wele! Wele yeng'ene niye onyala abeela omundu bubwoni!”

⁸Abwene ne abwene Yesu amanya niko baba ne bebaasia nio aababoolela ali, “Siina sikila ne mwibaasia biindu nga bino biri?

⁹Lili liliangu khuboolela omundu owafwokoya yuno oli, ‘Bubwoni bwowo bwabeleelwe,’ namwe khuloma oli, ‘Yinyokha obukule kumukeeka kwowo mala oche?’

¹⁰Ndamwekesia abuwaanga ndi Omwana wo Mundu ali ne bunyali bwe khubeela bubwoni khu sibala khuno.” Nio aboolela omundu owafwokoya oyo ali,

¹¹“Yinyokha obukule kumukeeka kwowo mala oche engo!”

¹²Nga babaandu baba ne basiloleelela, omundu oyo enyokha eema, mala ao ne nao abukula kumukeeka kwewe arekukha, boosi ba babao barangararwa mala bafumia Wele. Ne khuloma bali, “Khukhabonakho siindu siri tawe!”

¹³Yesu akobola lundi khu sikiingi sie nyanja eya Kalilaya. Babaandu bakali becha niio ali mala arakikha khubekisia.

¹⁴Nga aba nakeenda, abona Lawi omwana owa Alufayo omuroosi owe busuuru ekhaale munju nimwo baroseriangamo busuuru. Yesu amuboolela ali, “Nondekho.” Lawi enyokha mala amuloondakho.

¹⁵Nga aba ne ekhaale khu sialwa munju mwa Lawi, baroosi be busuuru bakali ne babooni baba bamuloondilekho mala boosi bekhala naye alala ne babeeka bewe.

¹⁶Babekisi be kamalaka ka Musa, ba baaba Bafarisayo, babona bali Yesu alikho alia ne baroosi be busuuru ne babooni. Nio bareeba babeeka bewe bali, “Siina sikila nalia ne baroosi be busuuru ne babooni?”

¹⁷Yesu aulila mala abakobosia ali, “Babaandu baali balamu se benya busilikhi bwo musilikhi tawe, ne kakhali baali balwale babenya busilikhi. Ese se necha khulaanga baluungi tawe, ne kakhali necha khulaanga babooni.”

¹⁸Endaalo ekiindi babeeka ba Yoana Omubatiisi ne Bafarisayo baba beyimaane khulia. Babaandu balala becha khu Yesu mala bamureeba bali, “Siina sikila babeeka ba Yoana ne Bafarisayo beyimana khulia ne babowo tawe?”

¹⁹Nio Yesu abakobosia ali, “Bakeni mu siselelo banyala beyimana khulia mala omusoleeli niye baakhile naliio ku? Se kanyalikhana tawe. Omwene siselelo naliio se banyala beyimana khulia tawe.

²⁰Ne kakhali chindaalo chilikho chiicha nicho omwene siselelo alikho acha khu baruramo, abwenao niio balieyimana khulia.

²¹“Mbao onyala abukula silaka sie ngubo embia asinabila khu ngubo ekhale tawe. Sikila silaka siyia esio silekhuuna mala sitase khutabula engubo ekhale eyo.

²²Namwe se aliio onyala abukula endali embia akichukha mu oochwa eye ndali ekhale tawe, sikila endali embia elatabula eoochwa ekhale mala endali ne oochwa bioombi bionekhe. Khwako, endali embia khukhwola bakichukhe mu oochwa embia.”

²³ Yesu aba akeenda mu mukuunda kwe ngano khu ndaalo eya Sabato. Babeeka bewe ba baaba ne bakeenda naye, barakikha khusasula bikala bie ngano.

²⁴Nio Bafarisayo baboolela Yesu bali, “Lilaka liefwe se lifukiilila babeeka bowo khukhola kano khu ndaalo eya sabato tawe.”

²⁵ Yesu abakobosia ali, “Khaba mukhasomakho niko Daudi akhola siise nisio enyela siakhulia alie tawe? Niio abela ne njala alala ne babaandu bewe,

²⁶ aacha munju eya Wele mala alia kumukaati nikwo baelesia Wele nga siianwa. Kano kekholekha siise nisio Abiatari aaba Omusaayi Omukhulu Lukali. Khuloondekhana ne Lilaka liefwe, abele basaayi bong'ene nibo banyala balia kumukaati kuno. Ne kakhali Daudi aalia mala aelesia ne babaandu bewe.”

²⁷Ne Yesu amaliilisia ali, “Esabato eliio sikila Omundu, omundu se abuumbwa sikila esabato tawe.

²⁸Sikila Omwana wo Mundu ali Omwami we ndaalo eya Sabato yosi.”