Read lubukusu Mk. 3 Bible Online

Mk. 3 - lubukusu bible

Mk. 3

¹Nio Yesu akobola mu sinakooki mala omundu owafwokoya kumukhono abamo.

²Babaandu balala babamo benya khu sitaka Yesu khulwe khuonia omundu oyo khu ndaalo eya sabato, khwako bamuloleelela babone ne amuonia namwe tawe.

³Nio Yesu aboolela owafwokoya ali, “Yiicha ebweeni eno.”

⁴Mala areeba babaandu ali, “Lilaka liefwe likhufukiilila efwe khukhola siina khu ndaalo eya Sabato? Khuyeeta namwe khukhola kamabi? Khuonia bulamu bwo mundu namwe khukhwira?” Babaandu abo se bamukobosiakho siindu tawe.

⁵Yesu aambwa lirima abaloleelela, lundi siise esio abakholela siisa sikila khunaania ne khukorwa khwabwe, nio aboolela omundu oyo ali, “Kololosia kumukhono kwowo.” Akukololosia mala kwaona.

⁶Khwako Bafarisayo barura mu sinakooki mala bakhola etoloondo ne babeeka be kumukaanda kwa Herodi, mala bakhola ekwangwaani eye khukhwira Yesu.

⁷Yesu ne babeeka bewe bacha khu nyanja eya Kalilaya, mala babaandu bakali bamuloondakho. Baba bamile Kalilaya, e Buyuda,

⁸e Yerusalemu, khukhwama mu sibala sia Itumeya, khukhwama mu sibala sie bukwe nooli mu Yoritani, lundi khukhwama embi ne chingoba cha Tiro ne Sidoni. Babaandu bano boosi beecha khu Yesu sikila baba bauliile niko Yesu aakholanga.

⁹ Babaandu baba bakali mala bakila Yesu aboolela babeeka bewe ali, barekekhe liliaaro elwachilekho ne ali khu nyanja nio babaandu bakhamumiina tawe.

¹⁰Aba aonisie babaandu bakali ne abo boosi ba baaba balwale baba balikho beyindikilisia bamwolekho mala bamutiilekho.

¹¹Ne buli lwosi babaandu ba baba ne bisieeno nga bamubonanga bakwichanga aasi ebweeni wewe ne khukukuula bali, “Ewe oli Omwana owa Wele!”

¹²Yesu aboolela bisieeno ne aandalasia ali bikhaboolela omundu okundi yesi yesi bili niye ali naanu tawe.

¹³Nio Yesu acha khu sikulu alaanga nibo asiima, beecha niio ali

¹⁴ne arobora ekhumi na babili nibo alaanga ali Barumwa, ababoolela ali “Namuroboore enywe khuba ne nase. Lundi ndamuruma khucha khukhwilwacha burume

¹⁵ne mulaba ne bunyali bwe khurusia bisieeno.”

¹⁶Bano nibo ekhumi na babili nibo aarobora: Simoni (niye Yesu alaanga ali Petero),

¹⁷Yakobo ne wandaaye Yoana babaana ba Sebetayo (nibo Yesu alaanga ali Boanerike, sifuno bali babaandu be lueni),

¹⁸Andereya, Filipo, Baturimayo, Matayo, Tomasi, Yakobo omwana owa Alufayo, Tatayo, Simoni Omukanaani

¹⁹ne Yuda Isikarioti owachaama Yesu.

²⁰Nio Yesu acha engo. Lundi babaandu baba bakali bakila Yesu ne babeeka bewe khuba ne siise sie khulia tawe.

²¹Nga balebe bewe baulila bario, berusia khu muliinda sikila babaandu balomanga bali, “Alaluukhe.”

²² Baandiki balalakho ba baaba ne bechile khukhwama e Yerusalemu balomanga bali, “Ali ne Beelisebuli! Sisieeno sisimeelela bisieeno bibiindi bioosi, nisio simuelesianga kamaani ke khurusia bisieeno bibiindi.”

²³Nio Yesu abalaanga mala ababoolela mu Lukano ali, “Sietani anyala ariena arusia Sietani?

²⁴Bubwami ne bukabukhanamo, se buyiindila tawe,

²⁵enju yaaba ne kabukhanamo se yiima tawe.

²⁶Khwako bubwami bwa Sietani bwakabukhanamo bipupu, se buyiindila tawe. Ne kakhali busalaanila mala bwoole khu siakamo.

²⁷“Mbao yesi yesi onyala khwibwaakala enju yo mundu we kamaani mala amunuule bibiindu biewe ne akhanyoile aboa omwenenju tawe. Khukhwola aboe omwenenju nio anyale khunuula bibiindu biewe.

²⁸“Ng'ali ese muboolela enywe ndi, babaandu banyala babeelwa bubwoni bwabwe nende ke mbelekeu koosi niko banyala balomaloma.

²⁹ Ne kakhali oyo okholela Roho Omutakatifu embelekeu se alibeelwa tawe. Sikila akholile bubwoni bwa mindali.”

³⁰(Yesu aaboola kano sikila babaandu balala baba baboola bali, “Ali ne bisieeno.”)

³¹Mala maawe owa Yesu ne bawandaaye boola, beema enje mala barumania likhuwa mukari khumulaanga

³²sipupu sie babaandu baba bekhaale babotookheleele Yesu, mala bamuboolela bali, “Maao ne bawandaayo bali enje, benya bakhubone.”

³³Nio Yesu akobosia ali, “Maayi niye naanu? Ne wandaayase niye naanu?”

³⁴Alola babaandu bamwikhaaleo mala aloma ali, “Bano nibo maayi ne bawandaayase!

³⁵Oyo yesi yesi okhola lilienya lia Wele niye wandaayase, omukooko wase, lundi niye maayi.”