Read lubukusu Mk. 4 Bible Online

Mk. 4 - lubukusu bible

Mk. 4

¹ Lundi Yesu arakikha khukhwikisilia alubeka we nyanja eya Kalilaya. Babaandu baba bakali bakila engila mu liaaro ekhalamo. Liliaaro liaba mu meechi, ne babaandu baba khu sikiingi.

²Arumikhira chingano khu bekisia bibiindu bikali, ne ababoolela ali,

³“Rekeeresia! Omumiichi arura ne bumiicho, khucha khumiicha

⁴nga namiicha bumiicho mu mukuunda, bulala bwakwa khu ngila, mala chinyuni checha chabuboocha,

⁵bubuundi bwakwa khu lwanda nikhwo liloba likhaba likali tawe, khwako bwamela khangu.

⁶Nga kumuumu ne kwarura kwosia bimelwa bioma sikila chiisi chaba chikhacha aasi tawe.

⁷Bumiicho bubuundi bwakwa mumawa mala oli bukhula kamawa kauna bimelwa ebio khwaama siindu tawe.

⁸Ne bumiicho bubuundi bwakwa mwiloba lilayi mala bwarura, bwakhula, mala bwaama. Bulala bwaama bibiaamo kamakhumi kataru, bubuundi kamakhumi sita ne bubuundi emia.”

⁹Yesu amaliilisia ali, “Ne oli ne kamaru ulila!”

¹⁰Nga Yesu ne aba yeng'ene, balala khwaabo babamuulila bamwichakho ne babeeka ekhumi na babili ne bamureeba abenooselie chingano chino.

¹¹Yesu abakobosia ali, “Enywe mwafunulibwa kakekisa ke Bubwami bwa Wele, ne kakhali khu baandi boosi kali busa mu ngano,

¹² nio ‘Bakhalola se balabona tawe, bakhaulila se bamanya tawe. Ne kakhali banga babona lundi baulila, andi bakobolele Wele mala ababeela.’ ”

¹³Nio Yesu abareeba ali, “Se mumayile lukano luno tawe? Aba mukhamanye lukano luluundi lwosi lwosi muriena?

¹⁴Omumiichi amiicha elomo eya Wele,

¹⁵babaandu balala bali nga bumiicho bubwakwa khu ngila, nga baulila elomo abwene ne abwene Sietani echa akirusiamo.

¹⁶Babaandi nabo bali nga bumiicho bubwakwa khu lwanda. Nga baulila elomo bakiakanila ne busangaafu.

¹⁷Ne kakhali likhuwa elio se libekhalamo tawe. Lundi se liba ne chiisi mu miooyo kiabwe tawe. Nio oli butinyu namwe sinyaasio siicha khulwe elomo chana eyo, ne bakiekaana khangu.

¹⁸Ne babaandi nabo bali nga bumiicho bubwakwa mumawa, bano bali baulila elomo,

¹⁹mala liliendekhelela khwimenya lie biise bino, khusiima buiinda, ne liliekoomba lie bibiindu bibiindi bioosi lingilamo mala libakhiingilila khukhwaama bibiaamo.

²⁰Ne babaandu babaandi bali nga bumiicho bubwakwa mwiloba lilayi, baulila elomo, bakifukiilila mala baama bibiaamo kamakhumi kataru, babaandi sita ne babaandi emia.”

²¹ Yesu achiililila khureeba ali, “Omundu anyala afumalikhila etaa mu sikono namwe akira aasi we sitanda ku? Se akira khu siteetwe sie etaa?

²² Siosi siosi nisio bakisa, sikhabuulwe, ne siosi siosi sisiafuunikhwa, sikhafuunulibwe.

²³Ne oli ne kamaru, ulila!”

²⁴ Yesu aababoolela ali, “Loleelesia mu niko muulila. Sikelo nisio oanilamo sisiene ne sisiene nisio onyoolelamo, lundi olanyoolelakho bibiindi bikali.

²⁵ Omundu ooli nabio, akhatasibwe bikali, ne omundu ooli busa, naye akhanuulwe aakhaba sitiiti nisio ali nasio.”

²⁶Yesu achiililila khuloma ali, “Bubwami bwa Wele buli nga lukano luno, omundu amiicha bumiicho mu mukuunda kwewe.

²⁷Siilo akona, enyokha ne busiele, mala nga akhola ario aba bumiicho bulikho busekesa, ne niye se amanyakho nga busekesa tawe.

²⁸Liloba liliene likhola bimelwa ne bichoa ne khukhwaama bibiaamo. Sirakho sisina sitoro lundi kamasaafu ne ekhumaliilikha sikala siichakho

²⁹ nio oli sialabile, ne omundu eecha mala akesa, sikila chindaalo che likesa cholile.”

³⁰Yesu areeba ali, “Nono khunyala khwafwaananisia Bubwami bwa Wele nende siina? Lukano siina nilwo khunyala khwarumikhira khubwinoosia?

³¹Bubwami bwa Wele buli nga omundu owabukula khamiicho khatiiti khe kumupeeli mala abiaala.

³²Enyuma we siise sitiiti khachoa khekhola kumurongooro kumuboofu khukhila kikiindi kioosi. Kuraakho chisakia chimboofu mala chinyuni chombakhakho biswi mala chimenyakho.”

³³Yesu elwachilanga babaandu narumikhira chingano chingali nga luno, ababoolela kamakali khuloondekhana ne limanya liabwe.

³⁴Abeele se anyala abalomalomakho nakharumikhire chingano tawe, ne kakhali ne ali ne babeeka bewe, abenooselianga buli siindu.

³⁵Oli ekolooba we ndaalo ng'eneyo, Yesu aboolela babeeka bewe ali, “Khekhwambukhe engelekha we nyanja.”

³⁶Khwako bakabukhana ne babaandu, babeeka bewe bengila mu liaaro nilio aba ne ekhalemo, ne barekukha ne naye. Kamaaro kakaandi kabao.

³⁷Oli basiili embembeesi eye kamaani yaucha, mala bibuli bie kameechi biarakikha khu khupa liliaaro, aramira atiiti kameechi kechulemo.

³⁸Yesu aba enyuma we liliaaro alikho akona, etikiiye. Babeeka bamusiisimusia ne baloma bali, “Omwekisia, khaba se weendekheleelekho oli khunyala khwafwa tawe?”

³⁹Yesu enyokha eema mala arafwira embembeesi ali, “Yakama! Lundi aboolela bibuli ali yenjeela embembeesi yakama mala enyanja yayenjeela.”

⁴⁰Nio Yesu aboolela babeeka bewe ali, “Siina ne muriire? Se muli ne lisuubila tawe?”

⁴¹Ne kakhali baba ne buuri bukali mala bareebana bali, “Yuno naanu niye? Akhaba embembeesi ne bibuli bie kameechi bimuulila!”