Read lubukusu Mk. 5 Bible Online

Mk. 5 - lubukusu bible

Mk. 5

¹Yesu ne babeeka bewe boola engelekha khu nyanja eya Kalilaya, mu sibala sie Bakerasi.

²Nga Yesu narura mu liaaro, akaanana ne omundu owaba namenyile mu biliindwa, omundu yuno aaba ne sisieeno

³mala aba amenya mu biliindwa. Se abao bele onyala amuboa khu minyololo tawe.

⁴Kamakhabi kamakali bamuboanga bikele ne kamakhono, ne buli siise akitulanga kiminyololo kie khu makhono ne bikele. Aba ne kamaani kamakali lukali beele se aliio omunyala tawe.

⁵Siilo ne kumuusi akeendanga mu biliindwa ne mu bikulu, ne apa lulwang'a ne khukhwikhalakaka ne kamabaale.

⁶Nga ne abona Yesu ne asiili sinaao, atima mala amusaaya,

⁷mala apa lulwang'a mu mumilo kwe angaaki ali, “Yesu Omwana owa Wele owe Angaaki Lukali! Wenya orie khwise? Khu siisa sia Wele khusaba ndi, okhambukuuma tawe.”

⁸(Aaloma ario sikila Yesu aba alikho aloma ali “Sisieeno rura mu mundu yuno.”)

⁹Yesu amureeba ali, “Ewe bali naanu?” Amukobosia ali, “Lisina liase bali ‘Lechoni’ sikila khuli bakali.”

¹⁰Abelelela khu saba Yesu ali akharusia bisieeno mu sibala esio tawe.

¹¹Liabao lituuli lie chingurwe liaba a sikulu liaaya.

¹²Nio bisieeno biasaba Yesu bili, “Khulekhe khuche mungurwe echo.”

¹³Nio biarura mu mundu oyo, abilekha biacha mungurwe. Lituuli lie chingurwe liaba liola embi chielefu chibili, liatirimukha liaweela mu nyanja mala liafwilamo.

¹⁴Babaayi ba baaba ne baaya belukha, basalanisia kamakhuwa mu lukoba ne mu sirekere mwoosi. Babaandu bacha balola kakekholeekhe,

¹⁵ne nga bacha niio Yesu ali babona omundu niye bisieeno biabamo ekhaale ao, efwarire chingubo lundi ali ne kamakesi kamalayi, mala buli mundu auka.

¹⁶Abo ba babona kakekholeekhe baboolela babaandi ko mundu oyo ne chingurwe.

¹⁷Khwako baboolela Yesu arure mu sibala siabwe.

¹⁸Nga nilwo Yesu aba ne engila mu liaaro, omundu owaba ne bisieeno amusaaya ali, “Nosiima khuche fwembi!”

¹⁹Ne kakhali Yesu se afukiilila ache naye tawe. Amuboolela ali, “Kobola engo wenywe mala oboolele balebe bowo niko Omwami akhukholeele lundi nga ali ne siisa khwiwe.”

²⁰Nio omundu oyo acha mu Tekapoli, aboolela babaandu niko Yesu amukholeele, ne boosi ba baulila bauka.

²¹Yesu akobola engelekha we nyanja mala babaandu bakali becha niio aaba khu sikiingi.

²²Yairo mulala khu bemeelesi be sinakooki oola, nga ne abona Yesu, asikama ebweeni wewe.

²³Amusaba mu bung'ali ali, “Omwana wase omukhaana ali omulwale po, nosiima yiicha mala omurekho kamakhono, nio aone.”

²⁴Nio Yesu acha ne Yairo, babaandu bakali bamuloondakho.

²⁵Abao omukhasi mulala owaba ne ekibeeno khu miiko ekhumi na kibili.

²⁶Akhaba ne asilikhwa ne basilikhi bakali, ne khurumikhira chirupia chewe choosi, se aona tawe, ne kakhali bulwaale bwachiililila khutasa.

²⁷Aba auliile kamakhuwa ka Yesu, mala echela emukoongo wa Yesu mu lutiri olwo,

²⁸ne ebaasia ali, “Natiila busa khu ngubo yewe, ndaona.”

²⁹Atiila khu ngubo eya Yesu mala abwene ne abwene ekibeeno yakama. Mala eulila ali ng'ali aonile.

³⁰Abwene ne abwene Yesu amanya ali kamaani kamwamilemo, mala ekhebukha areeba ali, “Naanu otiilile khu ngubo yase?”

³¹Babeeka bewe bamukobosia bali, “Se waboone babaandu nga bakhilile, siina sikila ne oreeba oli naanu okhutililekho?”

³²Yesu achiililila khulola eyi ne neyi khukhwenya khubona naanu omutiililekho.

³³Omukhasi oyo amanya kamwikholekhekho mala echa naterema mu buri, asikama ebweeni wa Yesu, mala amuboolela bung'ali bwoosi.

³⁴Yesu amuboolela ali, “Mukhaana wase, lisuubila liowo liakhuoniisie, cha mumuleembe, mala oone bulwaale bwowo.”

³⁵Nga Yesu aba ne asilomaloma ario barumwa balala khukhwama munju eya Yairo becha bamuboolela bali, “Omukhaana wowo afwiile onaanisilia siina omwekisia?”

³⁶Yesu se abukulamo lukeendo mu makhuwa kabwe tawe. Ne kakhali aboolela Yairo ali, “Okharia tawe, suubila busa.”

³⁷Se afukiilila omundu okundi khucha naye tawe, ne kakhali Petero, Yakobo ne wandaaye Yoana.

³⁸Boola anju owa Yairo nio Yesu aulila bililo bikali lundi abona likoyaana,

³⁹Engila munju ababoolela ali, “Likoyaana lino lioosi lia siina? Mulalilanga siina? Omukhaana yuno se afwiile tawe ne kakhali alikho akona!”

⁴⁰Mala babaandu bamuchekha, naye abarusia munju, abukula maawe ne raraawe bo mwana ne babeeka bewe bataru, bacha mu lusiro nimwo omwana chana aba ne akonile.

⁴¹Amutiila kumukhono amuboolela ali, “Talita kumi,” liboola lili, “Mukhaanawe yinyokha!”

⁴²Ne mala abwene ne abwene enyokha akeenda (aba kimiiko ekhumi na kibili). Nga kano kekholekha, boosi barangararwa lukali,

⁴³Yesu abatanyilila lukali ali bakhaboolelakho omundu okundi tawe, mala aboola ali, “Muelesiekho siindu alie.”