Read lubukusu Mk. 6 Bible Online

Mk. 6 - lubukusu bible

Mk. 6

¹Yesu arura abuundu ao mala ela mu lukoba lwe wabwe, babeeka bewe bamuloondakho.

²Khu ndaalo eya Sabato arakikha khukhwekisia mu sinakooki. Babaandu bakali babamo. Ne nga bamuulila, bauka bareeba bali, “Amisie waena kano koosi? Limanya siina nilio aelesiibwe lino? Akholanga ariena kamayia?

³Se ali niye ong'oonanga bibiindu bie chimbao, omusoleeli owa Maria, lundi wandaaye owa Yakobo, Yosefu, Yuda ne Simoni? Bakooko bewe se bamenyile ano?” Khwako bamuloba.

⁴ Yesu ababoolela ali, “Omung'oosi afukiililwa buli abuundu, ne kakhali mu sibala sie wabwe, ne mu balebe bewe nende be nju yewe.”

⁵Se akholakho kamayia kosi kosi tawe, ne kakhali ara kamakhono kewe khu balwale batiiti ne khubaonia.

⁶Auka lukali sikila babaandu se baba ne lisuubila tawe. Nio Yesu akeenda mu birekere ebweeneyo ne ekisia babaandu.

⁷Alaanga babeeka bewe ekhumi na babili mala abaruma babili babili. Abaelesia bunyali bwe khurusia bisieeno,

⁸ mala abalakiilisia ali, “Mukhabukulakho sisiindu siosi siosi mwacha nasio khu lukeendo luno tawe, ne kakhali esiimbo yong'ene, mukhasutakho siakhulia, elolooti eye babaandu babesabiilisia namwe chirupia mu mifuko kienywe tawe.

⁹Fwara biraaro, ne mukhasuta lisiati liliindi tawe.”

¹⁰Lundi aloma ali, “Niyo bamwekhoyela, yikhala munju omwo khukhwola nga ne murekukha khukhwama abuundu ao.

¹¹ Ne mucha mu lukoba nilwo bakhamwekhoyela tawe, namwe nimwo bakhamurekeeresia tawe, ruramo mala musiisimule lutamuusi lwe khu bikele bienywe. Olwo lukhabe buloli khu nibo!”

¹²Nio bacha belwachila babaandu balekhe bubwoni bwabwe.

¹³ Barusia bisieeno bikali, lundi baakha balwale kamafura mala baona.

¹⁴ Omwami Herodi aulila kano koosi, sikila efuma eya Yesu yaba yasalaniile buli abuundu. Babaandu balala balomanga bali, “Yoana Omubatiisi enyokhe emakoombe! Lino likila nali ne kamaani ke khukhola kamayia.”

¹⁵Babaandi baloma bali, “Yuno Elicha niye.” Babaandi baloma bali, “ali nga mulala khu bang'oosi be khaale.”

¹⁶Nga Herodi ne aulila, aaloma ali, “Yuno ali Yoana Omubatiisi niye neera enyokhe khukhwama emakoombe.”

¹⁷ Herodi yuno niye owaana lilaka khutiila Yoana, bamuboe kiminyololo ne khumura mu siboe. Herodi aakhola kano sikila omukhasi Herotia niye anuula wandaaye Filipo.

¹⁸Yoana Omubatiisi aboolelanga Herodi ali, “Se buli bulayi ewe khunuula wandaayo omukhasi tawe.”

¹⁹Nio omukhasi Herotia, aambila Yoana sikhoonde mala enya khumwiira, ne se anyala tawe sikila Herodi.

²⁰Herodi aba aria Yoana sikila amanya ali Yoana aba omulayi lundi omutakatifu, khwako amuliinda bulayi. Aba asiima khumurekeeresia, akhaba ne ananisibwanga mu mwoyo kwewe buli siise nisio amurekeeresianga.

²¹Ekhumaliilikha omukhasi Herotia anyoola bubweyaangu, yaba endaalo eye khukhebulila khusaalwa khwa Herodi, ateekhela bakhoongo boosi be bubwami biakhulia, nende bakomanda be banamae, ne babemeelesi boosi be mu lukoongo lwa Kalilaya.

²²Omukhaana wo mukhasi Herotia echa mala akhina, asangaasia Herodi ne bakeni bewe. Nio omwami Herodi aboolela omukhaana ali, “Sabe siosi siosi nisio wenya mala ndakhuelesia.”

²³Herodi echuba lukali ne aloma ali, “Siosi siosi nisio usaba ndakhuelesia akhaba khukabana bubwami bwase!”

²⁴Khwako omukhaana arura enje mala areeba maawe ali, “Sabe siina?” Maawe amukobosia ali, “Kumurwe kwa Yoana Omubatiisi.”

²⁵Omukhaana akobola khangu khu mwami Herodi mala aboola ali, nenya umbe kumurwe kwa Yoana Omubatiisi khu lutelu siise sino.

²⁶Lino liabeelesia omwami lukali ne kakhali, se anyala khuloba tawe sikila khukhwechuba nikhwo echuba ebweeni we bakeni bewe.

²⁷Khwako arumania omusikaari arere khangu kumurwe kwa Yoana. Omusikaari acha mu siboe akhalaka kumurwe kwa Yoana,

²⁸mala areerera khu lutelu kumurwe kwa Yoana aelesia omukhaana, ne omukhaana akaanisia maawe.

²⁹Nga babeeka ba Yoana ne baulila becha babukula kumubili kwewe bacha bakusiikha.

³⁰Barumwa bakobola niio Yesu ali mala bamuboolela koosi niko bakholile ne khukhweyikia.

³¹Babaandu babeechanga ne khucha baba bakali bakila Yesu ne barumwa bewe khunyoola akhaba bubweyaangu bwe khulia tawe. Nio Yesu aboolela barumwa ali, “Khakhwesendekho sinao nio munyoole bubweyaangu bwe khuuluukha.”

³²Nio bengila mu liaaro bacha niio omundu akhaaba tawe.

³³Babaandu bakali ba babona ne barekukha mala bamanya bali ali Yesu ne babeeka bewe, khwako batimila khundulo khwe nyanja boola niio baba ne bacha.

³⁴ Oli Yesu arura mu liaaro, abona babaandu bakali mala abakholela siisa, sikila baba nga kamakheese kakhali no mwaayi tawe, mala arakikha khubekisia bibiindu bikali.

³⁵Nga bwaba ne bulikho ne bwilabula, babeeka bewe bamwichakho bamuboolela bali, “Bona bulikho bwilabula, mala abuundu ano mundaa busa baandu se bamenyilemo tawe,

³⁶basibule bache mu sirekere abuundu niio banyala bakula biakhulia balia.”

³⁷Ne kakhali Yesu abakobosia ali, “Enywe mwabene baelesie siakhulia balie.” Nabo bamukobosia bali, “Wenya khubukule chirupia[1] chimia chibili khuche khukule biakhulia khubaelesie balie?”

³⁸Nio Yesu abareeba ali, “Muli ne kimikaati kiinga? Cha mulole.” Nga bamala khulola becha bamuboolela bali khuli nakio kiraano ne ching'eeni chibili.

³⁹Khwako Yesu aboolela babeeka bewe khuboolela babaandu bekabemo bipupu mala bekhale aasi.

⁴⁰Nio babaandu bekhala aasi munyilili mu bipupu bilala kamakhumi karaano ne bibiindi emia.

⁴¹Yesu abukula kimikaati kiraano ne ching'eeni chibili alola mu ngaaki aana orio khu Wele, amesulamo kimikaati mala aelesia babeeka bewe khukabila babaandu, lundi akabamo ching'eeni chibili echo khu boosi.

⁴²Buli mundu aalia mala ekura.

⁴³Nio babeeka babuusia bitonyi bie kimikaati ne ching'eeni bioola bikono ekhumi na bibili.

⁴⁴Babaandu babalia baba chielefu chiraano.

⁴⁵Siise esio Yesu aboolela babeeka bewe khucha mu liaaro banyoe bache e Betesaita engelekha, niye ne asiboolela babaandu bakobole ewabwe.

⁴⁶Enyuma we khukheesia babaandu acha khu sikulu khusaba.

⁴⁷Oli bwelabula, Yesu aaba yeng'ene khu sikiingi ne liliaaro liaba liolile akari we nyanja.

⁴⁸Yesu abona ali babeeka bewe balikho banaanisibwa ne ekhuungu. Nio enje ne bucha khusia, Yesu abolakho ne alikho akeenda khu meechi. Aba alikho acha khu babirakho,

⁴⁹nga bamubona baloma bali, “Simakoombe nisio!” Bakukuula.

⁵⁰Boosi nga bamubona bauka lukali. Yesu alomaloma khangu ababoolela ali, “Nyindaalila! Niise mukharia tawe!”

⁵¹Nio engila mu liaaro mala ekhuungu yema. Babeeka bewe bauka lukali po,

⁵²sikila abeele basibaasia nga ne alisiisie babaandu chielefu chiraano. Bukesi bwabwe se bwanyala khumanyilisia bulayi sisiekholeekhe tawe.

⁵³Bambukha enyanja becha khu lukoongo lwa Kenesareti; niio baboa liliaaro khu sikiingi.

⁵⁴Nga ne barura mu liaaro, ne babaandu bamanya Yesu.

⁵⁵Khwako bacha mu lukoongo lwoosi ne bamureerera balwale babwe khu mikeeka buli niio baulilanga bali ali.

⁵⁶Buli osi niio Yesu achichanga bamureereranga balwale mu birekere, mu ngoba ne bamusaba bali balwale batiile khu likemo lie ngubo yewe mala baone, ne boosi babatiilakho baona.