Read lubukusu Mk. 8 Bible Online

Mk. 8 - lubukusu bible

Mk. 8

¹Se siabira siise sileeyi tawe babaandu babaandi baaba ne be busiisie, se baba ne siakhulia siosi siosi tawe. Nio Yesu alaanga babeeka bewe ababoolela ali,

²“Ndi ne siisa khu baandu bano sikila babeele nase luno chindaalo chitaru mala se bali nende nisio balia tawe.

³Nababoolela ndi khe muche engo ne bakhalia tawe, balakwa khu ngila sikila balala baama aleeyi.”

⁴Babeeka bewe bamureeba bali, “Mu siangalaamwe muno omundu anyala aanyoola biakhulia bie babaandu boosi bari?”

⁵Nio Yesu abareeba ali, “Muli ne kimikaati kiinga?” Bamukobosia bali, “Khuli nakio saba.”

⁶Aaboolela babaandu khukhwikhala aasi, mala aabukula kimikaati saba chana, aapila Wele orio, akimesulamo mala aelesia babeeka bewe khukaba babaandu mala babeeka bewe bakhola bario.

⁷Lundi baaba ne ching'eeni ndiiti chiri, Yesu apila Wele orio mala ababoolela khuelesia babaandu.

⁸Buli mundu aalia ekura, mala babeeka bewe babuusia bitonyi bibiarama bikono saba swa.

⁹Babaandu babalia baba embi chielefu chine.

¹⁰Yesu aboolela babaandu barekukhe, mala naye engila mu liaaro alala ne babeeka bewe bacha mu sibala sia Talimanuta.

¹¹ Balala khu Bafarisayo beecha khu Yesu, barakikha khuyingana naye. Benyanga khumukhaka, mala bamuboolela khukhola kamayia nio keekesie kali Wele aamufukiilila.

¹² Ne kakhali Yesu abakobosia mu khwikhilisia kumwoyo ali, “Sikila siina babaandu be selukho yino beenya khubona kamayia? Ese muboolela enywe ndi! Se kalibakhoo kamayia kaebwa khu baandu bano tawe!”

¹³Yesu abalekha aakobola mu liaaro mala arakikha khukhwambukha engelekha we nyanja.

¹⁴Babeeka ba Yesu baba bebiliile khusuta kimikaati kikiolaana, baba nende mulala kwong'ene mu liaaro.

¹⁵ Yesu abakaambila ali, “Yeliinda lundi ba meeso khuloondekhana ne limela lie Bafarisayo ne lia Herodi.”

¹⁶Barakikha khuyingana ne baloma bali, “Aloma ari sikila se khuli ne kimikaati tawe.”

¹⁷Yesu amanya niko baba ne balomaloma mala abareeba ali, “Siina ne muyingana sikila se muli ne kimikaati tawe? Se mumanyilekho siosi siosi tawe? Mu siili busa bang'ang'aafu?

¹⁸ Muli ne chimoni ne se mubona tawe, muli ne kamaru ne se muulila tawe? Se mukhebulila nga

¹⁹namesulamo kimikaati kiraano khuliisia babaandu chielefu chiraano tawe? Bikono biinga bibiechula bitonyi bie kimikaati bibiarama?” Bamukobosia bali, “Bikono ekhumi na bibili.”

²⁰Yesu areeba ali, “Ne nga ne aamesulamo kimikaati saba khuliisia babaandu chielefu chine, mwabuusia bikono biinga bie bitonyi bie kimikaati bibiarama?” Bamukobosia bali, “Bikono saba?”

²¹Nio abareeba ali, “Mala khukhwola siisie sino mukhamanyanga tawe?”

²²Beecha Betesaita nio babaandu balala bareera omundu omubofu khu Yesu mala bamwikoonjelela amutilekho.

²³Yesu atiila omubofu kumukhono mala bacha enje we sirekere. Nio Yesu amufucha kamare khu moni mala amurakho kamakhono, amureeba ali, “Onyala wabonakho siosi siosi ku?”

²⁴Nio omubofu oyo alola mu ngaaki mala afukiilila ali, “Yee ndikho mbona babaandu, ne kakhali babonekha nga kimirongooro ne kikeenda.”

²⁵Lundi Yesu ara kamakhono khu moni chewe, omubofu alola bulayi bubweene, ne khubona khwewe khwaba khulayi mala abona buli siindu mu ngila endayi po.

²⁶Yesu amuboolela ache engo ne lilakiilisia ali, “Okhakobola mu sirekere esio lundi tawe.”

²⁷Nio Yesu ne babeeka bewe bacha mu birekere bia Kaesarea-filipi. Nga baba ne bacha Yesu aabareeba ali, “Mboolele, babaandu baloma bali ese naanu?”

²⁸ Bamukobosia bali, “Balala baloma bali ewe Yoana Omubatiisi, babaandi bali, ewe Elicha, ne babaandi nabo bali, ewe oli mulala khu bang'oosi.”

²⁹ Yesu aabareeba ali, “Nenywe nanywe? Muloma muli ese naanu?” Petero aakobosia ali, “Ewe oli Kristo.”

³⁰Nio Yesu aabatanyilila ali, “Mukhaboolelakho omundu yesi yesi tawe.”

³¹Abwenao Yesu arakikha khukhwikisia babeeka bewe ali, “Omwana wo Mundu khukhwola anyaasibwe lukali ne khubiilwa ne babemeelesi, basaayi bakhulu ne babekisia be Lilaka. Alerwa, mala enyuma we chindaalo chitaru alamukhe.”

³²Aababoolela kano abuwaanga. Khwako Petero aamuyila alubeka amurafwira.

³³Ne kakhali Yesu ekhebukha aalola babeeka bewe, mala arafuira Petero naloma ali, “Ndureo Sietani, kamebaasio kowo, se kaama khu Wele tawe ne kakhali kaama khu mundu!”

³⁴ Nio Yesu alaanga babaandu bakali ne babeeka bewe mala ababoolela ali, “Omundu yesi yesi ne enya khukhunondakho khukhwola ekaane omwene, abukule kumusalaba kwewe, mala anondekho.

³⁵ Sikila yesi yesi owenya khuonia bulamu bwewe akhabutibie ne kakhali yesi yesi otibia bulamu bwewe sikila ese ne Lomo ndayi yino akhabuonie.

³⁶Silikhoo nisio omundu anyala anyoola kaaba bali anyoola bie sibala sioosi mala atibie bulamu bwewe ku? Se siliio tawe!

³⁷Siina nisio omundu anyala aana khunyoola bulamu bwewe?

³⁸Omundu yesi yesi naambwa chisoni sikila ese, ne kamekisio kaase kano mu ndaalo chimayaanu che bueeyi chino, aakhaba Omwana wo Mundu nakheche mu luyali lwa Paapa wewe ne bamalaika batakatifu akhamukholele niye chisoni.”