Read lubukusu Lk. 1 Bible Online

Lk. 1 - lubukusu bible

Lk. 1

¹Khu mukoosi Teofilo: Babaandu bakali bakholile kamaani khukhwemenieelesia kamakhuwa ke bibiindu bibiekholeekhe mwifwe.

²Baandika niko khwaboolelwa ne naabo ba babona bibiindu bino khukhwama mu khurakikha lundi ba baboola burume obwo.

³Omukoosi, sikila nameniesele elala kamakhuwa kano koosi khukhwama mu khurakikha khwako, nebaasiisie ndi buli bulayi khuandikile bulayi nga kali.

⁴Ese ndikho khuandikila ewe kano nio omanyile elala bung'ali bwa buli siindu nisio wekisiibwe.

⁵Mu ndaalo nicho Herodi aba omwami owa Yuda, abao Omusaayi bali Sakaria, aba mulala khu basaayi ba Abicha, lisina lio mukhasi wewe liaba bali Lusabeti, aba owe luuya lwe basaayi.

⁶Bombi baaba baluungi mu moni cha Wele lundi bariira elala kamalaka ka Wele koosi ne lilakiilisia liako.

⁷Ne kakhali se babaakho ne omwana tawe, sikila Lusabeti aba omukuumba ne boombi baba bakofuule.

⁸Endaalo ndala Sakaria aba alikho akhola kimilimo kiewe nga Omusaayi mu Lukaangu, mu bwasio bwewe.

⁹Khuloondekhana ne kumwiima nikwo basaayi baloondanga, aroborwa ne kura khukhwosia bibiindu biiunya kumuuya kumulayi khu alutare. Nio engila mu Lukaangu lwo Mwami,

¹⁰ne babaandu babaandi baba balikho basaba enje siise sie khukhwosia bupaani.

¹¹Malaika owo Mwami amubonekhela emile lubeka luseecha lwa alutare niio bupaani bwosibwanga.

¹²Nga Sakaria ne amubona, esiindukha mala aba ne buuri bukali.

¹³Ne malaika amuboolela ali, “Sakaria, okharia tawe! Wele auliile lisaba liowo, mala omukhasi wowo Lusabeti alakhusaalila omwana omusoleeli mala omutiuukhe oli Yoana.

¹⁴Okhabe ne khoyo ne busangaafu lundi babaandu babaandi bakali balisangaala khulwe khusaalwa khwewe!

¹⁵ Aliba omundu omukali mu moni cho Mwami. Se alinywakho endali yosi yosi namwe siosi silulu tawe. Alichula Roho Omutakatifu ne akhasaalwa tawe,

¹⁶mala alikobosia ba Isiraeli bakali khu Mwami Wele wabwe.

¹⁷ Akhanyoe ebweeni wo Mwami, aliba owe kamaani ne bunyali nga omung'oosi Elicha. Aliambaasia bapaapa ne babaana lundi alala; alikaluukhasia be sileka, bakobole khu ngila eye khukhwibaasia buluungi; alikhola babaandu bo Mwami bamwirekekhele.”

¹⁸Nio Sakaria aboolela malaika ali, “Ese ndamanya ndiena ndi kano kaliba kario? Ese ne omuloosi wase khwakofuule.”

¹⁹ Malaika akobosia ali, “Ese ndi Kaburieli, nimaanga ebweeni wa Wele, niye oundumire ndomalome ne nawe mala khuboolele kamakhuwa kamalayi kano.

²⁰Ne kakhali ewe se wasuubiile burume bwase tawe, buliba bwa ng'ali mu siise silayi. Ne sikila se wasuubiile tawe, olaanda lulimi, khukhwola endaalo niyo nalaka ne khoole.”

²¹Mu siise esio babaandu ba baaba ne baliindiilile Sakaria bauka bali, siina sikila ne abukule siise sileeyi mu Lukaangu?

²²Nga arura, aba aandile lulimi khulomaloma nabo tawe, mala bamanya bali abone kamalola mu Lukaangu. Sikila se anyala khulomaloma tawe, akeleka busa ne kamakhono.

²³Nga bubwasio bwewe bwe khukhola mu Lukaangu bwawa, Sakaria akobola engo.

²⁴Enyuma we siise esio, omukhasi wewe Lusabeti aesia mala khulwe kimieesi kiraano se aabonekhakho mu baandu tawe.

²⁵Aloma ali, “Luno, Omwami Wele anjeetile ese; andusiisiekho chisoni nicho mbechanga nacho ebweeni we babaandu!”

²⁶Lusabeti nali ne nda kimieesi sita, Wele aruma malaika Kaburieli mu lukoba lwa Kalilaya lulaangwa Nasareti.

²⁷ Aba ne burume khu mukhaana owaba ne aseleelwe no mundu olaangwa bali Yosefu, owaba owe lisaaye lio mwami Daudi. Lisina lio mukhaana oyo liaba bali Maria.

²⁸Malaika aacha niio ali mala aloma ali, “kumuleembe kube ne nawe! Omwami ali nawe mala aakhubiitile chikhabi chingali.”

²⁹Ne kakhali Maria aayaaya lukali po nga ne aulila burume bubwareerwa ne malaika, mala auka nisio kamakhuwa kewe kaboola.

³⁰Nio Malaika amuboolela ali, “Maria, okharia tawe, Wele ali ne kumwalaalo khwiwe.

³¹ Olaesia mala osaale omwana omusoleeli, mala omutiuukhe oli Yesu.

³² Aliba omukali lundi alilaangwa Omwana owa Wele owe Angaaki Lukali, Omwami Wele akhamwamiie nga kukaawe Daudi ne aba,

³³mala aliba omwami owe lisaaye lia Yakobo mindali na mindali, bubwami bwewe se buliwa tawe!”

³⁴Maria aboolela malaika ali, “Ese ndi omukhaana owe yabwana. Khwako, kano kanyalikhana kariena?”

³⁵Malaika akobosia ali, “Roho Omutakatifu alakhwichakho, mala bunyali bwa Wele owe Angaaki Lukali bulakhufuunikha nga sisiiniini, khulwe sifuno sino omwana oyo aliba omutakatifu mala alilaangwa Omwana owa Wele.

³⁶Khebulila omulebe wowo Lusabeti niye balomanga bali omukuumba, luno ali ne nda eye kimieesi sita, akhaba nakofuule.

³⁷ Sikila se siliio sisiindu nisio Wele akhanyala khukhola tawe.”

³⁸Nio Maria amukobosia ali, “Ese ndi omukholi owo Mwami, lekha kekholekhe nga ne olomile.” Malaika aacha.

³⁹Siise esio Maria erekekha mala aacha khangu mu lukoba lwe mu sibala sie bikulu sie Buyuda.

⁴⁰Acha engila munju eya Sakaria mala akheesia Lusabeti.

⁴¹Nga Lusabeti aulila kimileembe kia Maria, omwana esosia munda mwa Lusabeti. Lusabeti echusibwa Roho Omutakatifu

⁴²mala aaloma mu mumilo kumukali ali, “Ewe wabiitwa chikhabi lukali khukhila bakhasi boosi, ne omwana niye olisaala aabiitwa chikhabi!

⁴³Siina sikila sisiindu siboofu siri ne sinjekholekhakho, maawe owo Mwami wase angeniye ese?

⁴⁴Sikila nga mbulile kimileembe kiowo, ne omwana esosia munda mwase ne busangaafu.

⁴⁵Ali ne khabi oyo osuubila ali niko Omwami amuboolela kacha khwekholekha.”

⁴⁶ Maria aloma ali, “Kumwoyo kwase kufumia Omwami;

⁴⁷kumwoyo kwase kwekhoya sikila Wele Omuonia wase

⁴⁸ sikila akhebuliile ese omukholi wewe oweboombia! Khukhwama luno babaandu balandanga bali owabiitwa chikhabi.

⁴⁹Sikila Wele Omunyali Owa Bioosi akholeele ese ke khuukia. Lisina liewe lili litakatifu,

⁵⁰khukhwama khu selukho khukhwola khu kiindi, akholelanga siisa abo bamuria.

⁵¹Akololosianga kumukhono kwewe kwe kamaani, mala asalanisia ba bebonia ne lirekekha liabwe lioosi.

⁵² Eekhisia babaami be bunyali khukhwama khu ndebe chabwe che bubwami, mala aniinia ba beboombia.

⁵³Ekusia be njala ne bibiindu bilayi, ne khulekha baiinda makhono mataaka.

⁵⁴Aliinda lilakiilisia nilio aelesia bakuuka befwe, lundi echile khuyeeta omukholi wewe Isiraeli.

⁵⁵ Akhebuliile khukholela siisa Aburahamu. Ne khu lisaaye liewe lioosi mindali na mindali!”

⁵⁶Maria amenya ne Lusabeti embi kimieesi kitaru mala akobola engo wewe.

⁵⁷Siise sia Lusabeti sie khusaala omwana siola, mala asaala omwana omusoleeli.

⁵⁸Baamenyile siimbi ne Lusabeti ne balebe bewe baulila nga Omwami ne abele omulayi khu Lusabeti, mala boosi bekhoya ne Lusabeti.

⁵⁹ Enyuma we lichuuma lilala, becha khu mukheba. Baaba balikho bacha khumutiuukha bali Sakaria lisina lia raraawe.

⁶⁰Ne kakhali maawe aloma ali, “Tawe! Lisina liewe lilaba bali Yoana.”

⁶¹Baboolela Lusabeti bali, “Ewe se oli no mulebe we lisina elio tawe!”

⁶²Nio bakeleka khu raraawe, khukhwenya khumanya lisina siina nilio enya atiuukhe omwana.

⁶³Sakaria asaba sipao sie khuandikakho mala aandika ali, “Lisina liewe bali Yoana.” Boosi besiindukha.

⁶⁴Abwene ne abwene Sakaria anyala khulomaloma mala arakikha khufumia Wele.

⁶⁵Bamenyile siimbi naye boosi baba ne buuri, ne kamakhuwa kano kasalanila mu sibala sie bikulu sie Buyuda sioosi.

⁶⁶Buli mundu owakaulilakho akebaasiakho ne khureeba ali, “Omwana yuno acha khuba naanu?” Sikila liamanyikhana busa bali bunyali bwo Omwami Owe Banamae bwaba khu niye.

⁶⁷Sakaria, raraawe owa Yoana echusibwa ne Roho Omutakatifu, mala alomaloma burume bwa Wele ali:

⁶⁸“Lekha khufumie Omwami Wele owa Isiraeli! Echile khuyeeta babaandu bewe mala abakholile babe balekhuule.

⁶⁹Akhuelesie efwe Omuonia owe kamaani, owe lisaaye lio mukholi wewe Daudi.

⁷⁰Aasuubisia khaale khubirira mu bang'oosi bewe batakatifu,

⁷¹ali alikhureesia efwe khukhwama khu basiku befwe. Khukhwama khu bunyali bwabo boosi babakhubiila efwe.

⁷²Aaloma ali alikholela siisa bakuuka befwe, ne khukhebulila endakaano yewe endakatifu,

⁷³ne lilichuba nilio echubila Aburahamu kuuka wefwe.

⁷⁴Aasuubisia khukhureesia khukhwama khu basiku befwe. Nio khumukholele kimilimo ne khukhali ne buuri tawe,

⁷⁵mu butakatifu ne buluungi ebweeni wewe, chindaalo choosi che bulamu bwefwe.

⁷⁶ “Ne ewe, mwana wase, olilaangwa omung'oosi owa Wele owe Angaaki Lukali. Olirangira ebweeni wo Mwami khumung'oonela engila,

⁷⁷khuboolela babaandu bewe oli balaonisibwa, sikila balabeelwa bubwoni bwabwe.

⁷⁸Wele wefwe ali owe siisa lundi omuolu. Alakhola buwaanga bwe buonia bukhubekho.

⁷⁹ Mala bukhosie khukhwama mwikulu, khwaabo boosi bamenyile mu siilima sie sisiiniini sie lifwa, khuluungisia likeenda liefwe mu ngila eye kumuleembe.”

⁸⁰Omwana chana achoa mala akhula ne mu roho. Amenya mu sichiimi khukhwola khu ndaalo niyo abonekha khu baandu ba Isiraeli.