Read lubukusu Lk. 10 Bible Online

Lk. 10 - lubukusu bible

Lk. 10

¹[2] Enyuma wa kano, Omwami Yesu arobora babeeka babaandi kamakhumi saba na babili, abaruma babili babili bache ebweeni wewe mu buli lukoba ne abuundu niio omwene aaba ne enya khucha.

² Nio ababoolela ali, “Likesa lili likali ne bakholi bali batiiti. Saba Omwami omwene mukuunda arume bakholi bakali mu likesa liewe.

³ Khemuche! Bona ndikho muruma enywe nga kamameeme mu bisuuche.

⁴ Mukhabukula sibeeti sie chirupia namwe elolooti eye babaandu babesabiilisia namwe biraaro tawe, mukhakheesia omundu yesi yesi khu ngila tawe.

⁵Enju yosi yosi niyo mwingilamo nyoa mulome muli, ‘kumuleembe kube munju muno!’

⁶Ne omundu owasiima kumuleembe aaba namenyile munju omwo, lekha likheesia lienywe lie kumuleembe libe ne naye, ne aaba nakhalimo tawe, lekha kumuleembe okwo kumukobolele enywe.

⁷ Menya munju omwo ne mulia ne munywa nibio bamueleesie, sikila omukholi olaana khuebwa kumuruungo kwewe. Mukhayiiyayiiya khukhwama munju omwo khucha mu kiindi tawe.

⁸Buli lwosi ne mwingila mu lukoba mala bamwakaanile, lia siosi siosi nisio bamuelesie.

⁹Khemuonie balwale be mu lukoba olwo mala muboolele babaandu bamwo muli, ‘Bubwami bwa Wele bwechile siimbi nanywe.’

¹⁰ Ne kakhali ne mwingila mu lukoba nilwo bakhamwakaanila tawe, ruramo mwime khu ngila mala mulome muli,

¹¹‘Akhaba lutamuusi lwe lukoba lwenywe lulwiambile khu bikele biefwe, khulweya lube nga buloli bumwikiicha enywe. Ne khebulila muli Bubwami bwa Wele bwechile siimbi nanywe!’

¹² Ese muandalasilia ndi endaalo eye likhalaka, Wele akhekesie siisa sikali khu Sodomu khukhila lukoba olwo!

¹³ “Silaamo khwiwe Korasini! Silaamo akhaba khwiwe Betesaita! Sikila kamayia kakakholekha mwinywe abanga kakholekha mu Tiro ne Sidoni andi bekanila khaale mu khwikhala ne befwarire kamakunia ne khukhwepuuka likokhe, khukhwekesia bali bekaniile bubwoni bwabwe!

¹⁴Wele akhekesie siisa sikali khu Tiro ne Sidoni khu Ndaalo eye likhalaka khukhila khwinywe.

¹⁵ Ne enywe Kaperinaumu! Mwenya khukhweniinia mwole mwikulu? Mulamwaatwa e makoombe.”

¹⁶ Yesu aboolela babeeka bewe ali, “Yesi yesi omuloba enywe aba andobile ne nase; ne yesi yesi oundoba ese aba alobile ne noyo owanduma.”

¹⁷Baloondi kamakhumi saba na babili abo bakobola ne bekhoya mala baloma bali, “Omwami akhaba bisieeno bikhuriire efwe nga khurumbure lisina liowo!”[3]

¹⁸Yesu abakobosia ali, “Mboone Sietani nakwa nga lueni ne lwama mwikulu.

¹⁹ Rekeeresia, namueleesie enywe bunyali khuswala khu ndemu ne khu walute, ne bunyali khu maani ko musiku ne se siliio silimuumisia enywe tawe.

²⁰Ne kakhaba kario mukhekhoya sikila bisieeno bimuria tawe ne kakhali mwekhoye sikila kamasina kenywe kaandikwa mwikulu.”

²¹Mu siise esio sisiene Yesu ekhoya mu Roho Omutakatifu, mala aaloma ali, “Ese siima Omwami owe likulu ne liloba, sikila akukhuulila bibiindu bino khu bakesi ne be limanya mala abifunulila bali nga babaana mu limanya. Paapa, sikila wenya kabe kario.

²² “Paapa wase ambelesie ese bibiindu bioosi, ne se aliio omundu omanyile omwana tawe, nakhali Paapa, namwe se aliio omanyile Paapa tawe, nakhali Omwana, ne yesi yesi niye Omwana aroboore, amwekesia Paapa.”

²³Mala Yesu akobola khu beeka bewe ababoolela mu bwikisi ali, “Bali nekhabi babona nibio enywe mubona bino!

²⁴Sikila muboolela enywe ndi, bang'oosi bakali ne babaami bekoomba khubona nibio enywe mubona bino mala se babibona tawe, ne khuulila niko enywe muulila kano mala se bakaulilakho tawe.”

²⁵ Omwekisia owe Lilaka, eecha khukhaka Yesu na aloma ali, “Omwekisia, khola ndiena nio nyoole bulamu bwa mindali?”

²⁶Yesu amukobosia ali, “Lilaka liloma lili siina?”

²⁷ Omwekisia chana amukobosia ali, “Siima Omwami Wele wowo ne kumwoyo kwowo kwoosi ne liiba liowo lioosi ne kamaani kowo koosi ne kamebaasio kowo koosi, lundi siima owasio nga ne wesiima wamwene.”

²⁸ Yesu amuboolela ali, “Wakoboosie bulayi; khola kano mala olamenya.”

²⁹Ne kakhali omwekisia owe Lilaka oyo enya khukhweyekesia ali niye omulayi, nio areeba Yesu ali, “Owasiase niye naanu?”

³⁰Yesu akobosia ali, “Omundu aba ama Yerusalemu, ekha acha e Yeriko, banuuli bamwibwaakala bamufuula chingubo, bamupa mala bamulekha aochaocha.

³¹Omusaayi yesi aba alikho achila khu ngila okhwo, nga abona omundu oyo atalanda.

³²Akhaba omulawi owaba yesi nabira nga amubona, atalanda.

³³ Ne kakhali Omusamaria nga ne aba khu lukeendo lwewe, ola niio omundu chana aba, nga amubona, aamukholela siisa.

³⁴Aachao amulola, aachukha kamafura ne ndali mu makoonjo ne chimbala chewe aamusilikha, mala amwikhasia khu punda yewe omwene ne khumuila munju ndala eye bakeni, ne khumuliinda.

³⁵Ne endaalo eyaloondakho, abukula chidinari chibili aelesia omuliindi wenju chana eye bakeni, aloma ali, ‘Nindile omundu wase yuno, ne siosi siosi sikane sitasikhekho mu khurumikhira, nga khakobole khakhuruunge!’ ”

³⁶Nio Yesu areeba ali, “Khu bataru bano, naanu niye ewe wibaasia oli ekesia khuba owasie khu mundu owakwa mu banuuli?”

³⁷Omwekisia owe Lilaka amukobosia ali, “Oyo owamukholela siisa.” Nio Yesu amuboolela ali, “Nono cha, mala wesi okhole orio.”

³⁸ Nga Yesu ne babeeka bachiililila ne lukeendo lwabwe, boola mu sirekere silala, ne omukhasi owalaangwa Marita akaanila Yesu munju mwewe.

³⁹Marita aba ne wandaaye owalaangwa Maria, owekhala mu bikele bio Mwami narekeeresia liliekisia liewe.

⁴⁰Ne kakhali Marita akhalala khulwe bukali bwe kimilimo nikio aba nakhola, mala acha niio Yesu aba amureeba ali, “Omwami, se obonakho ne buli busiro khwise nga omwana wefwe ne andekhele ese khukhalabana seng'ene tawe? Muboolele anjeete!”

⁴¹Nio Omwami amukobosia ali, “Marita, Marita, ewe weembeleele ne khunanisibwa khu biindu bikali po,

⁴²ne kakhali sisienyekha sili silala siong'ene. Maria aroboore sisiindu silayi, nisio akhalinuulwa tawe.”