Read lubukusu Lk. 15 Bible Online

Lk. 15 - lubukusu bible

Lk. 15

¹ Endaalo ndala baroosi be busuuru ne babooni boosi baba balikho becha siimbi khu Yesu khumurekeeresia.

²Bafarisayo ne baandiki beng'ulung'unya ne baloma bali, “Omundu yuno akaanilanga babooni ne khulia nabo!”

³Nio Yesu ababoolela lukano luno:

⁴“Mundu siina khwinywe onyala aba ne kamakheese emia ndala, ne aaba natibia lilala khu niko, salekha kamakheese kamakhumi tisa na tisa mu sichiimi mala acha ayiima litibile khukhwola nga alinyoola tawe ku?

⁵Ne alinyoolile alira khu mabeka ne ekhoya.

⁶Ne oli ola engo, alaanga alala basaale bewe ne bamenyile siimbi nababoolela ali, ‘Khemwikhoye alala ne nase sikila nanyoolile likheese liase libeele litibile.’

⁷Ng'ali ese muboolela enywe ndi kaliba busa kario, liliekhoya likali liliba mwikulu khulwo mwoni mulala owikanila, khukhila babaandu kamakhumi tisa na tisa babebukula khuba baluungi bakhenya khukhwikanila tawe.

⁸“Namwe mukhasi siina ooli ne chisilingi ekhumi mala atibiakho ndala, se aambia etaa mala eeya munju mwoosi, ayiima ne kamaani khukhwola nga nakinyoola tawe ku?

⁹Nga nakinyoola alaanga alala basaale bewe nende bamenyile siimbi naboola ali, ‘Khemwikhoye alala ne nase, sikila nanyoolile esilingi yase abeele etibile.’

¹⁰Ng'ali muboolela enywe ndi kaliba busa kario, liliekhoya liliba ebweeni we ba malaika ba Wele khulwo mwoni mulala owekanila.”

¹¹Yesu achiililila khuloma ali, “Abao omundu owaba ne babaana bewe be sisoleeli babili,

¹²omutiiti aboolela raraawe ali, ‘Paapa kheumbelesie sitonyi siase sie kimiaandu.’ Omundu oyo akaba babaana bewe babili abo kimiaandu.

¹³Enyuma we chindaalo ndiiti, omutiiti oyo abukula kimiaandu kiewe mala auyila mu sibala sie aleeyi, mala ebweeneyo asasia kimiaandu mu limenya lie sifwaabi.

¹⁴Enyuma we khusasia buli siindu, enjala engali lukali yakwa mu sibala esio. Enjala yarakikha khu mulia ne se aba na siindu tawe.

¹⁵Nio acha aandikwa khukholela omundu mulala owe sibala esio. Omundu oyo amuila mu mukuunda aliisienge chingurwe.

¹⁶Omwana oyo ekoomba khulia kamoola niko chingurwe chalichanga, omundu onyala abeele amuelesiakho siakhulia siosi siosi se abao tawe.

¹⁷Ekhumaliilikha kamakesi kamwichamo mala aloma ali, ‘Bakholi ba Paapa nibo aandika balia ne birama, ne ese ano enjala yinjira!

¹⁸Ndenyokha, mala nje khu Paapa, ne ndamuboolela ndi: Paapa, nakholile bubwoni khu Wele nende khwiwe.

¹⁹Se nolaana lundi khulaangwa omwana wowo tawe, khole khuuba nga mulala khu bakholi bowo.’ ”

²⁰Eenyokha, aarakikha lukeendo lwe khukobola engo. Ne nga aaba ne asiili sinao, raraawe aamubona mala aamukholela siisa, aatima aacha aamwikhoyela ne khumwekwayila.

²¹“Omwana oyo aboolela raraawe ali, ‘Paapa, nakholile bubwoni khu Wele nende khwiwe, se nolaana lundi khulaangwa omwana wowo tawe.’

²²Ne kakhali raraawe aboolela bakholi bewe ali, ‘Reera khangu engubo endayi mala mu mufware, mure embete khu lwala lwewe mala mu mufware biraaro.

²³Khemuche mureere euunwa enefu mwire, mala khube ne naikara!

²⁴Sikila omwana wase yuno aba afwa mala luno omulamu; aba aatiba, ne luno anyoolekhe.’ Nio barakikha enaikara ne khukhwekhoya.

²⁵“Siise esio omusoleeli omukhulu aba achile e mukuunda ne nga aba ne alikho echa embiie engo, aulila kamatuungu kaapa ne bukhino.

²⁶Nio alaanga omukholi mulala amureeba ali, ‘Siina sisikholeekhe?’

²⁷Omukholi amukobosia ali, ‘Wandaayo echile mala raraao amwiriire euunwa enefu sikila akoboole ne ali omulamu.’

²⁸“Omusoleeli omukhulu chana akhalala lukali, mala aloba khukhwingila munju. Nio raraawe arura enje mala amwikoonjelela engile munju.

²⁹Ne kakhali naye akobosia raraawe ali, ‘Lola kimiiko kino kioosi nakhukholeele nga omukholi, ne se nalekhakho khuria lilaka liowo tawe, ne kakhaba kario ewe okhambakho khameeme khong'ene nalia nasangaala ne basaale base tawe!

³⁰Ne omwana wowo yuno, owasasia kimiaandu kiowo ne bakhasi baeeyi, nga ne echile omwiriire euunwa enefu!’

³¹Raraawe amuboolela ali, ‘Mwana wase, buli lwoosi ewe oli nase, ne bioosi nibio ndi nabio bili bibiowo.

³²Ne kakhali khukhoyeele khukholela wandaayo naikara mala khusangaale sikila wandaayo yuno aba afwa ne luno ali omulamu, aba atiba ne luno anyoolekhe.’ ”