Read lubukusu Lk. 17 Bible Online

Lk. 17 - lubukusu bible

Lk. 17

¹Yesu aboolela babeeka bewe ali, “Kamakhako ke khukhola bubwoni khukhwola kabeo, ne sili silaamo khuyo okareerera!

²Bwakhabeele bulayi khu niye abanga aboyiilwe lususi mwikosi mala amwaatwa mu nyanja khukhila nakila mulala khu batiiti bano akhole bubwoni.

³ Khwako mwiyaye mu niko mukhola! “Wandaayo aaba nakhola bubwoni, murafwire. Ne aaba ne ekanila, mubeele.

⁴Ne aaba nakhukoseele kamakhabi saba khu ndaalo ndala mala akobola kamakhabi koosi saba naloma ali, ‘Mbeele,’ Khukhwola omubeele.”

⁵Barumwa baboolela Omwami bali, “Khutase lisuubila.”

⁶Ne Omwami abakobosia ali, “Mwaaba ne lisuubila nga khamiicho khe kumupeeli, onyala waboolela kumurongooro kumuboofu kuno oli, ‘Siukha oche wibiaale mu nyanja;’ mala kulakhola kurio.

⁷“Mulala khwinywe aaba nali no mukholi omulimilanga namwe omwayilanga kamakheese, omukholi oyo naloota khukhwama e mukuunda owamuandika anyala amuboolela ali, ‘Yiicha khangu ano wikhale khu sialwa olie ku?’

⁸Se anyala amuboolela ario tawe, ne kakhali amuboolela ali, ‘Ng'onele siakhulia sie ekolooba mala umbe ndie ne khunywa, ne malile nio nawe olie.’

⁹Omukholi oyo se anyala apilwa orio sikila khuria kamalaka tawe.

¹⁰Khwako kali kario khwinywe mwesi, ne mumalile khukhola niko mulakilwe, loma muli, ‘Efwe khuli bakholi bakhali ne bukhala tawe, khwakholile busa kimilimo nikio khwenyibwa khukhole.’ ”

¹¹Nga Yesu aba khu lukeendo lwe khucha Yerusalemu abirira khu lwakha lwa Samaria ne Kalilaya.

¹²Yesu ne alikho engila mu sirekere akaanana ne babaandu ekhumi balwala bulwaale bwe kamakele. Bema sinao,

¹³baboolela Yesu mu mumilo kwe angaaki bali, “Omwami Yesu khukholele siisa!”

¹⁴ Nga Yesu ne ababona ababoolela ali, “Khemuche mwiyekesie khu basaayi.” Ne nga baba ne balikho bacha baona.

¹⁵Nga mulala khu nibo abona ali aonile, akobola ne alikho afumia Wele ne kumumilo kumuboofu.

¹⁶Akwa mu bikele bia Yesu amupila orio. Omundu oyo aba Omusamaria.

¹⁷Yesu areeba ali, “Babaandu baonisibwe se babeele ekhumi? Ne tisa bali waena?

¹⁸Se aliio omundu okundi okoboole khu khupila Wele ali orio tawe nakhali omusamaria yuno yeng'ene?”

¹⁹Nio Yesu amuboolela ali, “Yinyokha oche, lisuubila liowo liakhuoniisie.”

²⁰Bafarisayo balala bareeba Yesu bali, “Bubwami bwa Wele buliicha liina?” Abakobosia ali, “Bubwami bwa Wele se bwiicha ne bimanyisio nibio mubona tawe.

²¹Namwe se baloma bali, ‘Lola buli ano!’ Namwe ‘Eyo tawe!’ Sikila Bubwami bwa Wele buli akari wenywe.”

²²Nio aboolela babeeka ali, “Chindaalo chilikho chiicha nicho muliekoomba khubona endaalo ndala khu ndaalo cho Mwana wo Mundu ne se mukhakibone tawe.

²³Balibao balimuboolela enywe bali, ‘Lola, oyosi eyo,’ namwe ‘Lola, oyusiina ano!’ Mukha chayo namwe mwabaloondakho tawe.

²⁴Sikila nga lueni ne lumeniuukha lukhosia mu ngaaki chimbeka chombi, nio akhaba Omwana wo Mundu alikhola ario khu ndaalo yewe.

²⁵Ne kakhali khukhwola apisibwe siibi mu biindu bikali, mala eselukho yino emulobe.

²⁶ Nga kaba mu ndaalo cha Noa, kaliba kario akhaba mu ndaalo cho Mwana wo Mundu.

²⁷ Buli mundu aachiililila khulia ne khunywa, ne khuyila bakhasi, khukhwola khu ndaalo niyo Noa engilila mu liaaro mala kameechi kechula keera boosi.

²⁸ Bulayi bwene nga kaba mu ndaalo cha Luti, babaandu bachiililila khulia ne khunywa, khukula ne khukusia, khumiicha ne khukhwombakha.

²⁹Khu ndaalo niyo Luti arurira mu Sodomu, kumulilo kumurafu lukali kwecha aasi khukhwama mwikulu mala kwababunia boosi.

³⁰Nono kaliba kario mu ndaalo niyo Omwana owo Mundu aliichilakho.

³¹ “Khu ndaalo eyo omundu oli khu nju khu ngaaki sakhekhe engile munju yewe abukule bibiewe tawe; ne akhaba oli e mukuunda se alikobola engo tawe.

³² Khebulila mukha Luti!

³³ Omundu yesi yesi okhaka khuonia bulamu bwewe akhabutibie; ne oyo otibia bulamu bwewe akhabuonie!

³⁴Ng'ali ese muboolela enywe ndi, siilo esio babaandu babili baliba bakonile khu sitanda, mulala alibukulwa nokundi arame.

³⁵Bakhasi babili baliba basiela alala, mulala alibukulwa ne okundi arame.

³⁶[Babaandu be siseecha babili baliba ne bakhola mu mukuunda, mulala alibukulwa, ne okundi alilekhwa enyuma.]”[4]

³⁷Babeeka bamureeba bali, “Waena, Omwami?” Yesu abakobosia ali, “Chingosia chibuusiananga niio sifwiile sili.”