Read lubukusu Lk. 18 Bible Online

Lk. 18 - lubukusu bible

Lk. 18

¹Nio Yesu aboolela babeeka bewe lukano khubekisia ali khukhwola basabe buli lwoosi bakhafwa kimiooyo tawe.

²Aloma ali, “Mu lukoba nabulebe abamo omukhalaki mulala okhaaria Wele tawe, lundi alekelesia buli mundu.

³Ne abao namulekhwa mu lukoba lwene olwo owachichanga njilili njilili khu mukhalaki oyo ne aloma ali, ‘Njeete kholelwe bung'ali akari wase no musiku wase.’

⁴Khu siise sileeyi omukhalaki oyo alobanga, ekhumaliliikha aloma ali, ‘Akhaba ne kharia Wele namwe ne khabala omundu khuba siindu tawe,

⁵ne sikila namulekhwa yuno alikho anaania ese, ndamuyeeta, ne khakhola ndio tawe, alanduya khukhwiicha buli lwoosi!’ ”

⁶Nio Yesu achiililila khuloma ali, “Ulila niko omukhalaki okhali omuluungi yuno aloma.

⁷Nono, Wele se anyala khukhalakila babaandu bewe bulayi bamulililanga siilo ne kumuusi tawe ku? Alakhiinda khubayeeta ku?

⁸Muboolela ndi alabayeeta khangu. Ne kakhaba kario, Omwana wo Mundu ne aliicha alinyoola lisuubila khu sibala ku?”

⁹Lundi Yesu aboola lukano khu baandu balala ba baaba ne bebukula khuba baluungi, ne khulekelesianga babaandi. Aloma ali,

¹⁰“Baandu babili bacha mu Lukaangu khusaba, mulala aaba Omufarisayo ne okundi aaba omuroosi owe busuuru.

¹¹Omufarisayo eema mala asaba ali, ‘Wele, ese khusiima, sikila se ndi omulianga, namwe ookhali omweyikinwa, namwe omueeyi nga babaandu babaandi tawe. Khusiima sikila se ndi nga omuroosi owe busuuru yuno tawe.

¹²Ese neyimanaanga siakhulia khabili khwichuuma. Mbaananga silala khwikhumi sie bibiindu bioosi nibio nyoolanga.’

¹³Ne omuroosi owe busuuru eema sinao, se anyala akhaba khulola chimoni chewe mu ngaaki tawe. Ne kakhali ekhupaka a sifuba naloma ali, ‘Wele ese omwoni, kholele siisa!’ ”

¹⁴ Yesu aababoolela ali, “Muboolela enywe ndi, omuroosi owe busuuru oyo aaba omuluungi khu Wele nga ne aakobola engo, ne Omufarisayo tawe. Sikila buli mundu oweniinia aliboombisibwa ne owe boombia aliniinisibwa.”

¹⁵Babaandu balala bareera babaana batiiti khu Yesu abarekho kamakhono. Nga babeeka babona bario, babarafwira.

¹⁶Ne kakhali Yesu alaanga, babaana aloma ali, “Lekha babaana beche niio ndi ne mukhabakhiingilila tawe, sikila Bubwami bwa Wele buli bwe babaandu nga bano bari.

¹⁷Ng'ali muboolela enywe ndi, yesi yesi okhakaanila Bubwami bwa Wele nga omwana tawe, se alibwingilamo tawe.”

¹⁸Omwimeelesi omuyaudi areeba Yesu ali, “Omwekisia omulayi, khola ndiena nio nyoole bulamu bwa mindali?”

¹⁹Yesu aamukobosia ali, “Siina sikila ne unaanga oli omulayi? Se alikhoo oli omulayi tawe, nakhali Wele yeng'ene.

²⁰ Omanyile kamalaka kaboola kali, ‘Okhaba omueeyi tawe; okheera tawe; okheeba tawe; okhakiikha owasio tawe; orie raraao ne maao.’ ”

²¹Omundu oyo aboolela Yesu ali, “Natiila kano koosi khukhwama mu bwana bwase.”

²²Nga Yesu ne aulila ario, amuboolela ali, “Wabombeleelwe ne sisiindu silala siong'ene. Kusia bioosi nibio oli nabio mala okabile bataambi, ne olaba ne libiikhilo mwikulu, mala wiche unondekho.”

²³Ne nga aulila kano abeelela sikila aba omuiinda lukali.

²⁴Nga Yesu ne abona nabeelele lukali aboola ali, “Buli buandalafu lukali khwaabo bali ne kimiaandu khukhwingila mu bwami bwa Wele!

²⁵Lili liliangu khu ngamia khubirira mu mwanya kwe sindani, khukhila omuiinda khukhwingila mu Bwami bwa Wele.”

²⁶Abo babaulila naloma bareeba bali, “Nono naanu onyala aonisibwa?”

²⁷Yesu akobosia ali, “Likhanyalikhana khu mundu tawe, linyalikhana khu Wele.”

²⁸Nio Petero aloma ali, “Lola! Efwe khwalekhile bioosi khu khuloondakho.”

²⁹Yesu ababoolela ali, “Yee ne ng'ali musuubisia ndi yesi yesi olekha enju yewe namwe omukhasi wewe, namwe wandaaye, namwe basaasi, namwe babaana, sikila Bubwami bwa Wele,

³⁰alanyoola bikali mu siise sino, ne mu siise sisiicha alinyoola bulamu bwa mindali.”

³¹Yesu abukula babeeka ekhumi na babili abaila alubeka mala ababoolela ali, “Rekeeresia, khulikho khuniina khucha Yerusalemu mala buli siindu sisiaandikwa ne bang'oosi khu Mwana wo Mundu sicha khwichusibwa.

³²Acha khuaanwa khu Be Chikholo bamukholele siienya meno, bamuambie chisoni ne khumufuchakho.

³³Balamupa kimikhomwa mala bamwire, ne khu ndaalo ekhola khataru alilamukha.”

³⁴Ne kakhali babeeka se bamanyilisia siosi siosi khu biindu bino tawe namwe sifuno sie kamakhuwa kano tawe, se batiila nilio Yesu alomaloma tawe.

³⁵Nga Yesu aba nakana khwola e Yeriko, omubofu aba ekhaale khu ngila, asaba buyeeti.

³⁶Nga omubofu oyo aulila babaandu ne babira areeba ali, “Siina nisio?”

³⁷Bamuboolela bali, “Yesu owa Nasareti alikho abira.”

³⁸Aloma mu mumilo kwe angaaki ali, “Yesu Mwana owa Daudi! Kholele siisa!”

³⁹Babaandu be bweeni bamurafwira bali sila. Ne kakhali atasa khuloma lukali ali, “Mwana owa Daudi kholele siisa!”

⁴⁰Nio Yesu eema mala aloma bareere omubofu oyo. Oli omubofu chana ola siimbi, Yesu amureeba ali,

⁴¹“Wenya khukholele siina?” Omubofu amuboolela ali, “Omwami nenya mbone lundi.”

⁴²Nio Yesu amuboolela ali, “Nono khobone! Lisuubila liowo liakhuoniisie.”

⁴³Ne ao ne nao abona, ne khuloonda khu Yesu ne aelesia Wele luyali. Nga babaandu boosi babona bario, bafumia Wele.