Read lubukusu Lk. 19 Bible Online

Lk. 19 - lubukusu bible

Lk. 19

¹Yesu engila mu Yeriko ne ali khu lukeendo lwewe.

²Abao omuiinda bali Sakayo owaba omukhongo we khurosia busuuru.

³Ekoomba khubona Yesu amanye ali omundu lukano siina, ne se anyala khumubona tawe sikila babaandu baba bakali, mala niye aba omwiimbi.

⁴Nio atima ebweeni aniina khu mukhuyu nio amubone sikila Yesu aba alabirira khu ngila eyo.

⁵Nga Yesu ola a mukhuyu akalama angaaki, mala aboolela Sakayo ali, “Sakayo yiikha khangu, sikila endaalo yino khukhwola ningile munju mwowo.”

⁶Nio Sakayo ekha khangu mala akaanila Yesu ne liliekhoya likali.

⁷Babaandu boosi ba babona barakikha khukhwelung'unya, ne baloma bali, “Omundu yuno achiile khuba omukeni wo mundu omwoni!”

⁸Sakayo enyokha mala aboolela Omwami ali, “Lola Omwami, ndaelesia bataambi enusu eye kimiaandu kiase. Ne naaba ne nabea omundu yesi yesi khu siindu siosi siosi, ndamukoboselia sikelo esio khukhwola khane.”

⁹Ne Yesu amukobosia ali, “Endaalo yino buonia bwechile munju yino, sikila omundu yuno yesi ali owe lisaaye lia Aburahamu.

¹⁰ Sikila Omwana wo Mundu echa khuyiima ne khuonia babatiba.”

¹¹ Nga babaandu baba ne barekereesie kano, Yesu achiililila ababoolela lukano. Sikila aba siimbi khwola Yerusalemu ne babaandu bebaasianga bali Bubwami bwa Wele bwaba siimbi khubonekha.

¹²Nio ababoolela ali, “Abao omukhongo owaba ne alikho acha mu sibala sie aleeyi anyoole bubwami, mala ne anyoolile bubwami obwo, akobole engo.

¹³Nakharekukha tawe, alaanga bakholi bewe ekhumi mala abaelesia chirupia, ababoolela ali, ‘Nyoola bukhala mu rupia chino nabwila ngobola.’

¹⁴Babaandu be mu sibala siewe bamubiila, nio baruma bakholi enyuma wewe bali, ‘Se khwenya omundu yuno akhwamiie tawe.’

¹⁵“Omundu oyo akholwa omwami mala akobola engo. Arusia lilaka khangu bakholi nibo aelesia chirupia balangwe amanye bukhala nibwo baba ne banyoolile.

¹⁶Owe khunyoa echa ebweeni wewe amuboolela ali, ‘Omwami, erupia niyo wambelesia yareerire bukhala bwe chichiindi ekhumi.’

¹⁷Omwami oyo aboolela omukholi ali, ‘Oli omukholi omulayi, wakholile bulayi! Sikila wabele omusuubilwa mu makeekhe, ndakhukhola obe omwimeelesi we chingoba ekhumi.’

¹⁸Omukholi okhola khabili echa aloma ali, ‘Omwami, erupia yowo yareerire bukhala bwe chichiindi chiraano.’

¹⁹Ne omwami, amuboolela ali, ‘Olaba omwimeelesi khu ngoba chiraano.’

²⁰“Omukholi omumaliilisi echa aloma ali, ‘Omwami, erupia yowo niyeeyi. Nakiboa mu sitambala mala nakikisa.

²¹Nakhuria, sikila ewe oli omundu omurafu. Obukulanga nisio okhabiikha tawe, lundi okesanga nibio okhamiicha tawe.’

²²Omwami amuboolela ali, ‘Oli omukholi omubi, ndakhukhalakila khuloondekhana ne lilomaloma liowo wamwene! Wamanya oli ese ndi omundu omurafu, mbukulanga biikhali bibiase tawe, lundi ngesaanga nibio khamiicha tawe.

²³Nono siina, sisiakila ne waloba khura erupia yase mu bengi oli nicha nyoolelakho bukhala?’

²⁴“Nio omwami oyo aboolela abo ba baaba ne bemileo ali, ‘Munuule erupia niyo ali nayo muelesie oyo oli nacho ekhumi.’

²⁵Omwami, ‘Yuno ali nacho ekhumi!’

²⁶ Abakobosia ali, ‘Muboolela ndi buli mundu oli ne sisiindu alaebwa bibiindi, ne oyo okhali na siindu tawe, akhaba sitiiti nisio ali nasio alanuulwa.

²⁷Ne basiku base bakheenyanga ese mbe omwami wabwe tawe, bareere ano mala mubeere ebweeni wase!’ ”

²⁸Yesu nga amala khuloma kano, achiililila ne lukeendo lwewe lwe khucha Yerusalemu.

²⁹Nga ne embiya e Betifake ne Betania a sikulu sia Miseituni, aruma babeeka bewe babili,

³⁰ne khubaa kamalaka kano ali, “Cha mu sirekere sie ataayi esio, nga ne mwingilamo, mulanyoola epunda enjoka niyo omundu akhakeendelakho tawe. Kikangulule mala mukireere ano.

³¹Omundu yesi yesi aaba ne amureeba ali, ‘Siina sikila ne mukikangulula,’ muboolele muli Omwami akienya.”

³²Nio babeeka bacha mala banyoola buli siindu nga baba ne baboolelwe.

³³Ne oli balikho bakangulula epunda, babeeneyo bareeba bali, “Siina sikila ne mukikangulula?”

³⁴Bakobosia bali, “Omwami akienya,”

³⁵Mala bakirerera Yesu. Nio baala chingubo chabwe khu punda eyo ne khukhwikhasiakho Yesu.

³⁶Nga Yesu akeendela khu punda, babaandu baala chingubo chabwe khu ngila epunda yachikeendelakho.

³⁷Nga Yesu ne embiya Yerusalemu, niio engila esungukhila khu sikulu sia Miseituni, babeeka bewe boosi barakikha khukhwekhoya ne khufumia Wele ne kumumilo kwe angaaki khulwe kimilimo kimiboofu nikio baba ne baboone.

³⁸ Ne baboola bali, “Wele biita chikhabi omuruki owichila mu lisina lio Mwami! Kumuleembe kube mwikulu ne luyali lube khu Wele!”

³⁹Nio Bafarisayo balala mu sipupu baboolela Yesu bali, “Omwekisia sisia babeeka bowo.”

⁴⁰Yesu abakobosia ali, “Muboolela enywe ndi basila kamabaale kalarakikha khu khufumia.”

⁴¹Yesu nga ne ola siimbi ne lukoba lwa Yerusalemu alubona mala arakikha khululila ne aloma ali,

⁴²“Abaanga mu manyile endaalo eya luno bibiindu bibienyekha nio kumuleembe kubeo! Ne kakhali luno biakisiibwe se mubibona tawe!

⁴³Siise silikho siicha, basiku benywe bakhamubotookhelele mala bamwibwaakale khukhwama chimbeka choosi.

⁴⁴Balimubunisilia enywe elala, ne babaandu balimo. Ne se balilekha libaale khulindi tawe, sikila se mwakhebulila siise nisio Wele echelamo khumuonia enywe tawe.”

⁴⁵Nga Yesu ne engila mu Lukaangu arakikha khutimania baboofuli baruremo,

⁴⁶ ababoolela ali, “Liaandikwa lili, ‘Enju yase elaba Enju eye lisaba,’ Ne kakhali enywe mwakikholile libina lie banuuli!”

⁴⁷ Buli endaalo Yesu ekisianga mu Lukaangu. Basaayi bakhulu, baandiki ne babemeelesi be babaandu beenya khumwiira;

⁴⁸ne kakhali se banyoola bubweyaangu bwe khukhola bario tawe, sikila babaandu boosi bachiililila khumurekeeresia mu burekereefu bukali.