Read lubukusu Lk. 2 Bible Online

Lk. 2 - lubukusu bible

Lk. 2

¹Siise esio Omuruki Akosito arusia lilaka lie khubala babaandu mu bwami bwe Barumi bwoosi.

²Khuno nikhwo khukhwaba khubalwa khwe khunyoa. Kurenio niye owaba omuruki owa Siria.

³Khwako buli mulala acha khukhwiandikisia mu lukoba lwe wabwe.

⁴Yosefu aama mu lukoba lwa Nasareti mu Kalilaya acha mu lukoba lwe Betelehemu mu Buyuda, abuundu niio Omwami Daudi asaalwa. Yosefu aacha ebweeneyo sikila aba owe lisaaye lio mwami Daudi.

⁵Yosefu aacha khukhwiandikisia ne Maria niye aba naseleele, ne Maria aaba ali ne nda.

⁶Nga ne baba mu Betelehemu siise sia Maria sie khukhwirusiakho siola.

⁷Asaala omwana wewe omubele omusoleeli amura mu bikubo bie babaana mala amwalisia khu lwelo nilwo chikhaafu chaliilangakho, sikila se banyoola niio baulukhila munju eye bakeni tawe.

⁸Babaayi babao mu sibala esio babayaanga kamatuuli kabwe akhaba siilo.

⁹Malaika owo Mwami ababonekhela, mala luyali lwo Mwami lwabakhosiakho. Baaba ne buuri bukali po,

¹⁰nio malaika ababoolela ali, “Mukharia tawe! Ndi ano ne Elomo Endayi khwinywe, ekhareere ekhoyo engali khu baandu boosi.

¹¹Endaalo yino mu Lukoba lwa Daudi Kristo Omwami omuonia wefwe asaalilwe!

¹²Ne sino silaba simanyisio khwinywe: Mulanyoola omwana areerwe mu bikubo bie babaana mala bamwaliisie khu lwelo nilwo chikhaafu chililangakho.”

¹³Siise esio bamalaika be mwikulu bakali babonekha ne bafumia Wele bali:

¹⁴“Luyali lube khu Wele owe mwikulu oli angaaki lukali, ne kumuleembe kube khu sibala khwaabo bamusiimisianga!”

¹⁵Nga malaika ne babarurao bakobola mwikulu, babaayi baboolana bali, “Khe khuche e Betelehemu khubone sisiindu sisiikholeekhe sino nisio Omwami Wele Omunyali Owa Bioosi akhubooleele efwe.”

¹⁶Khwako, bacha khangu banyoola Maria ne Yosefu, mala babona omwana ali khu lwelo nilwo chikhaafu chaliilangakho.

¹⁷Nga babaayi babona omwana baboolela basaasi niko malaika aaba nababooleele khu mwana.

¹⁸Boosi babaulila niko babaayi baloma, bauka.

¹⁹Maria abiikha kamakhuwa kano koosi mu mwoyo mala akebaasiakho lukali.

²⁰Babaayi bakobolayo ne bafumia Wele khulwe bibiindu bioosi nibio baba ne baulile ne khubona, biaba busa nga malaika ne aaba nababooleele.

²¹ Enyuma we lichuuma lilala nga siise ne sioola sie khukheba omwana bamutiuukha bali Yesu. Lisina nilio malaika aaboolela maawe nakhamuesia tawe.

²² Siise nisio Yosefu ne Maria bakhoyeele babe bakwalaafu khuloondekhana ne Lilaka lia Musa, sioola. Nio babukula omwana bamuyila Yerusalemu khumuana khu Mwami,

²³ nga liaandikwa mu Lilaka lio Mwami lili, “Buli omwana omubele omusoleeli aanwe khu Mwami.”

²⁴Lundi bacha khuaana embosio eye kamauusi ke mundaa namwe kamabaya kabili khuloondekhana ne Lilaka lio Mwami.

²⁵Siise esio abao omundu owalaangwa Simioni, amenyanga mu Yerusalemu. Aba omundu omulayi owaria Wele, mala alindiililanga buonia bwa Isiraeli. Roho Omutakatifu aaba naye,

²⁶mala aaba aamusuubisia ali khukhwola abone Masiiya owo Mwami owasuubisibwa nio afwe.

²⁷Simioni arangirirwa ne Roho acha mu Lukaangu. Nga basaasi bareera omwana Yesu mu Lukaangu bamukholele niko Lilaka lienya,

²⁸Simioni atiila omwana mu makhono kewe mala asiima Wele ali:

²⁹“Ee Omwami ewe waliinda lisuubisia liowo, nono onyala walekhuula omukholi wowo afwe ne kumuleembe.

³⁰Naboone buonia bwowo ne chimoni chase,

³¹nibwo orekeekhe mu moni che babaandu boosi.

³² Buno buwaanga buumanyisia lilienya liowo khu Be Chikholo chichiindi, mala bureere luyali khu baandu bowo Baisiraeli.”

³³Raraawe ne maawe bauka bibiindu nibio Simioni aloma khu mwana.

³⁴Nio Simioni ababiita chikhabi mala aboolela Maria, maawe owo mwana ali, “Omwana yuno aaroborwa ne Wele khulwe lilionakwa lie bakali, lundi khulwe buonia bwe bakali mu Isiraeli. Aliba simanyisio khukhwama khu Wele nisio bakali balilomakho kamabi

³⁵mala alibuula kamebaasio kabwe ke mu mwoyo. Ne ewe okhabe ne bubeeleli bukali bukhuchuune mu mwoyo nga niye baunile embalu.”

³⁶Abao omuloosi omung'oosi namulekhwa owalaangwa bali Ana, omukhaana owa Fanueli owe kholo eya Asieri. Amenya no museecha wewe kimiiko saba kiong'ene,

³⁷siise sino aaba ne bukhulu bwe kimiiko kamakhumi munaane na kine. Se arurangakho mu Lukaangu tawe; asaayanga Wele siilo ne kumuusi, eyimananga khulia nasaba wele.

³⁸Siise esio ne sisiene, ola mala apa orio khu Wele naloma kamakhuwa ko mwana khwaabo ba baalindiililanga Wele asikule Yerusalemu.

³⁹ Nga Yosefu ne Maria ne bamala khukhola koosi kakenyekha kholoondekhana ne lilaka lio Mwami, bakobola engo wabwe mu lukoba lwa Nasareti mu Kalilaya.

⁴⁰Omwana achoa mala aaba ne kamaani, limanya likali, ne chikhabi cha Wele.

⁴¹ Buli mwiiko basaasi ba Yesu bachichanga Yerusalemu khulwa naikara eye Pasaka.

⁴²Nga Yesu ne aba bukhulu bwe kimiiko ekhumi na kibili, bacha sia naikara nga buli lwoosi.

⁴³Yaba oli naikara yawa, barakikha khukobola engo, ne Yesu arama mu Yerusalemu. Basaasi bewe se bamanya tawe;

⁴⁴bebaasia bali Yesu alikho akeendela mu sipupu sie babaandu. Khwako bakeenda endaalo yoosi mala barakikha khu muyiima mu balebe ne mu basaale babwe.

⁴⁵Se bamunyoola tawe, nio bakobola Yerusalemu khu muyiima.

⁴⁶Oli endaalo ekhola khataru bamunyoola mu Lukaangu ekhaale ne Babekisia be Siyuda ne alikho abarekeeresia ne khubareeba kamareeba.

⁴⁷Boosi babamuulila bauka likobosia liewe lie bukesi bukali.

⁴⁸Basaasi bewe bauka nga bamubona, mala maawe amureeba ali, “Mwana wase, siina sikila ne okhukholela kano? Ese ne raraao abeele khweembeleele lukali mala khulakhuyiimanga ewe.”

⁴⁹Abakobosia ali, “Siina sikila ne mu mbeenja? Se mu manyile muli khukhwola mbe munju eya Paapa wase tawe?”

⁵⁰Ne kakhali se bamanyilisia niko aabakobosia tawe.

⁵¹Nio Yesu aakobola nabo e Nasareti, mala ebweeneyo Yesu aria basaasi bewe. Maawe aabiikha kamakhuwa kano koosi mu mwoyo kwewe.

⁵² Yesu achoa, aba ne limanya, asiimisia Wele ne babaandu.