Read lubukusu Lk. 20 Bible Online

Lk. 20 - lubukusu bible

Lk. 20

¹Endaalo ndala nga Yesu aba mu Lukaangu ne alikho ekisia babaandu ne khukhwilwacha Elomo Endayi, Basaayi bakhulu ne baandiki be lilaka ne babemeelesi becha alala,

²ne bamuboolela bali, “Khuboolele bibiindu bino olabikholanga mu bunyali siina? Naanu owakhuelesia ewe bunyali buno?”

³Yesu abakobosia ali, “Akhaba sesi ndamureeba mumboolele,

⁴Yoana aamia waena bunyali bwe khubatiisia, khu Wele namwe khu baandu?”

⁵Barakikha khuyingana akari wabwe babeene ne babeene bali, “Khwaloma khuli, ‘Bwama khu Wele’; alaboola ali ‘Siina, ne mukhamusuubila?’

⁶Ne khwaboola khuli, ‘Bwama khu baandu’, babaandu bano boosi balakhuupa kamabaale; sikila basuubila bali Yoana aaba omung'oosi.”

⁷Nio bamukobosia bali, “Se khumanya niio bwama tawe.”

⁸Ne Yesu ababoolela ali, “Akhaba sesi, se muboolela kholaanga bibiindu bino mu bunyali bwa naanu tawe.”

⁹ Nio Yesu arakikha khuboolela babaandu lukano ali, “Abao omundu owabiaala liruuti mala alielesia bakholi baliemo, mala acha mu sibala sisiindi amenyayo siise sileeyi.

¹⁰Nga siise sie khubuta chisabibu sioola aruma nasioobi wewe khu bakholi abo, bamuelesie sikelo siewe sie chisabibu nicho babutile, ne kakhali bakholi abo bamupa mala bamutimania akobola engo mu makhono busa.

¹¹Omwene liruuti aruma nasioobi okundi mala bamukholela ke chisoni mala yesi bamutimania akobola engo makhono mataaka.

¹²Omwene liruuti oyo aruma nasioobi owa khataru; yuno bamwara kamakuma mala bamumwaata enje we liruuti.

¹³Nio, omwene liruuti aloma ali, ‘Ndakhola siina? Ndaruma Omwana wase Omusiime wakana banyala bamuria!’

¹⁴Nga bakholi be mwiruuti abo bamubona, baboolana bali, ‘Yuno niye omwana wo mwene liruuti lino. Khekhumwire nio efwe khwiile khu miaandu.’

¹⁵Nio, bamuyila enje we liruuti, mala bamwiira.” Yesu areeba ali, “Nono omwene liruuti alikhola siina bakholi be mwiruuti abo?

¹⁶Aliicha mala eere bakholi be mwiruuti mala areemo bakholi babaandi.” Nga babaandu baulila kano baloma bali, “Se kakhoya kaaba kario tawe!”

¹⁷ Yesu abalola mala abareeba ali, “Nono liiandiko lino liboola siina? ‘Libaale nilio babombakhi baloba bali se lili ne bukhala tawe, liliene ne liliene liabeele lie bukhala khukhila koosi.’

¹⁸Buli mundu okwa khu libaale elio alitonyekhakamo bitonyi, ne likwa khu mundu lilimutubundulaka.”

¹⁹Baandiki ne basaayi bakhulu bakhaka khuamba Yesu abwene ne abwene, sikila bamanya bali aboolile lukano luno khubekiicha nibo. Ne kakhali baria babaandu.

²⁰Nio bamwayilisia banyoole bubweyaangu. Baonga babaandu balala, mala babaruma khu Yesu nga bayooti. Bekhola khuba balayi khu niye nio bali bamutiile khu niko aloma mala bamuambe bamuyile khu be bunyali mala bamusitake khu muruki.

²¹Bayooti abo bareeba Yesu bali, “Omwekisia, khumanyile khuli olomalomanga mala wekisia buluungi ne soyekhelanga lubeka lulala tawe, ne ng'ali wekisianga bung'ali bwe ngila eya Wele.

²²Khuboolele, lilaka likhufukiilila efwe khuruunga busuuru khu Kaisari, namwe tawe?”

²³Yesu amanya kumureko kwabwe mala ababoolela ali,

²⁴“Njekesie erupia. Kumurwe ne lisina liilikho bia naanu?” Bamukobosia bali, “Bia Kaisari.”

²⁵Nio Yesu ababoolela ali, “Khwako, eelesia Kaisari biili bia Kaisari ne eelesia Wele biili bia Wele.”

²⁶Se banyala khunyoola ke khu musitakilakho ebweeni bwe babaandu tawe ne kakhali bauka likobosia liewe mala basila busa.

²⁷ Basatukayo ba balomanga bali, lilamukha se liliio tawe,

²⁸ becha khu Yesu, bamureeba bali, “Omwekisia, Musa aakhuandikila efwe lilaka ali, omulebe ne afwa ne alekha omukhasi ne akhali no mwana tawe, wandaaye khukhwola eele khu namulekhwa mala asaalile wandaaye owafwa oyo babaana.

²⁹Nono babao babaandu saba bo mundu mulala. Omubele aareera omukhasi mala omwene aafwa ne asiili khunyoolakho omwana tawe;

³⁰mala oomuloonda eela khu namulekhwa oyo, yesi aafwa,

³¹owa khataru yesi aamwiilakho mala kaaba busa kario khu boosi saba, se banyoola babaana tawe.

³²Lumaliilisi, aakhaba namulekhwa oyo yesi aafwa.

³³Nono mu khulamukha, namulekhwa oyo aliba mukha naanu? Sikila boosi saba bamenya naye nga omukhasi wabwe.”

³⁴Yesu aabakobosia ali, “Babaandu be selukho yino bareerana,

³⁵ne baseecha ne bakhasi baakholaane khulamukha mala bamenye mu siise sisiicha se balireerana tawe.

³⁶Se banyala bafwa lundi tawe, sikila bakhabe busa nga malaika bakhanyala bafwa tawe, lundi bali babaana ba Wele, sikila balamuukhe khukhwama mu lifwa.

³⁷ Lundi Musa ekesia abuwaanga ali babafwa balilamukha. Mumakhuwa ke sichakha siiya ne kumulilo Musa alaanga Omwami Wele Omunyali Owa Bioosi ali, ‘Wele owa Aburahamu, Wele owa Isaaka, ne Wele owa Yakobo!’

³⁸Wele ali Wele we balamu se ali Wele we bafu tawe. Sikila khu niye boosi bali balamu.”

³⁹Balala khu baandiki bakobosia Yesu bali, “Omwekisia elio likobosio lilayi!”

⁴⁰Se bakhakakho lundi khu mureeba lireeba tawe.

⁴¹Yesu abareeba ali, “Banyala baloma bariena bali Kristo ali omwana owa Daudi?

⁴² Sikila Daudi omwene aboola mu sitabu sie Chinyimbo ali, ‘Omwami aaboolela Omwami wase ali, Yikhala kumukhono kwase kumuseecha

⁴³nabwila nga khola basiku bowo babe nga endebe eye khuswalakho bikele biowo.’

⁴⁴Khwako Daudi amulaanga ali, ‘Omwami,’ nono linyalikhana liriena Kristo abe omwana owa Daudi?”

⁴⁵Nga babaandu boosi baba ne bamurekeeresia, Yesu aboolela babeeka bewe ali,

⁴⁶“Khe mwiyaye khuloondekhana ne baandiki be lilaka babasiima khukeendela chikaanjo ne khukhesebwa mu buriaani khu chisooko. Ne khu robora chindebe chindayi mu chisinakooki ne abuundu e lukoosi mu naikara.

⁴⁷Bebukulila bie banamulekhwa, ne eyi bekholesia mu khusaba kamasaba kamaleeyi! Balinyoola siiukuumo siboofu khukhila boosi!”