Read lubukusu Lk. 21 Bible Online

Lk. 21 - lubukusu bible

Lk. 21

¹Yesu aloleelela baiinda ne bara biianwa biabwe mu libiikhilo lie mu Lukaangu,

²mala abona namulekhwa omutaambi naramo bisimiri bia koopa bitiiti bibili.

³Nio aloma ali, “Ng'ali ese muboolela enywe ndi, namulekhwa omutaambi yuno arusiisie sikali khukhila boosi.

⁴Sikila babaandi boosi barusiisie sitiiti khu nibio bali nabio, ne niye mu butaambi bwewe, arusiisie sioosi nisio abeele nasio.”

⁵Babeeka balala balomaloma ke Lukaangu nga lwaba lwombakhwa ne kamabaale kamamiliiu lukali ne biianwa nibio baana khu Wele. Yesu aloma ali,

⁶“Ng'ali ese muboolela enywe ndi, kamabaale niko mubona kano se lilikhoo lilirama khu liindi tawe. Buli libaale likhamwaatwe aasi.”

⁷Nio bamureeba bali, “Omwekisia, kano kaliba liina? Ne sisiekesia sili kano kali siimbi khukholekha sili siina?”

⁸Yesu ababoolela ali, “Ba meso bakhamutiimia tawe; sikila bakali bakheeche mu lisina liase ne baboola bali, ‘Ese niye Kristo! Lundi siise siolile!’ Ne kakhali enywe mukhabaloondakho tawe.

⁹Ne nga muulila ke kamae ne chingoyaani, mukharia tawe, sikila khukhwola kano kanyoe kekholekhe ne se kali bali aba siieli siolile tawe.”

¹⁰Nio Yesu achiililila khu baboolela ali, “Bibala bilapana, bubwami bulebwaakalana,

¹¹lilabao literema likali lie sibala, enjala elabao ne lufu buli abuundu. Bibiindu bie kamakana biliikha khukhwama mwikulu.

¹²Ne bino bioosi ne bikhekholekha tawe, balimuaamba enywe ne khumupia sibi bamuyile mu chisinakooki ne mu siboe. Ne mulireerwa ebweeni we babaami ne baruki sikila lisina liase.

¹³Sino siliba siise sienywe sie khurusia buloli bwenywe.

¹⁴ Mukhembeelela mu mebaasio kenywe niko mucha khuloma tawe,

¹⁵sikila ndimuelesia kamakhuwa ne limanya nilio basiku benywe bakhanyala khumanya namwe bakambuusiamo tawe.

¹⁶Basaasi benywe, bawandaayenywe, balebe ne basaale bakhachaame balala mwinywe mala mwirwe.

¹⁷Bakali balimubiila sikila lisina liase.

¹⁸Ne kakhaba kario, akhaba lichuune lilala lie khumurwe se likharusibwekho tawe.

¹⁹Mulionia bulamu bwenywe khulwe khukhwikhaliilikha.

²⁰“Nga mukhabone Yerusalemu ne lubotookhelelwe ne banamae, abwenao mu khamanye muli khukhwonakwa khwalwo khwolile.

²¹Nio abo bali mu Buyuda khukhwola belukhile mu bikulu, ne abo bali mu lukoba khukhwola baruremo, ne abo bali enje bakhakobolamo tawe.

²² Sikila echo chikhabe chindaalo che siiukuumo, khukhwola koosi kakaandikwa kekholekhe.

²³Buliba bubi bukali khu bakhasi be chinda nende baliba ne banuunia! Sikila sibi sikali siliba khu sibala ne siiukuumo sia Wele khu baandu bano.

²⁴Balala bakhebwaakalwe beerwe, ne babaandi baliiyilwa mu mbaambe mu bibala bioosi, nende Be Chikholo baliswalakilila Yerusalemu khukhwola nga biise biabwe ne biliwa.

²⁵ “Bibiindu bie kamakana bikhekhole khu nyanga, khu mwesi ne khu ng'enieesi. Ne khu sibala khulibakho siibi sie bibala mu khwiembeelela khulwe khuoloola khwe nyanja ne bibuli bisiuukha.

²⁶Babaandu baliiochaocha sikila buuri nga baliba ne baliindiilile siliba ne silikho sicha khukholekha khu sibala, sikila bunyali bwe mu ngaaki bulisiisiikhwa.

²⁷ Bakhabone Omwana wo Mundu ne echela mwileesi ne bunyali ne luyali lukali.

²⁸Khwako nga bibiindu bino birakikha khukhwikholekha musute chimoni chenywe, sikila buonia bwenywe buliba buli siimbi.”

²⁹Nio Yesu ababoolela lukano luno ali, “Lolela khu mutuli ne kimirongooro kikiindi kioosi.

³⁰Ne nga mubona ne kusisiine kamasaafu kamatoro mumanya muli aba chindaalo che siimiyu chili siimbi.

³¹Khwako, ne mubona bibiindu bino ne bikholekha, mumanye muli Bubwami bwa Wele buli siimbi.

³²“Ng'ali muboolela enywe ndi eselukho yino se labira, bibiindu bino ne bikhekholekha tawe.

³³Likulu ne liloba biliwao, ne Elomo yase se eliwao tawe.”

³⁴“Ba meeso! Mukhalekha kimiooyo kienywe kiaba khu naikara engali ne bumeesi ne liliembeelela lie bulamu likali mala Endaalo eyo emunyoolelesie emuambe

³⁵nga kumureko tawe. Sikila kaliicha khu baandu boosi bamenyile buli abuundu khu sibala.

³⁶Ba meso mala muchiililile khusaba buli siise, nio mube ne kamaani ke khuona mu biindu bikhekholekhe, mala mwime ebweeni wo Mwana wo Mundu.”

³⁷Buli ndaalo Yesu ekisiaanga mu Lukaangu, ne siilo achichanga enje we lukoba khukona khu sikulu silaangwa Miseituni.

³⁸Ne buli kumutikhinyi babaandu boosi beechanga niio ali mu Lukaangu khumurekeeresia.