Read lubukusu Lk. 22 Bible Online

Lk. 22 - lubukusu bible

Lk. 22

¹Siise sia Naikara elaangwa Pasaka, eye kumukaati kukhalimo limela, siaba siimbi.

²Ne basaayi bakhulu ne baandiki baba bariire babaandu, nio bakhaka mu bwikisi khunyoola engila, eye khukhwira Yesu.

³Nio Sietani engila mu Yuda owalaangwa Isikarioti, owaba mulala khu barumwa ekhumi na babili.

⁴Khwako Yuda acha akachula ne basaayi bakhulu ne baliindi bakhulu nga nanyala achaama Yesu khu nibo.

⁵Basangaala, mala berusia khumuruunga chirupia.

⁶Nio Yuda afukiilisiana nabo mala arakikha khuyiima bubweyaangu bulayi bwe khuchaama Yesu khu nibo bamuambe babaandu bakali ne bakhaliio tawe.

⁷Endaalo eye Kumukaati Kukhalimo limela ne khukhwira kamameeme ke siakhulia sie Pasaka nga yoola,

⁸Yesu aruma Petero, ne Yoana nabalakiilisia ali, “Cha mung'oone siakhulia sie Pasaka khulie.”

⁹Bamureeba bali, “Wenya khusing'oonele waena?”

¹⁰Abakobosia ali, “Ne mulikho mwingila mu lukoba mulakaanana omundu owe siseecha asutile esoongo eye kameechi. Muloondekho khukhwola munju nimwo alacha,

¹¹mala mureebe omwene enju muli, Omwekisia areeba ali, ‘Lusiro siina nilwo ese ne babeeka base khulaliilamo siakhulia sie Pasaka?’

¹²Alamwekesia lusiro luboofu mu korofa lulimo buli siindu, mu bwenomwo rekekha buli siindu.”

¹³Nio bacha mala banyoola buli siindu nga Yesu aba ne ababoolele, mala barekekha siakhulia sie Pasaka.

¹⁴Nga esaa yoola, Yesu eekhala khu sialwa ne barumwa bewe.

¹⁵Nio ababoolela ali, “Nekoombile lukali khulia siakhulia sie Pasaka sino ne nanywe ne khaambwa tawe!

¹⁶Sikila muboolela enywe ndi, se ndilia lundi tawe khukhwola nga kaliba abuwaanga mu Bwami bwa Wele.”

¹⁷Yesu abukula sikoombe, ne nga amala khu khupa orio khu Wele aloma ali, “Bukula sino mala munywe.

¹⁸Sikila muboolela enywe ndi, khukhwama luno khuchiililila se ndanywa endali yino lundi tawe, khukhwola nga Bubwami bwa Wele buliicha.”

¹⁹Abukula kumukaati apa orio khu Wele akumesulamo mala abaelesia naloma ali, [“Kuno kuli kumubili kwase kuulikho kuaanwa khubeela enywe. Khola murio khulwe khu khukhebulila ese.”

²⁰Mu ngila ne ng'ene, aabukula sikoombe enyuma we khukhwikolooya abaelesia aloma ali, “Sikoombe sino sili endakaano eya Wele embia eyichusiibwe ne kamafuki kase, kakachukhwa sikila enywe.][5]

²¹“Ounjaama ali ano nase khu sialwa!

²²Omwana wo Mundu alafwa nga Wele aabisia, ne kakhali omundu omuchaama ali ne silaamo!”

²³Mala barakikha khureebana bali naanu olikho ocha khukhola kano.

²⁴ Kamayiingamo kaaba akari wabwe bali naanu oli omukhongo khu nibo boosi.

²⁵ Ne kakhali Yesu ababoolela ali, “Babaami be babaandu Be Chikholo bekesia bunyali khu baandu babwe mala baruki belaanga babeene bali, ‘Basaale be babaandu.’

²⁶ Ne se kali kario khwinywe tawe, nakhali oli omukali lukali khwinywe khukhwola abe nga omwana khukhila boosi ne omwimeelesi khukhwola abe nga omukholi.

²⁷ Naanu oli omukali lukali, oyo owikhala a sialwa khulia namwe oyo oreera khu mesa? Se ali oyo owikhalanga a sialwa tawe ku? Ne kakhali Ese ndi akari wenywe nga omukholi.

²⁸“Enywe mwachiililile khuba alala nase mu makhako kase,

²⁹nga Paapa ne amba bunyali bwe khuruka, akhaba sesi ndamuelesia enywe bunyali obwo.

³⁰ Mulilia ne khunywa a sialwa siase mu Bwami bwase mala mwikhale khu ndebe mukhalakile chikholo ekhumi na chibili cha Isiraeli.

³¹“Simoni, Simoni! Rekeeresia, Sietani enyile akhubukule ewe akhuseese nga omulimi aseesanga engaanu.

³²Ne kakhali nakhusabiile ewe Simoni ndi lisuubila liowo likhakwa tawe. Ne ungoboleele, khukhwola otinyilisie bawandaayo.”

³³Petero amukobosia ali, “Omwami, ese nerekekha khubowa ne khukhwirwa alala ne nawe!”

³⁴Ne Yesu amuboolela ali, “Ese khuboolela ewe Petero, ndi etaaywa ne khakholiokha siilo sia luno, olaba wanjikaanile khataru oli se umanyile tawe.”

³⁵ Nio Yesu areeba babeeka bewe ali, “Nga namuruma ne mukhali ne sibeeti, elolooti, namwe biraaro, mwataambakho sisiindu siosi siosi ku?” Bamukobosia bali, “Se khwataambakho siosi siosi tawe.”

³⁶Yesu ababoolela ali, “Ne kakhali luno omundu yesi yesi oli ne sibeeti namwe elolooti khukhwola abukule; ne yesi yesi okhali ne mbalu tawe khukhwola akusie engubo yewe mala akule embalu.

³⁷ Sikila muboolela enywe ndi liiandiko lino khukhwola lichusibwe mwise, ‘Bamura alala ne babooni’; sikila kakaandikwa khwise kalechusibwa.”

³⁸Babeeka bamuboolela bali, “Omwami, lola ano khuli ne chimbalu chibili.” Abakobosia ali, “Chanyalile.”

³⁹Yesu arura mu lukoba mala acha khu sikulu sia Miseituni nga buli lwoosi, babeeka boosi bacha naye.

⁴⁰Nga boola khu sikulu, Yesu ababoolela ali, “Khemusabe mukhakhola murio mwakwa mwikhako tawe.”

⁴¹Nio abalekha esendakho sinao, mala asikama asaba ali,

⁴²“Paapa, waaba ne wenya ndusieo sikoombe sie kumunyakhano sino. Ne kakhaba kario, likhaba lilienya liase busa tawe, ne kakhali lilienya liowo likholekhe.”

⁴³[Malaika khukhwama mwikulu amubonekhela mala amutinyilisia.

⁴⁴Asaba ne kamaani ne ali mu buchuuni bukali, lukesi lwewe lwaba nga kamafuki ne karoonya aasi.][6]

⁴⁵Nga enyokha mwisaba akobola khu beeka bewe mala abanyoola balikho bakona sikila baba baluile ne khubeelela lukali.

⁴⁶Ababoolela ali, “Siina sikila ne mukona? Khemwinyokhe musabe nio mukhakhola murio mwakwa mu makhako tawe.”

⁴⁷Oli Yesu asiloma ario, sipupu siola siarangiriirwe no mundu olaangwa Yuda, mulala khu beeka ekhumi na babili, echa khu Yesu ne khumwekwayila.

⁴⁸Yesu amuboolela ali, “Yuda, onyala wachaama Omwana wo Mundu khulwe khumwekwayila?”

⁴⁹Nga babeeka ba baaba ne Yesu babona sicha khwekholekha bamuboolela bali, “Omwami, khurumikhire chimbalu chefwe?”

⁵⁰Ne mulala khu nibo arema liiru lia nasioobi owo Omusaayi Omukhulu Lukali lie lubeka luseecha.

⁵¹Nio Yesu aloma ali, “Wanyala orio!” Nabukula liiru alikobosia khu murwe.

⁵²Nio Yesu aboolela basaayi bakhulu ne baliindi be lukaangu ne babemeelesi ba baaba ne bechile khumuaamba ali, “Mwichile ne chimbalu ne chiruungu oli ese ndi omunuuli?

⁵³ Nabelenge ne nanywe mu lukaangu buli endaalo mala se mwakhaka khu khumbamba tawe. Ne kakhali yino eli esaa yenywe ne bunyali bwe sisiilima.”

⁵⁴Nio baamba Yesu mala bamuila munju eyo Omusaayi Omukhulu Lukali. Petero aloondakho sinao.

⁵⁵Oli babwana kumulilo akari we luuya lwe kumuse balikho boora, Petero yesi abekhalamo.

⁵⁶Omukholi owe siikhasi nga amubona ekhaale asioso, amuungusa mala aloma ali, “Omundu yuno yesi abeele ne Yesu.”

⁵⁷Petero ekaana ali, “Mukhasiwe, ese se mu manyile tawe!”

⁵⁸Enyuma we siise sitiiti omundu okundi yesi aunguusa Petero mala aboola ali, “Ewe wesi oli mulala khwaabo.” Ne kakhali Petero amukobosia ali, “Munduwe, ese se ndi mulala khu nibo tawe!”

⁵⁹Enyuma we saa ndala omundu okundi yesi akhayilila busa khuboola ali, “Ng'ali omundu yuno yesi abele ne Yesu sikila ali Omukalilaya!”

⁶⁰Petero amukobosia ali, “Munduwe, olanialilisianga siina!” Nio oli asikaana ario etaaywa yakholiokha.

⁶¹Omwami ekhebukha mala alola Petero, mala Petero aakhebulila elomo niyo Omwami aaba ne amubooleele ali, “Siilo sia luno etaaywa ne khaakholiokha tawe, olaba wanjekaanile khukhwola khataru.”

⁶²Petero aarura enje aalila burafu po!

⁶³Babaandu ba baaba ne baliindile Yesu, bamukholela siienyameno ne khumuupa.

⁶⁴Bamufuunikha chimoni ne khu mureeba bali, “Ng'oola! Naanu owama khu khuupa?”

⁶⁵Mala bamuloma kamakhuwa kakaandi kamakali ke khumuseya.

⁶⁶Nga endaalo yola, kumuse kwe babemeelesi, basaayi bakhulu, ne baandiki bebuusia alala, mala bareera Yesu ebweeni we kumuse.

⁶⁷Bamureeba bali, “Khuboolele, ewe oli Kristo?” Abakobosia ali, “Nakhamuboolela, se mulasuubila tawe,

⁶⁸ne nakhamureeba lireeba se mulaangobosia tawe.

⁶⁹Ne khukhwama luno khuchiliilila, Omwana wo Mundu alekhala kumukhono kumuseecha kwa Wele Owe Bunyali Bwoosi.”

⁷⁰Nio boosi bamureeba bali, “Khwako ewe oli Omwana owa Wele?” Aabakobosia ali, “Enywe mwalomile murio.”

⁷¹Nabo baloma bali, “Buloli siina bubuundi nibo khwenya? Fwabeene khwauliile niko omwene aama khuloma.”