Read lubukusu Lk. 24 Bible Online

Lk. 24 - lubukusu bible

Lk. 24

¹Bakhasi bacha e siliindwa asibuyi mwichuma, basutile bibiindu biiunya bulayi chana nibio baba ne bang'oonile.

²Banyoola libaale liapiringisiibwe liarurire emuliango we siliindwa.

³Nga bengilamo se banyoolamo kumubili kwa Yesu tawe.

⁴Nga baba ne basiiuka, babona babaandu babili babemao befwarire chingubo ching'enang'ena lukali.

⁵Bakhasi abo baambwa buuri, benamikha bubweeni bwabwe bwetiila aasi, mala babaandu abo baabareeba bali, “Siina sikila ne muyiima omulamu mu bafu?

⁶ Se ali ano tawe, alamusiibwe. Khebulila niko aamuboolela enywe, ne asiili e Kalilaya ali,

⁷‘Omwana wo Mundu khukhwola aanwe khu baandu babooni, abaambwe khu musalaba, mala enyuma we chindaalo chitaru alamukhe.’ ”

⁸Bakhasi abo bakhebulila kamakhuwa ka Yesu,

⁹bakobola engo khukhwama e siliindwa mala baboolela babeeka ekhumi na mulala ne babaandi boosi bibiindu bino bioosi.

¹⁰Bakhasi abo ba baboolela barumwa bibiindu bino baba Maria Makatalena, Yoanina ne Maria maawe owa Yakobo, ne bakhasi babaandi.

¹¹Ne kakhali barumwa bebaasia bali niko bakhasi bababoolele kali ka busa mala khusuubila tawe.

¹²Ne kakhali Petero enyokha mala atima acha e siliindwa enama mala abona esuuka eya katani yaulukuuswe, ne sisiindu se siabamo tawe. Mala akobola engo nauka busa kakekholeekhe.[9]

¹³Khu ndaalo eyo neng'ene baloondi ba Yesu babili baba balikho bacha mu sirekere sisialaangwa bali Emau, embi chi kilomita ekhumi na ndala khukhwama e Yerusalemu,

¹⁴ne baba balikho balomaloma ke bibiindu bioosi bibiaba ne biekholekhe.

¹⁵Nga baba ne balikho baapa embakha eyo, Yesu omwene echa aba siimbi mala akeenda nabo.

¹⁶Bamubona ne kakhali se bamumanya tawe.

¹⁷Yesu abareeba ali, “Mulikho mulomaloma siina nga mulakeendanga?” Bema mala bubweeni bwabwe bwekesia bubeeleli.

¹⁸Mulala khu nibo owalaangwa Kilefasi amureeba ali, “Ewe weng'ene niwe omukeni mu Yerusalemu okhamanyile bibiindu bibiikholekhemo mu ndaalo ndiiti chibirire chino tawe?”

¹⁹Naye abareeba ali, “Biindu siina?” Bamukobosia bali, “Bibiindu bibiekholeekhe khu Yesu owa Nasareti.” Omundu yuno abele omung'oosi owe kamaani mu khukhola ne mu khuboola buli sisiindu ebweeni wa Wele ne babaandu boosi.

²⁰Basaayi bakhulu ne babaami befwe bamuana akhalakilwe lifwa, mala abaambwa khu musalaba.

²¹Ne abele khweyikina khuli niye olionia Isiraeli! Luno eli endaalo eya khataru khukhwama nga kano ne kekholekha.

²²Khutasa khwako bakhasi balala be kumukaanda kwefwe bakhuukisie, bachile makhelebeende khu siliindwa,

²³ne se banyoolilemo kumubili kwewe tawe, bakoboole ne baboola bali, malaika ba babonekheele ne khubaboolela bali alamuukhe.

²⁴Balala khwifwe bachiile khu siliindwa mala banyoola busa bulayi bwene nga bakhasi abo ne baboolile, ne kakhali se baboonekho Yesu omwene tawe.

²⁵Nio Yesu ababoolela ali, “Enywe muli basilu sina? Muli kalaa khusuubila buli sisiindu nisio bang'oosi baloma!

²⁶Se lienyekha Kristo anyaasibwe mu biindu bino bioosi, mala engile mu luyali lwewe tawe ku?”

²⁷Nio Yesu abenooselia kakewe koosi kakaba ne kaboolwa mu maandiko, khurakikhira khu Musa ne bang'oosi boosi.

²⁸Ne nga boola siimbi a sirekere nisio baba ne balikho bachamo Yesu ekholesia nga owenya khubirao;

²⁹ne kakhali bamukhayilakho ne baloma bali, “Enyanga yakwile mala sisiilima silikho sitiila kona ano nafwe.” Nio acha nabo.

³⁰Ekhala a sialwa khulia nabo, abukula kumukaati mala apa orio; mala akumesulamo abaelesia.

³¹Nio chimoni chabwe chekukha, bamanya bali ali Yesu niye. Mala atambao.

³²Bareebana bali, “Kimiooyo kiefwe se kiyilenge nga alomalomenge nafwe khu muila nakhwinooselia kamaandiko?”

³³Benyokha khangu bakobola e Yerusalemu, mala banyoola babeeka ekhumi na mulala bebuusiisie alala ne babaandi nibo baba nabo,

³⁴mala baababoolela bali, “Ng'ali Omwami aalamukhe! Aama khubonekhela Simoni!”

³⁵Babili abo babenooselia kakekholeekhe khu muila, lundi nga bamanyile bali Yesu niye namalile khubaelesia kumukaati.

³⁶Nga babili abo baba ne basibaboolela kano, Yesu omwene eema akari wabwe ababoolela ali, “kumuleembe kube nanywe.”

³⁷Besiindukha lundi baria lukali mala bebaasia bali baboone simakoombe.

³⁸Ne kakhali ababoolela ali, “Siina sikila ne mwesiindukha mala nemuayaaya mu miooyo kienywe.

³⁹Lola kamakhono kase ne bikele, mala mumanye muli niise samwene. Ndilekho mala mu manye, sikila simakoombe se sili ne kumubili ne bikuumba nga mubona ese nendi nabio tawe.”

⁴⁰Oli ababoolela kano, abekesia kamakhono kewe ne bikele.[10]

⁴¹Kakhaba kario se basuubila tawe sikila liliekhoya ne liuka, nio abareeba ali, “Mulikho ne siakhulia siosi siosi?”

⁴²Bamuelesia sitonye sie ng'eeni endeekhe,

⁴³niyo abukula mala alia mu moni chabwe.

⁴⁴Nio ababoolela ali, “Kano kali kamakhuwa kase niko nalomaloma khwinywe nga naba ne siili nanywe, ndi, buli siindu sisiaandikwa khwise mu Lilaka lia Musa ne mu maandiko ke bang'oosi ne chinyimbo khukhwola kechusibwe.”

⁴⁵Nio ekula kamebaasio kabwe bamanye kamaandiko,

⁴⁶mala ababoolela ali, “Kaandikwa kali, Kristo khukhwola anyaasibwe mala alamusibwe mu bafu enyuma we chindaalo chitaru,

⁴⁷mala mu lisina liewe burume khu liekanila ne khubeelwa khwe bubwoni bwilwachibwe khu kholo choosi, khurakikhira mu Yerusalemu.

⁴⁸Enywe muli baloli be bibiindu bino.

⁴⁹ Ne lola ese samwene ndamurumira enywe nisio Paapa wase asuubisia. Ne khukhwola mu lindiilile mu lukoba nabwila nga kamaani khukhwama mwikulu ne kamwichakho.”

⁵⁰ Nio abaraangirira abarusia enje we lukoba boola e Betania, mala asuta kamakhono kewe ababiita chikhabi.

⁵¹Nga aba nasibabiita chikhabi, abukhana nabo mala abukulwa khucha mwikulu.

⁵²Bamusaaya mala bakobola Yerusalemu ne liliekhoya likali,

⁵³mala siise siabwe sioosi bachiililila khuba mu lukaangu ne khu khupila Wele orio.