Read lubukusu Lk. 3 Bible Online

Lk. 3 - lubukusu bible

Lk. 3

¹Kwaba kumwiiko kukhola likhumi lilala na kiraano kie buruki bwo mwami Tiberia; Pondio Pilato aaba omuruki we Ebuyuda, Herodi aba omwami owe Kalilaya ne wandaaye Filipo aaba omwami mu sibala sia Iturea ne Trakoniti, Lusania naye aaba omwami owe Abilini.

²Anasi ne Kayafa baba basaayi bakhulu mu ndaalo nicho elomo eya Wele yecha khu Yoana okhwa Sakaria mu sichiimi.

³Nio Yoana acha mu lukoongo lwe luluuchi lwa Yoritani ne elwacha ali, “Yekanila bubwoni bwenywe mala mubatiisibwe, ne Wele alamubeela enywe.”

⁴ Nga kaandikwa mu sitabu sio mung'oosi Isaya bali, “Kumumilo kwo mundu kulikho kulomela mu sichiimi kuli, ‘Rekekha kumwiila kwo Mwami, kololosia engila abirirekho.

⁵Yichusia buli litooma, yaasia chingulu ne bikulu, luungisia kimiila kikiekotakota, ne khukwalaasia chingila che kamatikwi;

⁶buli mundu alibona buonia bwa Wele!’ ”

⁷ Baandu bakali becha khu Yoana ababatiisie. Nio aababoolela ali, “Enywe lisaaye lia Nafwo! Naanu wamubooleele mwemusie khukhwama khu siiukuumo sia Wele nisio ali siimbi khureera?

⁸ Khola bikholwa bibiokesia bili enywe mwekanile bubwoni bwenywe. Ne mukharakikha khuloma muli Aburahamu ali kuuka wenywe tawe. Muboolela ndi Wele anyala khubukula kamabaale kano mala akakhole kabe babaana ba Aburahamu!

⁹ Eaywa yerekekhe khurema bisina bie kimirongooro, buli murongooro kukhaama kamatuunda kamalayi tawe kularemwa mala kumwaatwe mu mulilo.”

¹⁰Nio babaandu bamureeba bali, “Nono khukhole siina?”

¹¹Abakobosia ali, “Buli mundu oli ne chingubo chibili akhoyeele aelesiekho ndala omundu okhalikho nayo tawe, ne buli mundu oli ne siakhulia akhoyeele akabekho owasie.”

¹² Barosia busuuru balala becha babatiisibwe, mala bamureeba bali, “Omwekisia, efwe khukhole siina?”

¹³Ababoolela ali, “Mukharoosia busuuru bukali khukhila bubwalakwa tawe.”

¹⁴Banamae balala bosi bamureeba bali, “Nefwe nafwe khukhole siina?” Abakobosia ali, “Mukhanuula omundu yesi yesi chirupia chewe tawe, namwe mwasitaka omundu yesi yesi mu bubeeyi tawe. Munyalikhe ne kumuruungo kwenywe.”

¹⁵Lilieyikina lie babaandu liarakikha khubonekha, mala barakikha khukhwibaasia bali wakana Yoana niye Masiiya.

¹⁶Nio Yoana ababoolela boosi ali, “Ese mubatiisia enywe ne kameechi, ne kakhali okundi alikho echa oli omukali khu khuukhila ese. Ese se nolaana akhaba khukangulula biraaro biewe tawe. Alimubatiisia enywe ne Roho Omutakatifu ne kumulilo.

¹⁷Ali ne euuma eye khuubisia engaanu khuluya mala auule engaanu yoosi abunge mu sirara; ne aliosia likhuuchi mu mulilo kukhasimanga tawe.”

¹⁸Yoana elwacha Elomo Endayi khu baandu mu ngila chingali ne abekoonjelela bakaluukhane mu ngila chabwe.

¹⁹ Ne Yoana arafwira omwami Herodi sikila aaba abeyisie Herotia mukha wandaaye, lundi abele akholile kamabi kakaandi kamakali.

²⁰Khwako Herodi akhola sisiindu sisiindi sibi lukali, khulwe khura Yoana mu siboe.

²¹Enyuma we babaandu boosi ne babatiisibwe, Yesu yesi abatiisibwa. Nga ne aaba ne alikho nasaba, likulu liekukha,

²² mala Roho Omutakatifu amwichakho mu sifwaanane sie liuusi. Kumumilo kwama mwikulu kuli, “Ewe oli Omwana wase Omusiime ousiimisia lukali.”

²³Nga Yesu ne arakikha kimilimo kiewe, aaba embi bukhulu bwe kimiiko kamakhumi kataru. (Okhwa Yosefu nga baandu ne bebaasianga). Yosefu aaba okhwa Heli,

²⁴Ne Heli aaba okhwa Matati, owaba okhwa Lawi, owaba okhwa Meliki, owaba okhwa Yanai, owaba okhwa Yosefu,

²⁵owaba okhwa Matatia, owaba okhwa Amosi, owaba okhwa Nahumu, owaba okhwa Esili, owaba okhwa Nakai,

²⁶owaba okhwa Maati, owaba okhwa Matatia, owaba okhwa Semeini, owaba okhwa Yoseki, owaba okhwa Yota,

²⁷owaba okhwa Yoanani, owaba okhwa Resa, owaba okhwa Serubabeli, owaba okhwa Shealitieli owaba okhwa Neri,

²⁸owaba okhwa Meliki, owaba okhwa Ati, owaba okhwa Kosamu, owaba okhwa elimatamu, owaba okhwa Eri,

²⁹owaba okhwa Yosia, owaba okhwa Elieseri, owaba okhwa Yorimu, owaba okhwa Matati, owaba okhwa Lawi,

³⁰owaba okhwa Simioni, owaba okhwa Yuda, owaba okhwa Yosefu, owaba okhwa Yonamu, owaba okhwa Eliakimu,

³¹owaba okhwa Melea, owaba okhwa Mena, owaba okhwa Matatia, owaba okhwa Nasani, owaba okhwa Daudi,

³²owaba okhwa Chesi, okhwa Obeti, okhwa Boasi, okhwa Salimoni okhwa Nashoni,

³³owaba okhwa Aminatabu, owaba okhwa Atimini, owaba okhwa Arini, okhwa Hesironi, okhwa Peresi owaba okhwa Yuda,

³⁴owaba okhwa Yakobo, owaba okhwa Isaaka, owaba okhwa Aburahamu, okhwa Tera, okhwa Nahori, owaba okhwa

³⁵Seruki, owaba okhwa Reu, owaba okhwa Peleki, owaba okhwa Eberi, owaba okhwa Shela,

³⁶owaba okhwa Kainani, owaba okhwa Arifasati, owaba okhwa Shemu, owaba okhwa Noa, owaba okhwa Lameki,

³⁷owaba okhwa Metusela, owaba okhwa Enoka, owaba okhwa Yareti, owaba okhwa Mahalaleli, owaba okhwa Kenani,

³⁸owaba okhwa Enosi, owaba okhwa Seti, owaba okhwa Adamu, owaba Omwana owa Wele.